ନନ୍ଦିଘୋଷ ବ୍ୟୁରୋ: ଆସନ୍ତା ଅକ୍ଟୋବର ୨୬ ତାରିଖରୁ ପୁରୀରେ ଆରମ୍ଭ ହେବାକୁ ଥିବା ହବିଷ୍ୟାଳୀ ବ୍ରତ ନେଇ ହବିଷ୍ୟାଳୀ ଶିବିର ମାନଙ୍କରେ ଶେଷ ପର୍ଯ୍ୟାୟରେ ପହଞ୍ଚିଛି ପ୍ରସ୍ତୁତି । ଚୟନ ମାନଦଣ୍ଡ ଅନୁଯାୟୀ ୨୪ ଶହ ହବିଷ୍ୟାଳୀଙ୍କୁ ଶିବିରରେ ସୁବିଧା ଯୋଗାଇ ଦେବାକୁ ମନୋନୀତ କରାଯାଇଥିବା ବେଳେ ଦୁଇଟି ପ୍ରସ୍ତୁତି ବୈଠକ ଶେଷ ହୋଇଛି । ପୁରୀରେ ପ୍ରଶାସନ ପକ୍ଷରୁ ତିନୋଟି ଶିବିରରେ ବ୍ରତ ପାଳନ ନେଇ ନିଶୁଳ୍କ ରହଣୀ, ମାଗଣା ମହାପ୍ରସାଦ ଓ ବସ୍ ସେବା ଦ୍ୱାରା ମହାପ୍ରଭୁଙ୍କ ଦର୍ଶନ ପାଇଁ ବ୍ୟବସ୍ଥା ହୋଇଛି ।
ଶିବିର ବାହାରେ କାର୍ତ୍ତିକ ପାଳୁଥିବା ବ୍ରତଧାରୀଙ୍କ ପାଇଁ ମଧ୍ୟ ଶ୍ରୀମନ୍ଦିରରେ ଦର୍ଶନ ପାଇଁ ସ୍ୱତନ୍ତ୍ର ଲାଇନର ବ୍ୟବସ୍ଥା କରାଯାଇଥିବା ବେଳେ ତୀର୍ଥ ପୁଷ୍କରିଣୀରେ ହବିଶ୍ୟାଳୀଙ୍କ ସ୍ନାନ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ତେବେ ମାସେ ପର୍ଯ୍ୟନ୍ତ ପୁରୀରେ ଏ ନେଇ ପୋଲିସ ପ୍ରଶାସନ ପକ୍ଷରୁ ସ୍ୱତନ୍ତ୍ର ଧ୍ୟାନ ଦିଆଯିବା ସହ ପ୍ରାୟ ୧୫ ପ୍ଲାଟୁନ୍ ପୋଲିସ ଫୋର୍ସ ମୃତୟନ କରାଯିବ । ଆଗାମୀ ୨୬ ତାରିଖ ସକାଳେ ବୃନ୍ଦାବତୀ ନିବାସ ଶିବିରରେ ଚୟନ ହୋଇଥିବା ବ୍ରତଧାରୀଙ୍କୁ ପରିଚୟ ପତ୍ର ସହ ସିଟ୍ ଆଲଟମେଣ୍ଟ ମିଳିବ । ବିନା ପଞ୍ଜୀକରଣରେ କାହାରିକୁ ନରଖିବା ପାଇଁ କଡ଼ା ନିର୍ଦ୍ଦେଶ ଦିଆଯାଇଛି । ବିଶେଷକରି ବୃନ୍ଦାବତୀ ନିବାସ, ରେଳବାଇ ଟୁରିଷ୍ଟ କମ୍ପ୍ଲେକ୍ସ ଓ ପୌରସଂସ୍ଥା କଲ୍ୟାଣ ମଣ୍ଡପରେ ସମସ୍ତ ହବିଶ୍ୟାଳୀଙ୍କ ରହଣୀର ହୋଇଛି ବ୍ୟବସ୍ଥା ।
ତୀର୍ଥ ପୁଷ୍କରିଣୀରେ ବ୍ୟାରିୟର ଓ ମହୋଦଧିରେ ଲାଇଫ ଗାର୍ଡ ମୁତୟନ କରାଯାଇଥିବା ବେଳେ ଆମ୍ବୁଲାନ୍ସ , ମେଡ଼ିକାଲ ଟିମ୍ ସହ ଅଗ୍ନିଶମ ବିଭାଗ ଅଧିକାରୀ ଓ ସ୍ୱେଚ୍ଛାସେବୀଙ୍କ ସମନ୍ୱୟରେ ବ୍ୟାପକ ବ୍ୟବସ୍ଥା କରାଯାଇଛି । ସେପଟେ ହବିଶ୍ୟାଳୀ ମାନଙ୍କ ପାଇଁ ଫ୍ରି ଦର୍ଶନ, ଶିବିରରେ ବ୍ରତଧାରୀଙ୍କ ସୁରକ୍ଷା ପାଇଁ ୫ ପ୍ଲାଟୁନ୍ ଫୋର୍ସ ମୁତୟନ କରାଯାଇଛି । ମାସକ ଯାକ ଶ୍ରୀକ୍ଷେତ୍ରରେ କ୍ରାଉଡ୍ କଣ୍ଟ୍ରୋଲ, ଟ୍ରାଫିକ ରେଗୁଲେସନ୍ ଓ ମନ୍ଦିର ଭିତରେ ଶୃଙ୍ଖଳିତ ଦର୍ଶନ ପାଇଁ ୧୫ ପ୍ଲାଟୁନ୍ ପୋଲିସ ଫୋର୍ସ ମୁତୟନ ହେବେ । ତେବେ ଆଜି କେନ୍ଦ୍ରାଞ୍ଚଳ ଆଇଜି ଓ ପୁରୀ ଏସପି ସମସ୍ତ ତିନି ଗୋଟି କେନ୍ଦ୍ର ବୁଲି ସମୀକ୍ଷା କରିଥିଲେ।
