ସୁଦାନ ସୁନା ଖଣି ଉପରେ ଏୟାରଷ୍ଟ୍ରାଇକ୍, ଗଲା ୭୨ ଜୀବନ
ନନ୍ଦିଘୋଷ ବ୍ୟୁରୋ: ସୁଦାନର ସୁନା ଖଣି ଉପରେ ଏୟାରଷ୍ଟ୍ରାଇକ୍ । ଏଥିରେ ୭୨ ଜଣ ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ଅନେକ ଗୁରୁତର ହୋଇଥିବା ସୂଚନା ମିଳିଛି । ସୁଦାନ ଓ ମିଶର ମଧ୍ୟରେ ଥିବା ବିବାଦୀୟ ସୀମା ନିକଟରେ ଏହି ଏୟାରଷ୍ଟ୍ରାଇକ୍ ହୋଇଥିବା କୁହାଯାଉଛି । ଏହି ଷ୍ଟ୍ରାଇକ୍ ଇଜିପ୍ଟର ବାୟୁସେନା ଦ୍ବାରା କରାଯାଇଥିବା ଇମରଜେନ୍ସି ଲୟାର୍ସ ନାମକ ଏକ ସଂଗଠନ ପକ୍ଷରୁ କୁହାଯାଇଛି । ଏୟାରଷ୍ଟ୍ରାଇକ୍ କୁ ନେଇ ଇଜିପ୍ଟ ଏପର୍ଯ୍ୟନ୍ତ କୌଣସି ବିବୃତି ଜାରି କରିନାହିଁ।
ଆକ୍ରମଣ ପରେ ପ୍ରାରମ୍ଭିକ ରିପୋର୍ଟରେ ମୃତ୍ୟୁ ସଂଖ୍ୟା ୭୨ ବୋଲି କୁହାଯାଇଛି । କିନ୍ତୁ ସ୍ଥାନୀୟ ସଂଗଠନ ଗୁଡ଼ିକର କହିବା କଥା, ଆକ୍ରମଣ ସମୟରେ ହଜାରରୁ ଅଧିକ ଲୋକ ଭିନ୍ନ ଭିନ୍ନ ସ୍ଥାନରେ କାମ କରୁଥିଲେ, ତେଣୁ ମୃତାହତଙ୍କ ସଂଖ୍ୟା ବଢିପାରେ ବୋଲି ଆଶଙ୍କା କରାଯାଉଛି। ଏୟାରଷ୍ଟ୍ରାଇକ୍ ବେଳେ କାମ କରୁଥିବା ଶ୍ରମିକ ଭୟରେ ଏଣେ ତେଣେ ଦୌଡ଼ି ପଳାଇଥିଲେ। ପ୍ରତ୍ୟକ୍ଷଦର୍ଶୀ କହିଛନ୍ତି, ଲଢୁଆ ବିମାନ ଖଣି ଉପରେ ୫ ଥର ବୋମାମାଡ଼ କରିଥିଲା ।
ପ୍ରକାଶ ଥାଉ କି, ଏହା ପୂର୍ବରୁ ଜୁନ୍ ମାସରେ ମିଶର ସୀମା ନିକଟସ୍ଥ ଜାବାଲ୍ ଅଲ୍-ଉକାୟଦାତ୍ ଅଞ୍ଚଳରେ ଏକ ଅଣଲାଇସେନ୍ସ୍ ପ୍ରାପ୍ତ ସୁନା ଖଣି ଉପରେ ଏୟାର ଷ୍ଟ୍ରାଇକ୍ ହୋଇଥିଲା। ଆକ୍ରମଣ ପାଇଁ ମିଶରକୁ ଦାୟୀ କରାଯାଇଥିଲା। ସୁଦାନ ଓ ମିଶର ମଧ୍ୟରେ ବହୁ ଦିନ ଧରି ସୀମା ବିବାଦ ଲାଗି ରହିଛି । ଉଭୟ ଦେଶ ଖଣିଜ ସମ୍ପଦରେ ସମୃଦ୍ଧ ଥିବା ହଲୈବ ତ୍ରିଭୁଜକୁ ନିଜର ବୋଲି ଦାବି କରୁଛନ୍ତି। ଫଳରେ ଏହି ଅଞ୍ଚଳରେ ସୁନା ଖଣିରେ କାମ କରୁଥିବା ଶ୍ରମିକଙ୍କୁ ଘଉଡ଼ାଇବା ପାଇଁ ମିଶର ପକ୍ଷରୁ ଏୟାର ଷ୍ଟ୍ରାଇକ୍ କରାଯାଉଛି।
