ବ୍ଲାକ ଡେଥ୍ ରୁ କରୋନା: ମହାମାରୀର କଳା ଇତିହାସ

ମହାମାରୀ…ଏହି ଶବ୍ଦର ଆବଶ୍ୟକତା କଣ ପାଇଁ । କୈାଣସି ଏକ ନିର୍ଦ୍ଦିଷ୍ଟ ସମୟ ଅବଧି ଭିତରେ ଏବଂ ନିର୍ଦ୍ଦିଷ୍ଟ ଅଞ୍ଚଳରେ ହେଉଥିବା ସାମୂହିକ ମୃତ୍ୟୁକୁ ମହାମାରୀ ବୋଲି ବିବେଚନା କରାଯାଏ । ଅବଶ୍ୟ ସେଥିପାଇଁ କୈାଣସି ନିର୍ଦ୍ଦିଷ୍ଟ କାରଣକୁ ଉଲ୍ଲେଖ କରିବା ହୁଏତ ସମୀଚିନ ହେବନାହିଁ । ଭୟଙ୍କର ରୋଗ, ସଂକ୍ରମଣ କିମ୍ବା ପ୍ରାକୃତିକ କାରଣରୁ ବହୁଳ ସଂଖ୍ୟାରେ ମୃତ୍ୟୁ ହେଲେ ତାକୁ ମହାମାରୀ ରୂପ ଦିଆଯାଏ । ଅବଶ୍ୟ ଏହାର ସଂଜ୍ଞା ନିରୂପଣ କରିବାକୁ ପୂର୍ବରୁ କୈାଣସି ବ୍ୟବସ୍ଥା ନଥିଲେ ମଧ୍ୟ ସେହି ସମୟରେ ଏସବୁ ମୃତ୍ୟୁ ହାର କେତେ ଯେ ଭୟଙ୍କର ଥିଲା ତାକୁ ବର୍ଣ୍ଣନା କରିବା ଅସମ୍ଭବ ।

ଇତିହାସରେ ଏମିତି ଅନେକ ମହାମାରୀ ସମ୍ପର୍କରେ ଉଲ୍ଲେଖ ରହିଛି । ଅନେକ ମହାମାରୀର କାରଣ ମଧ୍ୟ ସେଭଳି ଭିନ୍ନ ଆଉ ସେଗୁଡିର ପରିଣାମ ମଧ୍ୟ ସେହି ହିସାବରେ ଭୟଙ୍କର । ଅବଶ୍ୟ ଅନେକ ମହାମାରୀର କାରଣ ଆଉ ପରିଣାମ ସମ୍ପର୍କରେ କୈାଣସି ତଥ୍ୟ ମଧ୍ୟ ମିଳିପାରିନି । ଇତିହାସ ମୁ୍ତାବକ ୫୪୧ ଖ୍ରୀଷ୍ଟାବ୍ଦରେ ବିଶ୍ବରେ ହୋଇଥିବା ମହାମାରୀକୁ ପ୍ରଥମେ ଅଧିକୃତ ମାନ୍ୟତା ମିଳିଥିଲା ।

ଏହି ମହାମାରୀ ପ୍ରଥମେ ଆଫ୍ରିକାରେ ଆରମ୍ଭ ହୋଇଥିଲେ ମଧ୍ୟ ସଂକ୍ରମିତ ମୂଷାଙ୍କ ଦ୍ଵାରା ବିଶ୍ବର ବିଭିନ୍ନ ସ୍ଥାନକୁ ବ୍ୟାପି ଯାଇଥିଲା । ୟୁରୋପରେ ଏହା ବ୍ୟାପିଥିବାବେଳେ ଏହାକୁ ପ୍ଲେଗ୍‌ ଅଫ୍‌ ଜଷ୍ଟିନିଆନ ବୋଲି ମଧ୍ୟ କୁହାଯାଏ । ଏହି ମହାମାରୀ ଏତେ ଭୟାନକ ଥିଲା ଯେ ରୋମର ବାଇଜାଣ୍ଟିନ ସମ୍ରାଟ ଜଷ୍ଟିନିଆନ ମଧ୍ୟ ଏହାଦ୍ଵାରା ଆକ୍ରାନ୍ତ ହୋଇଥିଲେ ଏବଂ ତାଙ୍କ ନାମାନୁସାରେ ଏହାର ନାମକରଣ ହୋଇଛି ।

ଏହି ମହାମାରୀ କାରଣରୁ ୟୁରୋପରେ ଅନେକ ଲୋକଙ୍କ ମୃତ୍ୟୁ ହୋଇଥିଲା । ସ୍ଥିତି ଏମିତି ହୋଇଥିଲା ଯେ ଯେଉଁ ସହରରେ ଏହା ଆରମ୍ଭ ହେଉଥିଲା ସେଠାରେ ପ୍ରାୟ ସମସ୍ତଙ୍କ ମୃତ୍ୟୁ ହେଉଥିଲା । ରୋମର କନଷ୍ଟାନିପୋଲ ସହରର ରାସ୍ତାଘାଟରେ ସଂକ୍ରମିତଙ୍କ ମୃତଦେହ ପଡି ରହିଥିଲା । ଏମିତିକି ପ୍ରତିଦିନ ପ୍ରାୟ ୧୦ ହଜାର ଲୋକଙ୍କ ମୃତ୍ୟୁ ହେଉଥିବାବେଳେ ଏହି କାରଣରୁ  କେବଳ ୟୁରୋପରେ ହିଁ ୨.୫ କୋଟି ଲୋକଙ୍କ ମୃତ୍ୟୁ ହୋଇଥିଲା ।

