ନନ୍ଦିଘୋଷ ବ୍ୟୁରୋ: ଜମ୍ମୁକାଶ୍ମୀରରେ ସୁରକ୍ଷା ବାହିନୀ ସହ ମୁହାଁମୁହିଁ ସମୟରେ ଏନକାଉଣ୍ଟରରେ ନିହତ ଲକ୍ସର-ଏ-ତୈବା ର ଟପ୍ ଆତଙ୍କବାଦୀ ମହମ୍ମଦ ହାସିଫ ଓରଫ ହାସିମ ମୁସା ସମ୍ପର୍କରେ ଏକ ରୋଚକ ତଥ୍ୟ ସାମ୍ନାକୁ ଆସିଛି । ଯବାନଙ୍କ ଗୁଳିରେ ଆହତ ହୋଇ ଜଙ୍ଗଲରେ ଲୁଚିଥିବା ସମୟରେ ମୁସା ଗୁଳି ବାଜିଥିବା କ୍ଷତର ଚିକିତ୍ସା ପାଇଁ ସେଥିରେ ମହୁର ବ୍ୟବହାର କରୁଥିଲା । କାହିଁକି ନା କ୍ଷତସ୍ଥାନ ଜଲ୍ଦି ଶୁଖିପାରିବ । ମୂସାର ଫୋନରୁ ଏହି ତଥ୍ୟ ମିଳିଥିବା ଜଣାପଡିଛି । ଅଧିକାରୀଙ୍କ କହିବା ମୁତାବକ, ମୁସା ଯିଏ କି ପାକିସ୍ତାନୀ ସେନାର ସ୍ବତନ୍ତ୍ର ଏସଏସଜି ଗ୍ରୁପର ପୂର୍ବତନ କମାଣ୍ଡର ଥିଲା, ସିଏ ପାରମ୍ପରିକ ଆୟୁର୍ବେଦ ପଦ୍ଧତି ବ୍ୟବହାର କରି ନିଜ କ୍ଷତର ଚିକିତ୍ସା କରୁଥିଲା । ସୁଚନା ମୁତାବକ, ଗତ ସପ୍ତାହ ଆରମ୍ଭରେ କାଶ୍ମୀରର ବଡଗାମ ଜିଲ୍ଲାର ୟୁସମାର୍ଗରେ ସେନା ସହିତ ଆମ୍ନାସାମ୍ନି ବେଳେ ଯବାନଙ୍କ ଏନକାଉଣ୍ଟରରେ ହାସିମ ମୁସା ନିହତ ହୋଇଥିଲା । କୁହାଯାଉଛି ଯେ, ମୁସା ଏହି ଅଞ୍ଚଳରେ ନିସିଦ୍ଧ ସଂଗଠନ ଲକ୍ସର-ଏ-ତୈବା ର ମୁଖ୍ୟ ଅପରେସନାଲ କମାଣ୍ଡର ଥିଲା । ପ୍ରାୟ ୧୨ରୁ ଅଧିକ ଆତଙ୍କବାଦୀ ଆକ୍ରମଣରେ ତାର ସମ୍ପୃକ୍ତି ରହିଥିଲା । ୨୦୨୫ରେ ପହଲଗାମର ବୈସାରଣ ଉପତ୍ୟକାରେ ହୋଇଥିବା ଆତାଙ୍କବାଦୀ ଆକ୍ରମଣର ପ୍ରମୁଖ ଷଡଯନ୍ତ୍ରକାରୀ ଥିଲା. ଯେଉଁଥିରେ ପର୍ଯ୍ୟଟକଙ୍କ ସମେତ ୨୬ ଜଣ ଲୋକଙ୍କର ମୃତ୍ୟୁ ହୋଇଥିଲା । ଜମ୍ମୁର ରାଜୌରି ଅଞ୍ଚଳରେ ଅପରେସନ୍ ଶେରୁଓ୍ବାଲୀ ସମୟରେ ଡୋରିମାଲ-ଗମ୍ଭୀର