ଓଡ଼ିଶାରେ ସାଇବର୍ ଠକେଇର ନୂଆ ଟ୍ରେଣ୍ଡ ଜୁସ୍ ଜ୍ୟାକିଂ, ସର୍ବସାଧାରଣରେ ଫୋନ୍ ଚାର୍ଜ କରୁଥିଲେ ସାବଧାନ୍

ଭୁବନେଶ୍ୱର: ଆପଣ ବାହାର ସ୍ଥାନରେ ଅର୍ଥାତ୍ ବିମାନ ବନ୍ଦର, ରେଳ ଷ୍ଟେସନ, କଫି ସପ୍, ବସଷ୍ଟାଣ୍ଡ ଏବଂ ସପିଂ ମଲରେ ଫୋନ୍ ଚାର୍ଜ କରୁଛନ୍ତି କି ? ତେବେ ଏଣିକି ସାବଧାନ୍ ହୋଇଯାଆନ୍ତୁ । କାରଣ ଆପଣଙ୍କ ଫୋନ୍ ଚାର୍ଜ ହେଉଥିବା ବେଳେ ଆପଣଙ୍କର ସମସ୍ତ ଡାଟା ଚୋରି ହୋଇଯିବାର ଯଥେଷ୍ଟ ସମ୍ଭାବନା ରହିଛି । କିଛିଦିନ ତଳେ ଓଡ଼ିଶାର ଜଣେ ବ୍ୟକ୍ତିଙ୍କ ସହ ଏଭଳି ହୋଇଛି ।

ଶିକ୍ଷାବିତ୍ ରଘୁନାଥ ପଣ୍ଡା ତାଙ୍କର ଜଣେ ଛାତ୍ରଙ୍କ ପୁଅର ବାହାଘରରେ ଯୋଗଦେବାକୁ ମୁମ୍ବାଇର ଲୁନାଭଲା ଯାଇଥିବା ବେଳେ ସେ ବାହାର ସ୍ଥାନରେ ଚାର୍ଜ କରିଥିଲେ । ଏହାପରେ ତାଙ୍କର କଣ୍ଟାକ୍ଟ ଡିଟେଲ୍ଟ ନେଇ ହ୍ୟାକର ତାଙ୍କର ୫୦ରୁ ଅଧିକ ସହଯୋଗୀଙ୍କୁ ହ୍ୱାଟ୍ସଆପରେ ମେସେଜ୍ ପଠାଇଥିଲେ । ଏଥିରେ ଉଲ୍ଲେଖଥିଲା ଯେ, ଶିକ୍ଷାବିତ ଜଣଙ୍କ ଆମେରିକାରେ ଅଛନ୍ତି ଏବଂ ତାଙ୍କ ସ୍ୱାସ୍ଥ୍ୟବସ୍ଥା ଖରାପ ଅଛି, ତୁରନ୍ତ ଅର୍ଥ ଦେଲେ ସେ ସୁସ୍ଥ ହେବେ ।

ଏଭଳି ୫୦ରୁ ଅଧିକ ବନ୍ଧୁ ଓ ପରିଜନକୁ ସେ ମ୍ୟାସେଜ୍ ପଠାଇଥିଲେ । ମାତ୍ର ଜଣଙ୍କର ସନ୍ଦେହ ହେବାରୁ ସେ ଶିକ୍ଷାବିତଙ୍କୁ ଫୋନ୍ କରି ପଚାରିବାକୁ ସେ ଏହାକୁ ଖଣ୍ଡନ କରିଥିଲେ । ପରେ ଫୋନର ପାସଓ୍ବାର୍ଡ ପରିବର୍ତ୍ତନ କରିବାକୁ ହ୍ୟାକର ବହୁ ପ୍ରୟାସ କରିଥିଲେ ମଧ୍ୟ ଏହା IOS ଫୋନ୍ ହୋଇଥିବାରୁ ପାସଓ୍ୱାର୍ଡ ପରିବର୍ତ୍ତନ କରିବା ସହଜ ହୋଇନଥିଲା । ପରେ ସେ ସାଇବର୍ ଥାନାରେ ଅଭିଯୋଗ କରିଥିଲେ ।