୧୩୪୭ ମସିହା ବେଳକୁ ବିଶ୍ବରେ ଆଉ ଏକ ମହାମାରୀ The Black Death ତାର ଭୟଙ୍କର ଲୀଳା ଦେଖାଇଥିଲା । ଏହି ମହାମାରୀ ଯୋଗୁଁ ସାରା ବିଶ୍ବରେ ଅନେକ ଲୋକଙ୍କ ମୃତ୍ୟୁର କାରଣ ହୋଇଥିଲା । ଇଟାଲୀର କେତେକ ନାବିକଙ୍କ ଦ୍ଵାରା ଏହି ମହାମାରୀ ଭୂତାଣୁ ୟୁରୋପରେ ପହଞ୍ଚିଥିଲା । ୫ ବର୍ଷ ପର୍ଯ୍ୟନ୍ତ ଏହି ମହାମାରୀର ଭୟାବହତା ଯ଼ୁରୋପର କେତେକ ଦେଶରେ ଦେଖିବାକୁ ମିଳିଥିଲା ଏବଂ ଏହାର ପ୍ରଭାବରେ କେତେକ ସହର ସମ୍ପୂର୍ଣ୍ଣ ଭାବରେ ନିଶ୍ଚିହ୍ନ ହୋଇଯାଇଥିଲା ।

ସେହି ସମୟରେ ଚିକିତ୍ସା ବିଜ୍ଞାନ ସେତେଟା ଉନ୍ନତ ନଥିଲା ଏବଂ ଲୋକେ କେମିତି ଏହାର ଶିକାର ହେଉଥିଲେ ଏବଂ ଏହାଦ୍ଵାରା କେମିତି ସେମାନଙ୍କ ଜୀବନ ଚାଲିଯାଉଥିଲା ତାହା ବୁଝିବା ମଧ୍ୟ ଲୋକଙ୍କ ପାଇଁ କଷ୍ଟକର ଥିଲା । ଏହା ଭଗବାନଙ୍କ କ୍ରୋଧ ବୋଲି ସେମାନେ ମନେ କରୁଥିଲେ । ତେବେ ୧୩୫୩ ବେଳକୁ ବ୍ଲ।କ୍‌ ଡେଥ୍‌ର ପ୍ରକୋପ ଶାନ୍ତ ହୋଇଥିଲା ଏବଂ ସେତେବେଳକୁ ବିଶ୍ବରେ ପ୍ରାୟ ୫ କୋଟି ଲୋକଙ୍କ ମୃତ୍ୟୁ ହୋଇସାରିଥିଲା ।

ଏହାପରେ ଇଟାଲୀୟ ମହାମାରୀ ମଧ୍ୟ ବିଶ୍ବରେ ଅନେକ ଧ୍ବଂସଲୀଳା ଖେଳାଇଥିଲା । ୧୬୨୯ରେ ଆରମ୍ଭ ହୋଇଥିବା ଏହି ମହାମାରୀ ୨ ବର୍ଷ ପର୍ଯ୍ୟନ୍ତ ସକ୍ରିୟ ରହିଥିଲା ଏବଂ ଇଟାଲୀର ପ୍ରମୁ୍ଖ ସହର ଗୁଡିତ ସମ୍ପୂର୍ଣ୍ଣ ଭାବରେ ଧ୍ବଂସ ହୋଇଯାଇଥିଲା । ଏହାର ମୁକାବିଲା ତଥା ପ୍ରତିକାର କରିବାକୁ ଇଟାଲୀ ସରକାର ଅନେକ ଲୋକଙ୍କୁ ଘର ଭିତରେ ହିଁ ବନ୍ଦ ରଖିଥିଲେ ଏବଂ ଅନେକ ଆକ୍ରାନ୍ତୁ ଏକ ନିର୍ଜନ ଦ୍ୱୀପରେ ଛାଡି ଦେଇଥିଲେ । ତଥାପି ଏହାର ପ୍ରଭାବରେ ଇଟାଲୀର ବିଭିନ୍ନ ସହରରେ ପ୍ରାୟ ୫ ଲକ୍ଷ ଲୋକଙ୍କ ମୃତ୍ୟୁ ହୋଇଥିଲା ।

ବିଶ୍ୱର ଆଉ ଏକ ମହାମାରୀ ଲଣ୍ଡନ ସହରରେ ବ୍ୟାପକ ହୋଇଥିଲା । ଷୋଡ଼ଷ ଶତାବ୍ଦୀରେ ଲଣ୍ଡନରେ ବିଭିନ୍ନ ରୋଗ ସଂକ୍ରମଣ ଦେଖାଦେଇଥିଲେ ମଧ୍ୟ ୧୬୬୫ରେ ଆରମ୍ଭ ହୋଇଥିବା ପ୍ଲେଗ୍‌ ଅଫ୍‌ ଲଣ୍ଡନ ବେଶ୍‌ ଭୟାବହ ଥିଲା । ସେପ୍ଟେମ୍ବର ମାସରେ ଏହି ମହାମାରୀ ଆରମ୍ଭ ହୋଇଥିବାବେଳେ ଲଣ୍ଡନ ସହରରେ ପ୍ରତି ସପ୍ତାହରେ ପ୍ରାୟ ୮ ରୁ ୧୦ ହଜାର ଲୋକଙ୍କ ମୃତ୍ୟୁ ହେଉଥିଲା ।

