ନନ୍ଦିଘୋଷ ବ୍ୟୁରୋ: ଭାରତୀୟ ସେନାର ଶକ୍ତି ଆହୁରି ବଢ଼ିବ। ଲଦାଖର ହାଡ଼ଭଙ୍ଗା ଶୀତ ହେଉ କି କଚ୍ଛର ପ୍ରଚଣ୍ଡ ଗରମ, ସବୁ ପରିସ୍ଥିତିରେ ସେନାକୁ ସହଯୋଗ କରିବ ଏକ ସ୍ୱତନ୍ତ୍ର ଯାନ। ଏହି ଯାନର ନାମ ହେଉଛି BVS 10 ସିନ୍ଧୁ ଅଲ୍–ଟେରେନ୍ ଭେଇକିଲ୍
ଲାର୍ସନ୍ ଆଣ୍ଡ୍ ଟୁବ୍ରୋ ଏବଂ ବ୍ରିଟେନର ପ୍ରତିରକ୍ଷା କମ୍ପାନୀ BAE ସିଷ୍ଟମ୍ସ ମିଳିତ ଭାବେ ଗୁଜରାଟର ହାଜିରାରେ ଏହି ଯାନର ଉତ୍ପାଦନ ଆରମ୍ଭ କରିଛନ୍ତି। ଏହା ଭାରତୀୟ ସେନାର ଯାତାୟାତ ଓ ଅପରେସନ୍ କ୍ଷମତାକୁ ଆହୁରି ମଜବୁତ କରିବ। ଭାରତୀୟ ସେନା ପ୍ରଥମ ପର୍ଯ୍ୟାୟରେ ଏହି ଧରଣର ୧୮ଟି ଯାନ ପାଇଁ ଅର୍ଡର ଦେଇଛି। ଏହାକୁ ଲଦାଖ ଭଳି ଉଚ୍ଚ ପାହାଡ଼ିଆ ଅଞ୍ଚଳରେ ନିୟୋଜିତ କରାଯିବ। ସେଠାରେ ପ୍ରାୟ ୧୮ ହଜାର ଫୁଟ୍ ଉଚ୍ଚତାରେ ସୈନିକମାନଙ୍କୁ ଅନେକ କଷ୍ଟକର ପରିସ୍ଥିତିରେ କାମ କରିବାକୁ ପଡ଼ିଥାଏ। ଏପରି ସ୍ଥାନରେ ସୈନିକ ଓ ଆବଶ୍ୟକ ସାମଗ୍ରୀ ପରିବହନରେ ଏହି ଯାନ ସହାୟକ ହେବ।
BVS 10 ସିନ୍ଧୁର ସବୁଠାରୁ ବଡ଼ ବିଶେଷତ୍ୱ ହେଉଛି ଏହା ମାଇନସ୍ ୫୫ ଡିଗ୍ରୀରୁ ପ୍ଲସ୍ ୫୫ ଡିଗ୍ରୀ ସେଲସିୟସ୍ ତାପମାତ୍ରା ପର୍ଯ୍ୟନ୍ତ କାମ କରିପାରିବ। ଅର୍ଥାତ୍, ଅତ୍ୟଧିକ ଥଣ୍ଡା ଓ ପ୍ରଚଣ୍ଡ ଗରମ ଉଭୟ ପରିସ୍ଥିତିରେ ଏହା ବ୍ୟବହାର ହୋଇପାରିବ। ଲଦାଖର ବରଫାବୃତ ଅଞ୍ଚଳ ସହିତ ପାକିସ୍ତାନ ସୀମା ନିକଟ କଚ୍ଛର ରଣ ଅଞ୍ଚଳରେ ମଧ୍ୟ ଏହି ଯାନ ଉପଯୋଗୀ ହୋଇପାରିବ। କାଦୁଅ, ଜଳାଭୂମି, ବାଲି ଓ ଅସମତଳ ରାସ୍ତାରେ ଚଳାଚଳ କରିବା ପାଇଁ ଏହାକୁ ଡିଜାଇନ୍ କରାଯାଇଛି।
ସୀମାନ୍ତ ଅଞ୍ଚଳରେ ପାଟ୍ରୋଲିଂ, ସୈନିକଙ୍କ ଗତିଶୀଳତା ଏବଂ କଷ୍ଟକର ରାସ୍ତାରେ ଅପରେସନ୍ କରିବାରେ BVS 10 ସିନ୍ଧୁ ଗୁରୁତ୍ୱପୂର୍ଣ୍ଣ ଭୂମିକା ନେଇପାରିବ। ଅତ୍ୟଧିକ ଥଣ୍ଡାରୁ ଆରମ୍ଭ କରି ପ୍ରଚଣ୍ଡ ଗରମ ପର୍ଯ୍ୟନ୍ତ କାମ କରିବାର କ୍ଷମତା ଏହାକୁ ଅନ୍ୟ ଯାନଠାରୁ ସ୍ୱତନ୍ତ୍ର କରିଥାଏ। ମୋଟାମୋଟି କହିବାକୁ ଗଲେ, ଲଦାଖର ବରଫ ହେଉ କି କଚ୍ଛର ତତଲା ବାଲି, ଭାରତୀୟ ସେନାର ଏହି ନୂଆ ଯାନ ସୀମା ସୁରକ୍ଷା ଓ ସାମରିକ ଅଭିଯାନରେ ନୂଆ ଶକ୍ତି ଯୋଗାଇବାର ଆଶା ରହିଛି।
