ନନ୍ଦିଘୋଷ ବ୍ୟୁରୋ : ଆକାଶରେ ଢାଙ୍କି ରହୁଛି କଳାହାଣ୍ଡିଆ ମେଘ । ହେଲେ ବର୍ଷା ହେଉନି । ଗଞ୍ଜାମ ଜିଲ୍ଲାରେ ନିଅଣ୍ଟିଆ ବର୍ଷା ଚାଷୀଙ୍କ ଚିନ୍ତା ବଢ଼ାଇ ଦେଇଛି । ଫଳରେ ପୁରୁଣା ପରମ୍ପରାକୁ ଆପଣାଇଛନ୍ତି ଚାଷୀ । ଇନ୍ଦ୍ରଦେବଙ୍କୁ ସନ୍ତୁଷ୍ଟ କରିବାକୁ ଚାଲିଛି ପୂଜାର୍ଚ୍ଚନା । ଧରାକୋଟ ବ୍ଲକ ଦିଗି ଗାଁରେ ଚାଲିଛି ଗିରି ପୂଜା । ଭଲ ବର୍ଷା ଓ ଉତ୍ତମ ଫସଲ ପାଇଁ ଗାଁର ଆବାଳ ବୃଦ୍ଧବନିତା ଏକାଠି ହୋଇ କରିଛନ୍ତି ଗିରି ପୂଜା । ଗାଁ ଠାରୁ ପ୍ରାୟ ୪ କିଲୋମିଟର ଦୂରରେ ଥିବା ଏକ ବିରାଟ ପାହାଡ଼ ଉପରକୁ ଯାଇ ମା’ ପୋଡା ବାଉରାଣୀ ଦେବୀଙ୍କ ସମେତ ଗିରିପୂଜା କରିଛନ୍ତି । ଏଭଳି ପୂଜା ଅର୍ଚ୍ଚନା କଲେ ଭଲ ବର୍ଷା ହୁଏ ବୋଲି ଲୋକଙ୍କ ରହିଛି ଅତୁଟ ବିଶ୍ଵାସ ।ସେହିପରି ଆସିକା ଓ ଧରାକୋଟ ବ୍ଲକର ଅନ୍ୟ ଗାଁରେ ଚାଲିଛି ବେଙ୍ଗୁଲି ନାଚ । ଇନ୍ଦ୍ରଦେବଙ୍କୁ ସନ୍ତୁଷ୍ଟ କରିବା ପାଇଁ ଏକ ବେଙ୍ଗ ଓ ବେଙ୍ଗୁଲିକୁ ପୂଜା କରି ଗାଁ ସାରା ବୁଲାଉଛନ୍ତି ଲୋକେ । କେତେକ ସ୍ଥାନରେ ପଣାପାଣି ଦେଉଛନ୍ତି । କେଉଁ ଆବାହମାନ କାଳରୁ ଏହି ପରମ୍ପରା ଚାଲିଆସୁଛି ବୋଲି ଗ୍ରାମବାସୀ କହିଛନ୍ତି ।