ଏହା ଦ୍ଵାରା ଲଣ୍ଡନରେ ରହୁଥିବା ଲୋକେ ଏତେ ଭୟଭୀତ ହୋଇଥିଲେ ଯେ ସମସ୍ତେ ଦେଶ ଛାଡି ଅନ୍ୟତ୍ର ପଳାୟନ କରିଥିଲେ । ଏମିତିକି ରାଜା ଚାର୍ଲସ ଦ୍ୱିତୀୟ ମଧ୍ୟ ଲଣ୍ଡନ ଛାଡି ଅନ୍ୟ ଦେଶକୁ ପଳାଇ ଯାଇଥିଲେ । ତେବେ ଯେଉଁ ମାନଙ୍କ ପାଖରେ ଟଙ୍କା ପଇସା ଥିଲା କିମ୍ବା ଧନୀ ଲୋକମାନେ ବାହାର ଦେଶକୁ ପଳାଇଥିଲେ ।

ଲଣ୍ଡନରେ କେବଳ ଗରିବ ଲୋକ ରହି ଯାଇଥିଲେ ଏବଂ ସେମାନେ ମହାମାରୀ ଯୋଗୁଁ ମୃତ୍ୟୁ ମୁଖରେ ପଡିଥିଲେ । ଯେଉଁ ମାନେ ଏହି ମହାମାରୀ ଦ୍ଵାରା ସଂକ୍ରମିତ ହେଉଥିଲେ ସେମାନଙ୍କୁ ଇଂଲଣ୍ଡ ରାଜା ଘର ଭିତରେ ହିଁ ବନ୍ଦ କରି ଦେଇଥିଲେ । ତେବେ ସେଠାରେ ମଧ୍ୟ ଲକ୍ଷାଧିକ ଲୋକଙ୍କ ମୃତ୍ୟୁ ହୋଇଥିଲା ।

ପଶ୍ଚିମ ୟୁରୋପରେ ୧୭୨୦ ମସିହାରେ ଫ୍ରାନ୍ସରେ ଏକ ମହାମାରୀ ମାର୍ଶାଲେ ଭୟାନକ ରୂପ ଧାରଣ କରିଥିଲା । ଗ୍ରାଣ୍ଡ ସେଣ୍ଟ ଆଣ୍ଟୋନି ନାମ ଏକ ଜାହାଜରେ ଏହି ମହାମାରୀ ୟୁରୋପରେ ପହଞ୍ଚିଥିଲା ବୋଲି ସନ୍ଦେହ କରାଯାଏ ।  ଏହି ଜାହାଜରେ କିଛି ସଂକ୍ରମିତ ବ୍ୟକ୍ତି ଥିଲେ ଏବଂ ସେମାନେ ମଧ୍ୟ ପ୍ରାଚ୍ୟ ଦେଶର ଆସିଥିଲେ । ତେବେ ଏହି ସଂକ୍ରମଣ ସମ୍ପର୍କରେ ଜଣାପଡିବା ପରେ ଜାହାଜରେ ଥିବା ସମସ୍ତ ଲୋକଙ୍କୁ  ଅନ୍ୟତ୍ର ଏକାନ୍ତରେ ରହିବାର ବନ୍ଦୋବସ୍ତ କରାଯାଇଥିଲା । ତେବେ ଏହି ଜାହାଜର ମାଲିକ ତଥା ମାର୍ଶାଲେର ମେୟର ଜାହାଜରେ ଥିବା ସାମଗ୍ରୀକୁ ଓହ୍ଲାଇବା ପାଇଁ ଅନୁମତି ହାସଲ କରିଥିଲେ । ତେବେ ଜାହାଜର ସାମଗ୍ରୀ ସହ କେତେକ ସଂକ୍ରମିତ ମୂଷା ଫ୍ରାନ୍ସ ସହରରେ ପ୍ରବେଶ କରିଥିଲେ ଏବଂ ପରେ ସେମାନେ ହିଁ ଏହି ଭୟଙ୍କର ମହାମାରୀର କାରଣ ହୋଇଥିଲେ । ଏହି କାରଣରୁ ଫ୍ରାନ୍ସରେ ପ୍ରତିଦିନ ହଜାର ହଜାର ଲୋକଙ୍କ ମୃତ୍ୟୁ ହୋଇଥିଲା ଏବଂ ୧୭୨୨ରେ ଏହି ମହାମାରୀ ସରିବା ବେଳକୁ ପ୍ରାୟ ୧୧ ଲକ୍ଷ ଲୋକଙ୍କ ମୃତ୍ୟୁ ହୋଇସାରିଥିଲା ।

