ନନ୍ଦିଘୋଷ ବ୍ୟୁରୋ: ଦୀପାବଳି ପରେ ଦିଲ୍ଲୀରେ ଭୟଙ୍କର ପ୍ରଦୂଷଣ। AQI ଟପିଛି ୩୦୦୦। ଗତ ୨ ଦିନ ଧରି ଜାତୀୟ ରାଜଧାନୀରେ ଅଚଳାବସ୍ଥା। ବୟସ୍କ ଓ ଶିଶୁମାନେ ଅଛନ୍ତି ସଙ୍କଟରେ। ସେପଟେ ପ୍ରଦୂଷଣକୁ ନେଇ ଉଦବେଗ ପ୍ରକାଶ କରିଛନ୍ତି ସୁପ୍ରିମକୋର୍ଟ। ଦିଲ୍ଲୀ-ଏନସିଆରରେ ଯାନବାହନଜନିତ ପ୍ରଦୂଷଣ ରୋକିବା ଲାଗି ତୁରନ୍ତ ହସ୍ତକ୍ଷେପ କରିବା ସକାଶେ ଦିଲ୍ଲୀ ଓ ୩ ପଡ଼ୋଶୀ ରାଜ୍ୟଙ୍କୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ। ଦିଲ୍ଲୀ ମଧ୍ୟକୁ ଯାନବାହନ ପ୍ରବେଶ, ଚଳାଚଳ, ଏମିସନ ସମ୍ପର୍କରେ କଡ଼ା ଆଭିମୁଖ୍ୟ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି କୋର୍ଟ। ପ୍ରଦୂଷଣ ସୃଷ୍ଟି କରୁଥିବା ଯାନବାହନଗୁଡିକ ଯେପରି ରାସ୍ତାରୁ ହଟିବେ ସେଥିପ୍ରତି ପଦକ୍ଷେପ ନେବାକୁ କୋର୍ଟ କହିଛନ୍ତି। ସିଜେଆଇ ଜଷ୍ଟିସ ସୂର୍ଯ୍ୟକାନ୍ତ, ଜଷ୍ଟିସ ଜୟମାଲ୍ୟ ବାଗଚୀ ଓ ଜଷ୍ଟିସ ଭି. ମୋହନାଙ୍କୁ ନେଇ ଗଠିତ ଖଣ୍ଡପୀଠ ଦିଲ୍ଲୀ ମହାନଗର ନିଗମ, ଦିଲ୍ଲୀ ସରକାର, ଦିଲ୍ଲୀ ପୋଲିସ ଟ୍ରାଫିକ, ହରିଆଣା, ରାଜସ୍ଥାନ ଓ ଉତ୍ତରପ୍ରଦେଶ ସରକାରଙ୍କୁ ନୋଟିସ ଜାରି କରିଛନ୍ତି। ନିୟାମକ ପଦକ୍ଷେପ ସମ୍ପର୍କରେ ସବିଶେଷ ବିବରଣୀ ଦାଖଲ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ସେପଟେ ଦିଲ୍ଲୀ ପ୍ରଦୂଷଣକୁ ନେଇ ବଢିଛି ରାଜନୈତିକ ବିବାଦ। ଦିଲ୍ଲୀ ସରକାରଙ୍କ ଉପରେ ବର୍ଷିଛନ୍ତି ଆପ୍ ଓ କଂଗ୍ରେସ। ଚିନ୍ତା ପ୍ରକଟ କରିଛନ୍ତି ପରିବେଶବିତ ।