ମୁଗଲା ଅଞ୍ଚଳରେ ଏକ ଏନକାଉଣ୍ଟରରେ ମୁସା ଗୁଳିବିଦ୍ଧ ହୋଇଥିଲା । ଦୁଇ ଆତଙ୍କବାଦୀଙ୍କୁ ଧରିବା ପାଇଁ ପ୍ରାୟ ୪୫ ଦିନରୁ ଅଧିକ ସମୟ ଧରି ଅପରେସନ୍ ଚାଲିଥିଲା । ପରେ ଜଣାପଡିଲା ଯେ, ଛପି ରହିଥିବା ଦୁଇ ଆତଙ୍କୀ ହେଉଛନ୍ତି ମୁସା ଓ ତା’ର ସାଥୀ ୟାସିର । ଯେହେତୁ ସୁରକ୍ଷାବାହିନୀଙ୍କ ଦ୍ବାରା ପୁରା ଅଞ୍ଚଳକୁ ଘେରାବନ୍ଦୀ କରାଯାଇଥିଲା, ଫଳରେ ମୁସାକୁ ଚିକିତ୍ସା ମିଳି ପାରୁନଥିଲା । ତେଣୁ ଲୁଚି ରହିଥିବା ସମୟରେ ମୁସା ତାର କ୍ଷତକୁ ଜଲ୍ଦିରୁ ଜଲ୍ଦି ଠିକ୍ କରିବା ପାଇଁ ଏବଂ ସଂକ୍ରମଣକୁ ଏଡାଇବା ପାଇଁ ସେଥିରେ ମହୁ ଲଗାଉଥଲା ।
ସୂଚନା ଅନୁସାରେ, ସେପ୍ଟେମ୍ବର ଶେଷ ସପ୍ତାହରେ ୟୁସମାର୍ଗର ଉଚ୍ଚ ଅଞ୍ଚଳରେ ୟାସିରର ମୃତ୍ୟୁ ପରେ ମୁସା ପାଖରୁ ଏକ ଫୋନ ଜବତ କରାଯାଇଥିଲା । ଏହି ଫୋନରେ ମୁସା ମହୁ ବ୍ୟବହାର କରି କିଭଳି ଚିକିତ୍ସା କରୁଥିଲା, ତାର ଫଟୋ ମଳିଥିଲା । ଯାହାକୁ ସୀମାପାର ପାକିସ୍ତାନରେ ଥିବା ତାଙ୍କ ହ୍ୟାଣ୍ଡଲରମାନଙ୍କୁ ପଠାଯାଉଥିଲା । ଯାହାଫଳରେ ଏହି ଆତିଙ୍କୀର ସ୍ବାସ୍ଥ୍ୟବସ୍ଥା ସମ୍ପର୍କରେ ସୂଚନା ଦିଆଯାଇପାରିବ । ଆଉ ହ୍ୟାଣ୍ଡଲରମାନେ ମଧ୍ୟ ମୁସାକୁ ଶୁଦ୍ଧ ମହୁ ବ୍ୟବହାର କରିବାକୁ ନିର୍ଦ୍ଦେଶ ଦେଉଥିଲେ । ଯାହଫଳରେ କ୍ଷତ ଅତି ଶୀଘ୍ର ଶୁଖିବାରେ ସାହାର୍ଯ୍ୟ ମିଳିବ । ତେବେ ଚିକିତ୍ସା ବିଶେଷଜ୍ଞଙ୍କ ମତରେ ଆୟୁର୍ବେଦରେ ପୁରୁଣା ସମୟରୁ ହିଁ କ୍ଷତରେ ମହୁ ଲଗାଇବାର ପରମ୍ପରା ରହିଛି । ଏହା ସକ୍ରଂମଣକୁ ରୋକିବା ସହ କ୍ଷତକୁ ଶୀଘ୍ର ଭରିବାରେ ସାହାର୍ଯ୍ୟ କରିଥାଏ ।