ତେବେ ୧୮୫୫ରେ ଚୀନର ଯ଼ୁନାନ ସହରରେ ଆରମ୍ଭ ହୋଇଥିଲା ଆଉ ଏକ ଭୟଙ୍କର ମହାମାରୀ । ତେବେ ଖୁବଶୀଘ୍ର ଏହା ସାରା ବିଶ୍ବରେ ବ୍ୟାପି ଯାଇଥିଲା ଏବଂ ୬ଟି ମହାଦେଶ ଏଥିରେ ଆକ୍ରାନ୍ତ ହୋଇଥିଲେ । ଏହି ମହାମାରୀ ବ୍ୟାପିବାର କାରଣ ମଧ୍ୟ ଥିଲେ ମୂଷା । ସଂକ୍ରମିତ ମୂଷା ବିଭିନ୍ନ ଜାହାଜରେ ବିଶ୍ବର ବିଭିନ୍ନ ଦେଶରେ ପହଞ୍ଚିଥିଲେ ଏବଂ ସେସବୁ ସ୍ଥାନରେ ରଚାଇଥିଲେ ମୃତ୍ୟୁର ତାଣ୍ଡବଲୀଳା । ଏହି ମହାମାରୀରେ ସାରା ବିଶ୍ବରେ ପ୍ରାୟ ଦେଢ଼ କୋଟି ଲୋକଙ୍କ ମୃତ୍ୟୁ ହୋଇଥିବାବେଳେ ଚୀନ ଏବଂ ଭାରତରେ ଏହାର ବିଶେଷ ପ୍ରଭାବ ଦେଖିବାକୁ ମିଳିଥିଲା ।

ତେବେ ଏହାଦ୍ଵାରା ବିଶ୍ବର ପ୍ରମୁ୍ଖ ଦେଶ ପ୍ରଭାବିତ ହୋଇଥିଲେ ମଧ୍ୟ ଚିକିତ୍ସା ବିଜ୍ଞାନକୁ ଏହାଦ୍ଵାରା ଅନେକ ଲାଭ ହୋଇଥିଲା । ୧୮୯୪ରେ ହଂକଂର ଏକ ଡାକ୍ତର ଆଲେକଜାଣ୍ଡାର ୟେରସିନ୍‌ ମାରାତ୍ମକ ବେସିଲିଆ ୟେରସିନିଆ ପେଷ୍ଟିସ ଭୂତାଣୁକୁ ଚିହ୍ନଟ କରିଥିଲେ । ଏହାଦ୍ଵାରା ପ୍ଲେଗ୍‌ ଏବଂ ମହାମାରୀ ବ୍ୟାପିବାର ପ୍ରମୁ୍ଖ କାରଣ ସମ୍ପର୍କରେ ଜଣାପଡ଼ିଥିଲା । ଏହାପରେ ଆଉ ଜଣେ ଡାକ୍ତର ମଧ୍ୟ ଏହାକୁ ସତ୍ୟ ବୋଲି ପ୍ରମାଣ କରିଥିଲେ । ବିଶ୍ବରେ ଦେଖାଦେଇଥିବା ପ୍ରମୁ୍ଖ ଭୟଙ୍କର ମହାମାରୀ ମୂଷା ଦ୍ଵାରା ବ୍ୟାପୁଥିଲା ବୋଲି ପ୍ରମାଣିତ ହୋଇଥିଲା । ଫଳରେ ମଣିଷକୁ ଏହାର ପ୍ରତିକାର ଏବଂ ପ୍ରତିଷେଧକ ପ୍ରସ୍ତୁତ କରିବାରେ ବିଶେଷ ସହାୟକ ହୋଇଥିଲା ।

ବର୍ତ୍ତମାନର ସମୟରେ ଚିକିତ୍ସା ବିଜ୍ଞାନ ଯଥେଷ୍ଟ ଉନ୍ନତି କରିସାରିଛି ଏବଂ ବିଭିନ୍ନ ମହାମାରୀର ମୁ୍କାବିଲା ପାଇଁ ଅନେକ ଡାକ୍ତରୀ ଔଷଧ ଉଦ୍ଭାବିତ ହୋଇସାରିଛି । ତେଣୁ ବର୍ତ୍ତମାନ ସମୟରେ ହୁଏତ କୈାଣସି ମହାମାରୀ ସେତେଟା ମାରାତ୍ମକ ହୋଇନପାରେ

ପୃଥିବୀରେ ବିଭିନ୍ନ ସମୟରେ ଅନେକ ମହାମାରୀ ଭୟଙ୍କର ରୂପ ଧାରଣ କରିଛନ୍ତି । ସେମାନଙ୍କ ମଧ୍ୟରୁ ଅନେକ ମହାମାରୀର ବାହକ ମୂଷା ବୋଲି ପ୍ରମାଣିତ ହୋଇଛି । ତେବେ ଏହାଛଡା ମଧ୍ୟ ଅନେକ ମହାମାରୀ ବିଶ୍ବରେ ଆତଙ୍କ ଖେଳାଇଥିଲେ ଯାହାର କାରଣ କିଛି ଭିନ୍ନ ଥିଲା । ସେମାନଙ୍କ ମଧ୍ୟରେ ୧୯୧୮ର ଫ୍ଲୁ ମହାମାରୀର ବିନାଶ ଲୀଳା କଥା ମନେ ପଡ଼ିଲେ ଏବେବି ଦେହ ଶିତେଇ ଉଠେ ।

