ନନ୍ଦିଘୋଷ ବ୍ୟୁରୋ: ପୁଣିଥରେ ହେବ କି ଫ୍ଳାଏଦୁବାଇ ଭଳି ଆକ୍ରମଣ ? ବଡ ଯୋଜନା କରିଛି ଅଲ-କାଏଦା । ପୁଣିଥରେ ଆକ୍ରମଣ କରିବାକୁ ଦେଲା ଚେତାବନୀ । ଫ୍ଲାଏଦୁବାଇରେ ଆକ୍ରମଣ କରିଥିବା ଓମାନି ପାଇଲଟ୍ ହିମାମି-ଅଲ୍-ହାମାମୀର ଭୁରି ଭୁରି ପ୍ରଶଂସା କରିଛି ଅଲ୍-କାଏଦା । ହମାମୀଙ୍କ ବିମାନ କ୍ରାସ କରାଇବାର ପ୍ରୟାସରେ ସେ ବହୁତ ଖୁସି । କେବଳ ସେତିକି ନୁହେଁ, ଭାରତୀୟ ପାଇଲଟ୍ ସ୍ମିତ୍ ମଚ୍ଛାରଙ୍କ ଉପରେ ହୋଇଥିବା ଆକ୍ରମଣ ଉପରେ ମଧ୍ୟ ଅଲ୍-କାଏଦା ଖୁସି ପ୍ରକାଶ କରିଛି । ଅଲ୍-କାଏଦାର ୟେମେନ ବ୍ରାଞ୍ଚ ଏକ ଆର୍ଟିକିଲ୍ ଛପାଇଛି, ଯେଉଁଥିରେ ଓମାନି ପାଇଲଟଙ୍କ ପ୍ରଶଂସା କରିବା ସହିତ ଭବିଷ୍ୟତରେ ଏଭଳି ଆହୁରି ଆକ୍ରମଣ ହେବ ବୋଲି ଖୋଲାଖୋଲି ଧମକ ଦେଇଛି । ଏକ ଜାତୀୟ ଗଣମାଧ୍ୟମର ରିପୋର୍ଟ ମୁତାବକ, ଅଲ୍-କାଏଦାର ୟେମେନ ବ୍ରାଞ୍ଚ ସାପ୍ତାହିକ ପତ୍ରିକା ଅଲ-ବୟାନରେ ଏକ ଲେଖା ପ୍ରକାଶ କରିଛି, ଯେଉଁଥିରେ ଅଲ୍-କାଏଦା ପକ୍ଷରୁ କୁହାଯାଇଛି ଯେ, ‘‘ଯୁଦ୍ଧ ଏପର୍ଯ୍ୟନ୍ତ ଶେଷ ହୋଇନାହିଁ । ଜାୟୋନିଷ୍ଟ, ଆମେରିକୀୟ ଏବଂ ଇସଲାମ ବିରୁଦ୍ଧରେ ଲଢୁଥିବା ବିଭିନ୍ନ ଗୋଷ୍ଠୀର ସେନା ବାହିନୀଙ୍କୁ ନେଇ ଯାଉଥିବା ବିମାନଗୁଡିକ ଏବେବି ଆକାଶରେ ଉଡୁଛି । ସେମାନଙ୍କ ମୁଣ୍ଡ ଉପରେ ଆକ୍ରମଣର ବିପଦ ଘୁରି ବୁଲୁଛି । ଯେଭଳି ସେପ୍ଟେମ୍ବର ୧୧ ଏବଂ ୩୦ରେ ହୋଇଥିଲା, ପୁଣି ଥରେ ସେହିଭଳି ହେବ ।‘‘
ଯଦି ଦେଖିବା ହମାମିଙ୍କର ଅଲ୍-କାଏଦା ସହିତ ପୁରୁଣା କନେକ୍ସନ ରହିଥିବା ନେଇ ଅନେକ ପ୍ରମାଣ ମିଳିଛି । ପୂର୍ବରୁ ଅଲ-ହମାମି ସହ ଜଡିତ ଡିଲିଟ କରାଯାଇଥିବା ସୋସିଆଲ ମିଡିଆ ଆକାଉଣ୍ଟଗୁଡିରେ ଉଗ୍ରବାଦୀ ବିଷୟବସ୍ତୁ ଥିବା ସାମ୍ନାକୁ ଆସିଥିଲା । ଏହି ଆକାଉଣ୍ଟଗୁଡିକରେ କକପିଟ୍ ରୁ ଜୁମ୍ ହୋଇଥିବା ଏଲ୍ ଅଲ୍, ଆର୍କିଆ ବିମାନର ଫୁଟେଜ ସହ ପୂର୍ବତ୍ତନ ଅଲ୍-କାଏଦା ନେତା ଆୟମାନ ଅଲ୍-ଜଓ୍ବାହିରୀ ଏବଂ ୨୦୦୯ ମସିହାରେ ସାତ ଜଣ ସିଆଇଏ କର୍ମଚାରୀଙ୍କୁ ହତ୍ୟା କରିଥିବା ଆତ୍ମଘାତୀ ବିସ୍ଫୋରଣକାରୀଙ୍କ ଫଟୋ ରହିଥିଲା ।
ସୂଚନା ମୁତାବକ, ଅଲ୍-ହମାମିଙ୍କୁ ବିମାନ ଉଡାଣ ଟ୍ରେନିଂ ଆରମ୍ଭ କରିବା ପୂର୍ବରୁ ହିଁ ଓମାନ ଏୟାରରେ ଉଡାଣ ତାଲିମରୁ ହଟାଇ ଦିଆଯାଇଥିଲା । ତାଙ୍କ ଉପରେ ଉଗ୍ରବାଦୀର ଆରୋପ ମଧ୍ୟ ଲାଗିଥିଲା । ତାର ବିଚାରଧାରାକୁ ଆଧାର କରି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା । କିନ୍ତୁ ମାତ୍ର ୮ ମାସ ପରେ ପୁଣିଥରେ ତାଙ୍କୁ ଏୟାରଲାଇନ୍ସରେ ଚାକିରି ମିଳିଯାଇଥିଲା । ଆଉ ତା’ପରେ ସେ ଫ୍ଲାଏଦୁବାଇର ବିମାନକୁ କ୍ରାସ୍ କରିବାକୁ ଚେଷ୍ଟା କରିଥିଲା । କିଛି ରିପୋର୍ଟ ଏହା ମଧ୍ୟ ଦାବି କରିଛନ୍ତି ଯେ, ସେ ତେଲ ଅବିଭରେ ଥିବା ବିଲ୍ଡିଂରେ କ୍ରାସ୍ କରିବାକୁ ଯୋଜନା କରିଥିଲା । କିନ୍ତୁ ଭାରତୀୟ ପାଇଲଟ୍ ଙ୍କ ସାହସିକତା ଯୋଗୁଁ ତାଙ୍କର ସବୁ ଯୋଜନା ପଣ୍ଡ ହୋଇଯାଇଥିଲା ଏବଂ ଶହ ଶହ ଯାତ୍ରୀଙ୍କ ଜୀବନ ମୃତ୍ୟୁ ମୁଖରୁ ଅଳ୍ପକେ ବର୍ତ୍ତିଯାଇଥିଲା ।
