ନନ୍ଦିଘୋଷ ବ୍ୟୁରୋ : ପଡୋଶୀ ପାକିସ୍ତାନରେ ରାଜେନୖତିକ ସଙ୍କଟ ଏବେ ଚରମ ସୀମାରେ ପହଁଚିଛି । ଦିନକୁ ଦିନ ପାକିସ୍ତାନର ଶହବାଜ ସରିଫ ସରକାର ଏବଂ ଇମ୍ରାନ ଖାନ୍ ଙ୍କ ପାର୍ଟି ମଧ୍ୟରେ ବିବାବ ବଢି ବଢି ଚାଲିଛି । ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ମୁକ୍ତି ଦାବିରେ ପିଟିଆଇ ପକ୍ଷରୁ ଅକ୍ଟୋବର ୪ରେ ଇସଲାମାବାଦ ଅଭିମୁଖେ ଏକ ବିଶାଳ ମାର୍ଚ୍ଚ କରିବାକୁ ଘୋଷଣା କରିଛି । ଯାହାକୁ ନେଇ ଏବେ ପାକିସ୍ତାନ ରାଜନୀତିରେ ହଲଚଲ ସୃଷ୍ଟି ହୋଇଛି । ଆଉ ସ୍ଥିତି ଏପରି ହୋଇଛି ଯେ, ପ୍ରଧାନମନ୍ତ୍ରୀ ଶେହବାଜ ସରିଫଙ୍କ ନେତୃତ୍ବାଧୀନ କେନ୍ଦ୍ର ସରକାର ଏବେ ପିଟିଆଇ ଶାସିତ ଖାଇବର ପଖତୁନଖ୍ବାରେ ଜରରୁୀକାଳୀନ ପରିସ୍ଥିତି କିମ୍ବା ରାଜ୍ୟପାଳ ଶାସନ ଲାଗୁ କରିବା ପାଇଁ ଗମ୍ଭୀରତାର ସହ ବିଚାର କରୁଛନ୍ତି । ପାକିସ୍ତାନ ଗଣମାଧ୍ୟମର ସୂଚନା ମୁତାବକ, ପିଟିଆଇର ଏହି ଇସଲାମାବାଦ ମାର୍ଚ୍ଚକୁ ରୋକିବା ପାଇଁ ଏବଂ କେପିକେ ପ୍ରଦେଶରେ ଆଇନ ଶୃଙ୍ଖଳା ନିୟନ୍ତ୍ରଣ କରିବାକୁ ପ୍ରଧାନମନ୍ତ୍ରୀ ଉଚ୍ଚସ୍ତରୀୟ ଜରୁରୀ ବୈଠକ ଡକାଇଛନ୍ତି । ଏହି ବୈଠକରେ ଗୃହମନ୍ତ୍ରୀ ମୋହସିନ ନକବି, ଆଇନ ମନ୍ତ୍ରୀ ଆଜମ ନଜିର ତରାରା ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀ ଉପସ୍ଥିତ ଥିଲେ ।
ପାକିସ୍ତାନ ମୁସଲିମ ଲିଗ୍ ନଓ୍ବାଜ ନେତା ଓ ମନ୍ତ୍ରୀ ତାରିକ ଫଜଲ ଚୌଧରୀଙ୍କ କହିବା ମୁତାବକ, ସମ୍ବିଧାନ ଧାରା ୨୩୨ ଅନୁଯାୟୀ ଖାଇବର ପଖତୁନଖ୍ବାରେ ଜରରୁୀକାଳୀନ ପରିସ୍ଥିତି ଘୋଷଣା କରିବା ବିକଳ୍ପ ଉପରେ ଆଲୋଚନା ଚାଲିଛି । ସେଠାରେ ବଢୁଥିବା ଆତଙ୍କବାଦକୁ ନଜରରେ ରଖି ଏଭଳି କରିବାକୁ ଯୋଜନା ଚାଲିଥିବା କୁହାଯାଉଛି । କେନ୍ଦ୍ର ସରକାରଙ୍କ ଅଭିଯୋଗ ଯେ, କେପି ମୁଖ୍ୟମନ୍ତ୍ରୀ ସୋହେଲ ଆଫ୍ରିଦି ଆତଙ୍କବାଦକୁ ରୋକିବାରେ ବିଫଳ ହୋଇଛନ୍ତି ଏବଂ ପ୍ରେଦଶର ସମ୍ବଳକୁ ଆାତଙ୍କବାଦ ବିରୋଧରେ ବ୍ୟବହାର ନକରି କେବଳ ଇସଲାମାବାଦ ମାର୍ଚ୍ଚ ପାଇଁ ବ୍ୟବହାର କରୁଛନ୍ତି । ଅନ୍ୟପଟେ କେପି ମୁଖ୍ୟମନ୍ତ୍ରୀ କିନ୍ତୁ ନିଜ ଜିଦରେ ଅଟଳ ଅଛନ୍ତି । ସେ ସ୍ପଷ୍ଟ କରିଛନ୍ତି ଯେ କୌଣସି ପରିସ୍ଥିତିରେ ବି ଅକ୍ଟୋବର ୪ରେ ଏହି ଶାନ୍ତିପୂର୍ଣ୍ଣ ମାର୍ଚ୍ଚ ବନ୍ଦ ହେବ ନାହିଁ । ଏହି ଉତ୍ତେଜନାପୂର୍ଣ୍ଣ ସ୍ଥିତିକୁ ଦେଖି ପାକିସ୍ତାନ ସରକାର ଇସଲାମାବାଦ୍ ସୀମାକୁ ସମ୍ପୂର୍ଣ୍ଣ ସିଲ୍ କରିବା ସହ ହଜାର ହଜାର ସୁରକ୍ଷାକରର୍ମୀ ଓ କଣ୍ଟେନର ମୁତୟନ କରିଛନ୍ତି ।
ତେବେ ବର୍ତ୍ତମାନ ପାଇଁ କେନ୍ଦ୍ର ସରକାର ପିଟିଆଇକୁ ଆଉ ଏକ ସୁଯୋଗ ଦେବାକୁ ଚାହୁଁଛନ୍ତି ଏବଂ ତୁରନ୍ତ ଜରୁରୀକାଳୀନ ପରିସ୍ଥିତି ଲାଗୁ ନକରି ସ୍ଥିତି ଉପରେ ନଜର ରଖିଛନ୍ତି । ହେଲେ ଯଦି ଅକ୍ଟୋବର ୪ରେ ଏହି ମାର୍ଚ୍ଚ ଇସଲାମାବାଦ ଆଡକୁ ଅଗ୍ରସର ହୁଏ, ତାହା ହେଲେ ପାକିସ୍ତାନରେ ଏକ ବଡ ଧରଣର ସାମ୍ବିଧାନିକ ଓ ରାଜେନୖତିକ ସଂକଟ ଦେଖିବାକୁ ମିଳିପାରେ ।