ମୁଖ୍ୟତଃ ସ୍ପେନିଶ ଫ୍ଲୁ ନାମରେ ଜଣାଶୁଣା ଏହି ମହାମାରୀ H1N1 ଭୂତାଣୁ ଦ୍ଵାରା ହିଁ ସଂକ୍ରମିତ ହୋଇଥିଲା । ବିଶ୍ବର ବିଭିନ୍ନ ଦେଶକୁ ଏହା ଅତି ସହଜରେ ବ୍ୟାପିଥିବାବେଳେ ଏଥିପାଇଁ ପ୍ରାୟ ୧ ଶହ ମିଲିଅନ ଲୋକଙ୍କ ମୃତ୍ୟ ହୋଇଥିଲା । ମୁ୍ଖ୍ୟତଃ ବାୟୁ ଦ୍ଵାରା ସଂକ୍ରମିତ ହେଉଥିବାରୁ ଏହି ଫ୍ଲୁ ଅତି ସହଜରେ ବିଶ୍ବରେ ଏତେ ସଂଖ୍ୟାରେ ଲୋକଙ୍କୁ ସଂକ୍ରମିତ କରିଥିଲା । ସେହି ସମୟରେ ପ୍ରଥମ ବିଶ୍ବଯ଼ୁଦ୍ଧ ଚାଲିଥିଲା ଏବଂ ଏଥିରେ ଅନେକ ଦେଶ ମଧ୍ୟ ଆକ୍ରାନ୍ତ ହୋଇଥିଲେ । ପ୍ରତିରୋଧକ ଶକ୍ତି କମ୍‌ ଥିବାରୁ ମୁ୍ଖ୍ୟତଃ ବୟସ୍କ ଏବଂ କମ୍‌ ବୟସର ପିଲା ଏହାଦ୍ଵାରା ଆକ୍ରାନ୍ତ ହୋଇଥିଲେ ।

ତେବେ ଏହାପରେ ମଧ୍ୟ ଫ୍ଲୁ ଜନିତ ଅନେକ ମହାମାରୀ ସାରା ବିଶ୍ବରେ ଭୟଙ୍କର ରୂପ ଧାରଣ କରିଛନ୍ତି । ସେମାନଙ୍କ ମଧ୍ୟରେ  ୧୯୫୬ରେ ଆରମ୍ଭ ହୋଇଥିବା ଏସିଆନ ଫ୍ଲୁ ଦୁଇ ବର୍ଷ ପର୍ଯ୍ୟନ୍ତ ସକ୍ରିୟ ରହିଥିଲା । ଏହାର ଭୂତାଣୁକୁ H2N2 ନାମରେ ନାମିତ କରାଯାଇଥିବାବେଳେ ଏଥିରେ ପ୍ରାୟ ୨୦ ଲକ୍ଷ ଲୋକଙ୍କ ମୃତ୍ୟୁ ହୋଇଥିଲା ।

ଏହାଦ୍ଵାରା ମୁ୍ଖ୍ୟତଃ ଚୀନର ଗୁଆଙ୍ଗଝୁ  ସହର,ସିଙ୍ଗାପୁର, ହଂକଂ ଏବଂ ଆମେରିକା ବିଶେଷ ଭାବରେ କ୍ଷତିଗ୍ରସ୍ତ ହୋଇଥିଲେ ।  ଏହାପରେ ୧୯୬୮ରେ ସିଙ୍ଗାପୁର ଫ୍ଲୁ ରେ ମଧ୍ୟ ପ୍ରାୟ ୧୦ ଲକ୍ଷ ଲୋକଙ୍କ ମୃତ୍ୟୁ ହୋଇଥିଲା ଏବଂ H3N2 ଭୂତାଣୁ ଦ୍ଵାରା ହିଁ ଏହା ସଂକ୍ରମିତ ହୋଇଥିଲା । ସିଙ୍ଗାପୁରରେ ଆରମ୍ଭ ହୋଇଥିବା ଏହି ଭୂତାଣୁ କ୍ରମେ ଭିଏତନାମ, ଫିଲିପାଇନ୍ସ, ଭାରତ, ଅଷ୍ଟ୍ରେଲିଆ ଏବଂ ୟୁରୋପର କେତେକ ଦେଶକୁ ବ୍ୟାପି ଯାଇଥିଲା । ଏହାଛଡା ସ୍ବାଇନ ଫ୍ଲୁ ମଧ୍ୟ କିଛି ସମୟ ପାଇଁ ସାରା ବିଶ୍ବରେ ବିଶେଷ ଭାବରେ ପ୍ରଭାବ ପକାଇଥିଲା । ଏହାଛଡା ବିଭିନ୍ନ ସମୟରେ ଇବୋଲା, ନିପାହ ଭଳି ମାରାତ୍ମକ ଭୂତାଣୁ ବିଶ୍ବର ବିଭିନ୍ନ ଭାଗରେ ଲୋକଙ୍କ ପାଇଁ ଘାତକ ସାବ୍ୟସ୍ତ ହୋଇଛି ।

