ସାଲେପୁର: ଘରୋଇ କଳିରୁ ମହାଭାରତ । ପ୍ରାପ୍ତ ବୟସରେ ବି ଗଛରେ ବାନ୍ଧି ଅତି ନିର୍ମମ ଭାବରେ ସ୍ତ୍ରୀକୁ ପିଟିଲା ସ୍ୱାମୀ । ବୟସ୍କା ମହିଳା ଜଣଙ୍କ ଚିତ୍କାର କରିବାରୁ ପାଖ ପଡ଼ିଶାଙ୍କ ଦ୍ୱାରା ଉଦ୍ଧାର ହେଲେ ମହିଳା ।
ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି କଟକ ଜିଲ୍ଲା ସାଲେପୁର ଥାନା ଫୋଗଳ ଗାଁରେ । ଏହି ଗାଁର କୁନିଲତା ମଳିକଙ୍କୁ ଘରୋଇ କଳିକୁ କେନ୍ଦ୍ର କରି ଅତି ନିର୍ମମ ଭାବେ ତାଙ୍କ ଘର ଆଗରେ ଥିବା ଚାଖୁଣ୍ଡା ବାନ୍ଧି ତାଙ୍କ ସ୍ୱାମୀ ଧୀର ମଳିକ ପିଟୁଥିବା ବେଳେ ସେ ଚିତ୍କାର କରିବାରୁ ପାଖ ପଡ଼ୋଶୀ କୁନିଲତାଙ୍କୁ ଗଛରୁ ଫିଟାଇ ପୋଲିସକୁ ଖବର ଦେଇଥିଲେ ।
ତେବେ ବିବାହିତ ଝିଅର ଏକ ସାଇକେଲ ଧୀର ମଳିକ ନଫେରାଇ ତାକୁ ବନ୍ଧା ପକାଇ ଦେଇଥିଲେ । ବନ୍ଧା ପଇସାରେ ଧୀର ମଦ ପିଇଦେଇଥିବାର ଜାଣି ସ୍ତ୍ରୀ ସାଇକେଲଟିକୁ ମୁକୁଳେଇ ଝିଅକୁ ଫେରାଇ ଦେବାକୁ କହିଥିଲେ । ବାରମ୍ବାର ସ୍ତ୍ରୀର ସେହି କଥାକୁ ଶୁଣି ବିରକ୍ତ ହୋଇ ଧୀର ସ୍ତ୍ରୀକୁ ଗଛରେ ବାନ୍ଧି ଜୀବନରୁ ମାରିଦେବା ପାଇଁ ଉଦ୍ୟମ କରିଥିଲେ ।
ଏନେଇ କୁନିଲତା ଅଭିଯୋଗ ମଧ୍ୟ କରିଥିଲେ । ଅନ୍ୟପଟେ ଗ୍ରାମବାସୀ ମଧ୍ୟ ଧୀର ମଳିକ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବା ପାଇଁ ପୋଲିସକୁ ଅନୁରୋଧ କରିବାରୁ ପୋଲିସ ଧୀରକୁ ଗିରଫ କରିଛି ।