ଜଣାପଡ଼ିଛି ଯେ, ସଂପୃକ୍ତ ହ୍ୟାକର ହ୍ୱାଟ୍ସଆପରେ ଦେଇଥିବା ବ୍ୟାଙ୍କ ଆକାଉଣ୍ଟ ନମ୍ବର ମୁମ୍ବାଇରେ ଥିବା କୋଟାକ୍ ମହିନ୍ଦ୍ରା ବ୍ରାଞ୍ଚର । ତେବେ ବିଦେଶରୁ ଏଭଳି କାରବାର ହେଉଥିବା ଜଣାପଡ଼ିଥିଲା । ତେଣୁ ଏଭଳି ସାଇବର୍ ଠକେଇକୁ ଜୁସ୍ ଜ୍ୟାକିଂ କୁହାଯାଇଛି । ପବ୍ଲିକ୍ ପ୍ଲେସରେ ଥିବା ୟୁଏସବି ପଏଣ୍ଟରେ ଚାର୍ଜ କଲେ ସେମାନେ ଡାଟା ସହଜରେ ହାସଲ କରୁଛନ୍ତି । ଏହାସହିତ ଫୋନରେ ସେଭ୍ ଥିବା ସମସ୍ତ ଆକାଉଣ୍ଟ ନମ୍ବର ଏବଂ ସପିଂ ଡିଟେଲ୍ଟ ମଧ୍ୟ ପାଇପାରୁଛନ୍ତି ।

ଏପରିକି ସବୁ ଫଟୋ, ବ୍ୟାଙ୍କିଂ ହିଷ୍ଟ୍ରି, ସପିଂ ଡିଟେଲ୍ଟ, ବିଲ୍ ପେମେଣ୍ଟ ଓ ବହୁ କିଛି ସେମାନେ ନେଇଯାଉଛନ୍ତି । ଏହାକୁ ଷ୍ଟଡି କରିବା ପରେ ସେମାନେ ବିଛାନ୍ତି ଠକାମିର ଜାଲ । କେତେବେଳେ ଅନଲାଇନ୍ ମାଧ୍ୟମରେ ବ୍ୟାଙ୍କ ଆକାଉଣ୍ଟ ନମ୍ବର ଏବଂ ଅନ୍ୟାନ୍ୟ ସାମଗ୍ରୀ ବ୍ୟବହାର କରି ଲୁଟିଥାନ୍ତି ତ ଆଉ କେତେବେଳେ ସହଯୋଗୀଙ୍କୁ ଠକିଥାନ୍ତି । ୨୦୧୧ରେ ଆମେରିକାରେ ପ୍ରଥମେ ଜୁସ୍ ଜ୍ୟାକିଂ ହ୍ୟାକିଂ ସଂପର୍କରେ ରିପୋର୍ଟ କରିଥିଲେ ଜଣେ ବ୍ୟକ୍ତି ।

ଏଥିରୁ ବର୍ତ୍ତିବାକୁ ହେଲେ, ଯଦି ଆପଣ ବାହାର ସ୍ଥାନରେ ଚାର୍ଜ କରୁଛନ୍ତି ତେବେ ଫୋନକୁ ସୁଇଚ୍ ଅଫ୍ କରି ଚାର୍ଜ କରନ୍ତୁ । ନହେଲେ ପାଖରେ ସର୍ବଦା ପାଓ୍ୱାର ବ୍ୟାଙ୍କ ରଖିଥାନ୍ତୁ । ପାଓ୍ବାର ବ୍ୟାଙ୍କକୁ ଚାର୍ଜ କରିବା ପରେ ସେଥିରୁ ଫୋନ୍ ଚାର୍ଜ କରିବେ । ଏହା ନହେଲେ କନେକ୍ଟର ସାଙ୍ଗରେ ରଖିଥାନ୍ତୁ ।

ୟୁଏସବି ପ୍ଲଗରେ କନେକ୍ଟର ପ୍ଲଗ୍ ଇନ୍ କରି ଚାର୍ଜ କରିପାରିବେ । ଚନେଚ୍ ସବୁଠି ନିଜର ଚାର୍ଜର ବ୍ୟବହାର କରି ଫୋନ୍ ଚାର୍ଜ କରନ୍ତୁ । ଏଭଳି କଲେ ହିଁ ଏ ଠକଙ୍କ କବଳରୁ ଆପଣ ମୁକ୍ତି ପାଇପାରିବେ ।