ତେବେ ଗତ ଦୁଇ ଦଶନ୍ଧି ମଧ୍ୟରେ ବିଶ୍ବରେ ଭୟଙ୍କର ହୋଇଥିଲା ଏଡସ୍‌ ବା ଏଚଆଇଭି ସଂକ୍ରମଣ । କଙ୍ଗୋରେ ପ୍ରଥମେ ଏଚଆଇଭି ଭୂତାଣୁ ଚିହ୍ନଟ ହୋଇଥିବାବେଳେ ପରବର୍ତ୍ତୀ ସମୟରେ ସାରା ବିଶ୍ବରେ ପ୍ରାୟ ୩୬ ମିଲିଅନ ଲୋକ ଏଥିରେ ସଂକ୍ରମିତ ହୋଇଛନ୍ତି । ତେବେ ପ୍ରାଥମିକ ପର୍ଯ୍ୟାୟରେ ଏହି ଭୂତାଣୁ ଅଧିକ ସକ୍ରିୟ ହୋଇଥିବାବେଳେ ପରବର୍ତ୍ତୀ ସମୟରେ ଏହାକୁ ନିୟନ୍ତ୍ରଣ କରିବା ସାମାନ୍ୟ ସମ୍ଭବ ହୋଇଥିଲା । ତେବେ ଏକ ରିପୋର୍ଟ ମୁ୍ତାବକ ୨୦୦୫ରେ ବିଶ୍ବରେ ଏଚଆଇଭି ସଂକ୍ରମଣରେ ୨.୨ ମିଲିଅନ ଲୋକଙ୍କ ମୃତ୍ୟୁ ହୋଇଥିଲା । ଅପରପକ୍ଷେ ୨୦୧୨ ବେଳକୁ ବିଶ୍ବରେ ଏଚଆଇଭି ଆକ୍ରାନ୍ତଙ୍କ ମୃତ୍ୟୁ ହାର ୧.୬ ମିଲିଅନକୁ ହ୍ର।ସ ପାଇଥିଲା ।

ଇତିହାସରେ ଏମିତି ଅନେକ ମହାମାରୀ ସମ୍ପର୍କରେ ଉଲ୍ଲେଖ ରହିଥିଲେ ମଧ୍ୟ ସମସ୍ତ ମହାମାରୀର ସବିଶେଷ ପରିସଂଖ୍ୟାନ ମିଳିବା ସେତେଟା ସହଜ ହୋଇପାରିନି ।

ସାରା ବିଶ୍ୱରେ ମୂଷା ପାଇଁ ମହାମାରୀ ବ୍ୟାପିବା କିମ୍ବା ବିଭିନ୍ନ କାରଣରୁ ଫ୍ଲୁ ଭଳି ମହାମାରୀ ଅଧିକ ବ୍ୟାପକ ହେବାର ଅନେକ ଉଦାହରଣ ରହିଛି । ଏହାଛଡା ଅନ୍ୟ କେତେକ ମାରାତ୍ମକ ରୋଗ ମଧ୍ୟ ବିଭିନ୍ନ ଦେଶରେ ମହାମାରୀ ରୂପ ଧାରଣ କରିଛି । ସେମିତି ଏକ ମହାମାରୀ ହେଉଛି କଲେରା ବା ହଇଜା । ଇତିହାସ ମୁତାବକ ସାରା ବିଶ୍ୱରେ ଏପର୍ଯ୍ୟନ୍ତ ୭ଟି କଲେରା ମହାମାରୀ ଭୟଙ୍କର ହୋଇଥିବାବେଳେ ୧୮୫୨ରେ ଭାରତରେ ଦେଖାଦେଇଥିବା କଲେରା ମହାମାରୀ ଅଧିକ ବିନାଶକାରୀ ହୋଇଥିଲା ।

୧୮୬୦ ପର୍ଯ୍ୟନ୍ତ ଏହି ମହାମାରୀ ଏସିଆ, ୟୁରୋପ,ଆଫ୍ରିକା ଏବଂ ଉତ୍ତର ଆମେରିକାକୁ ବ୍ୟାପି ଯାଇଥିଲା । ଏହା ମୁଖ୍ୟତଃ ଏକ ଜଳବାହୀ ରୋଗ ହୋଇଥିବାରୁ ଏଥିରେ ଅନେକ ଲୋକ ସହଜରେ ଆକ୍ରାନ୍ତ ହୋଇଥିଲେ । ତେବେ ୮ ବର୍ଷ ଭିତରେ କଲେରା ମହାମାରୀ ସାରା ବିଶ୍ବରେ ପ୍ରାୟ ୧୦ ଲକ୍ଷ ଲୋକଙ୍କ ଜୀବନ ନେଇଥିଲା । ଗଙ୍ଗା ନଦୀ କୂଳରେ କଲିକତା ସହରରେ ଏହା ଆରମ୍ଭ ହୋଇଥିବାବେଳେ କ୍ରମେ ଭାରତର ଅନ୍ୟ କେତେକ ପ୍ରମୁ୍ଖ ସହରକୁ ମଧ୍ୟ ବ୍ୟାପି ଯାଇଥିଲା । ଏସବୁ ଅଞ୍ଚଳରେ ଥିବା ପ୍ରଦୂଷଣ ପାଇଁ କଲେରା ଖୁବଶୀଘ୍ର ବ୍ୟାପି ଯାଇଥିଲା ।

ଏହାପରେ ୧୯୧୦ରେ ମଧ୍ୟ ବିଶ୍ୱରେ କଲେରା ମହାମାରୀ ଅଧିକ ଭୟଙ୍କର ହୋଇଥିଲା ଏବଂ ଏଥିରେ ପ୍ରାୟ ୮ ଲକ୍ଷ ଲୋକଙ୍କ ମୃତ୍ୟୁ ହୋଇଥିଲା । ତେବେ ଏହି ମହାମାରୀ ପୂର୍ବ ଭଳି ଭାରତରେ ନୁହେଁ ବରଂ ଆମେରିକାରୁ ଆରମ୍ଭ ହୋଇଥିଲା । ବିଭିନ୍ନ ମହାମାରୀ ବିଭିନ୍ନ ସମୟରେ ବିଭିନ୍ନ ଭାବରେ ସାରା ବିଶ୍ୱକୁ କବଳିତ କରିଛନ୍ତି । କଲେରା, ପ୍ଲେଗ୍‌, ବସନ୍ତ ରୋଗ ଏବଂ ଇନଫ୍ଲୁଏଞ୍ଜା କାରଣରୁ ହୋଇଥିବା ମହାମାରୀ ମାନବ ଇତିହାସରେ ବେଶ୍‌ ଭୟଙ୍କର ସାବ୍ୟସ୍ତ ହୋଇଛନ୍ତି ।

ସ୍ଥିତି ଏମିତି ହୋଇଛି ଏସବୁ ରୋଗ, ଭୂତାଣୁ ସୀମା ସରହଦ ଡେଇଁ ଅନ୍ୟ ସ୍ଥାନକୁ ମଧ୍ୟ ସଂକ୍ରମିତ ହୋଇଛନ୍ତି ଏବଂ ସେଠାରେ ମଧ୍ୟ ଭୟଙ୍କର ହୋଇଛନ୍ତି । ସେଥିପାଇଁ ବିଶ୍ବ ସଂଗଠନ ଏହାକୁ ମହାମାରୀ ବୋଲି ଘୋଷଣା କରିବା ସ୍ବାଭାବିକ । ଇତିହାସର ଏକ ପରିସଂଖ୍ୟାନ ମୁ୍ତାବକ କେବଳ ବସନ୍ତ ରୋଗରେ ହିଁ ଗତ ୧୨ ହଜାର ବର୍ଷ ଭିତରେ ସାରା ବିଶ୍ବରେ ପ୍ରାୟ ୫୦୦ ମିଲିଅନ ଲୋକଙ୍କ ମୃତ୍ୟୁ ହୋଇସାରିଛି ।

ପୂର୍ବରୁ ଚିକିତ୍ସା ବିଜ୍ଞାନ ସେତେଟା ସକ୍ରିୟ କିମ୍ବା ଉନ୍ନତ ନଥିଲା । ତେଣୁ ଏମିତି ମହାମାରୀର ମୁ୍କାବିଲା କରିବା କିମ୍ବା ତା ଉପରେ ଶତପ୍ରତିଶତ ବିଜୟ ହାସଲ ସମ୍ଭବ ହୋଇପାରୁନଥିଲା । ତେବେ ବର୍ତ୍ତମାନ ଡାକ୍ତରୀ ବିଜ୍ଞାନ ଯଥେଷ୍ଟ ଆଗକୁ ଗଲାଣି ଏବଂ ମଣିଷ ବିଭିନ୍ନ ଔଷଧ ମଧ୍ୟ ବାହାର କରିସାରିଲାଣି । ତେଣୁ ଏମିତି ମହାମାରୀ ଆଉ ସେମିତି ଭୟଙ୍କର ହେବାର ସେତେଟା ସମ୍ଭାବନା ନାହିଁ ।

ବାସ୍ତବରେ ବିଶ୍ୱରେ କେତେକ ମହାମାରୀ କେତେଯେ ଭୟଙ୍କର ସାବ୍ୟସ୍ତ ହୋଇଛନ୍ତି ସେ ସମ୍ପର୍କରେ ବିଭିନ୍ନ ପରିସଂଖ୍ୟାନରେ ତଥ୍ୟ ଉଲ୍ଲେଖ ରହିଛି । ହେଲେ ଏହାକୁ ନେଇ ସାଧାରଣ ଲୋକଙ୍କ ଚିନ୍ତା ଏବଂ ଭାବନା ମଧ୍ୟ ସେହି ଅନୁପାତରେ ଗୁରୁତ୍ୱ ବହନ କରେ । ବିଭିନ୍ନ ମାରାତ୍ମକ ଭୂତାଣୁକୁ ନେଇ ବିଶ୍ୱବାସୀଙ୍କ ଭୟ ମଧ୍ୟ ସେହି ଅନୁପାତରେ ବାସ୍ତବ । ଲୋକଙ୍କ ଏଭଳି ଭାବନା ଏବଂ କିଛିଟା କାଳ୍ପନିକ କାହାଣୀକୁ ନେଇ ହଲିଉଡରେ ଅନେକ ଫିଲ୍ମ ନିର୍ମିତ ହୋଇଛି । ସେମାନଙ୍କ ମଧ୍ୟରୁ ଅନେକ ଫିଲ୍ମ ବ୍ୟବସାୟିକ ସଫଳତା ହାସଲ କରିଥିଲେ ମଧ୍ୟ ଅନେକାଂଶରେ ଲୋକଙ୍କୁ ସଚେତନ କରିବା ପାଇଁ ଉଦ୍ଦିଷ୍ଟ ବୋଲି ଆମେ କହିପାରିବା ।

ଏହି କ୍ରମରେ ହଲିଉଡରେ ୨୦୧୬ରେ ନିର୍ମିତ ହୋଇଥିବା ଦି କ୍ୟାବିନ ବେଶ୍‌ ଚର୍ଚ୍ଚାରେ ରହିଥିଲା । ଛୁଟି ବିତାଇବାକୁ ଆସିଥିବା କେତେକ ସାଙ୍ଗ ଏକ ଭଡା କ୍ୟାବିନରେ ରହୁଥିବାବେଳେ କେମିତି ଏକ ଭୟଙ୍କର ଭୂତାଣୁର ଶିକାର ହୋଇଛନ୍ତି ତା ଉପରେ ଆଧାରିତ ଏହି ଫିଲ୍ମ । ଏହି କ୍ରମରେ ଆଉ ଏକ ଚର୍ଚ୍ଚିତ ଫିଲ୍ମ ୱାର୍ଲଡ ୱାର ଜେଡ୍‌ ୨୦୧୩ରେ ମୁ୍କ୍ତିଲାଭ କରିଥିଲା ଏବଂ ବେଶ୍‌ ଲୋକପ୍ରିୟ ମଧ୍ୟ ହୋଇଥିଲା । କୈାଣସି ଏକ ଭାଇର ପ୍ରଭାବରେ ହଠାତ୍‌ ମଣିଷ ମାଂସାସୀ ହୋଇଯାଉଛି ଏବଂ ଫିଲ୍ମର ନାୟକ ବିଭିନ୍ନ ଦେଶକୁ ଯାଇ ଏହାର ମୁ୍କାବିଲା କରିଛନ୍ତି ।

୨୦୦୭ରେ ନିର୍ମିତ ହୋଇଥିଲା ‘ଆଇ ଆମ ଲିଜେଣ୍ଡ’ ଫିଲ୍ମ ମଧ୍ୟ ବେଶ୍‌ ଲୋକପ୍ରିୟତା ହାସଲ କରିଥିଲା । କ୍ୟାନସର ଉପଚାର ପାଇଁ ଉଦ୍ଭାବିତ ହୋଇଥିବା ଔଷଧର ପାର୍ଶ୍ୱ ପ୍ରତିକ୍ରିୟାରେ ଲୋକମାନେ କ୍ରମେ ହିଂସ୍ର ହୋଇଯାଉଛନ୍ତି । ତେବେ ଜଣେ ଡାକ୍ତର ଏହି ମାରାତ୍ମକ ଭାଇରସରୁ କେମିତି ରକ୍ଷା ପାଉଛନ୍ତି ତାହା ଫିଲ୍ମରେ ଦେଖାଯାଇଛି ।

୨୦୦୮ରେ ମୁ୍କ୍ତିଲାଭ କରିଥିଲା କ୍ବାରେଣ୍ଟାଇନ । କୈାଣସି ଏକ ସଂକ୍ରମଣ ପାଇଁ କିଛି ଲୋକଙ୍କୁ ଅନ୍ୟତ୍ର ଏକାନ୍ତରେ ରଖାଯାଇଥିବାବେଳେ ସେମାନଙ୍କ ଭିତରେ ଫଶି ଯାଇଥିଲେ ଜଣେ ସାମ୍ବାଦିକ ଏବଂ ଅଗ୍ନିଶମବାହିନୀ କର୍ମଚାରୀ । ତେବେ କେମିତି ସେମାନେ ଏଥିରୁ ନିଜକୁ ବଞ୍ଚାଇଛନ୍ତି ତାହା ଏହି ଫିଲ୍ମରେ ପ୍ରଦର୍ଶିତ ହୋଇଛି ।

ଏହାଛଡା ମଧ୍ୟ ଏଭଳି କାହାଣୀକୁ ନେଇ ହଲିଉଡରେ ଅନେକ ଚଳଚ୍ଚିତ୍ର ନିର୍ମିତ ହୋଇଛି । ତେବେ ବର୍ତ୍ତମାନର ସମୟରେ ସାରା ବିଶ୍ବରେ କରୋନା ଭାଇରସ୍‌ କ୍ରମେ ଭୟଙ୍କର ହେଉଥିବାବେଳେ ଏହାକୁ ନେଇ ବଲିଉଡରେ ମଧ୍ୟ ଫିଲ୍ମ ନିର୍ମାଣ ପାଇଁ ଯୋଜନା ଆରମ୍ଭ ହୋଇଗଲାଣି ।

ସେଥିପାଇଁ IFTPC ପାଖରେ ଟାଇଟଲ ରେଜିଷ୍ଟର ପାଇଁ ଲମ୍ବା ଆବେଦନ କରାଯାଇଛି । ଦେଶର ପ୍ରସିଦ୍ଧ ପ୍ରଯୋଜନା ସଂସ୍ଥା ଇରୋସ କରୋନା ଉପରେ ଏକ ଫିଲ୍ମ ନିର୍ମାଣ କରବାକୁ ସ୍ଥିର କରିଛି ।

ଫିଲ୍ମର ଟାଇଟଲ କରୋନା ପ୍ୟାର ହେ ରହିବ ବୋଲି ସ୍ଥିର ହୋଇଛି । ତେବେ ଫିଲ୍ମର ଷ୍ଟାର କାଷ୍ଟ କଣ ରହିବ ତାହା ଏର୍ଯ୍ୟନ୍ତ ସ୍ଥିର ହୋଇନାହିଁ । ଏହାଛଡା କରୋନାକୁ ନେଇ ଅନେକ ଗୀତ ମଧ୍ୟ ରେକର୍ଡିଂ ହୋଇସାରିଛି ।