ନନ୍ଦିଘୋଷ ବ୍ୟୁରୋ : ବଙ୍ଗୋପସାଗରରେ ଆଉ ଏକ ପାଣିପାଗ ସିଷ୍ଟମ୍କୁ ନେଇ ବଢ଼ିଛି ଚର୍ଚ୍ଚା। କିଛି ପାଣିପାଗ ମଡେଲରେ ବାତ୍ୟାର ସମ୍ଭାବନା ନେଇ ଆକଳନ ଆସୁଥିବା ବେଳେ, ଏବେ ଠାରୁ ଏଭଳି ଆକଳନ କରି ଭୟଭୀତ ନହେବାକୁ ପାଣିପାଗ ବିଭାଗ ପରାମର୍ଶ ଦେଇଛି। ବର୍ତ୍ତମାନ ଉତ୍ତର ଥାଇଲ୍ୟାଣ୍ଡ ଉପରେ ଏକ ଉପରି ବାୟୁ ଘୂର୍ଣ୍ଣିବଳୟ ସକ୍ରିୟ ରହିଛି। ଏହା ସମୁଦ୍ରପତ୍ତନଠାରୁ ପ୍ରାୟ ୭.୬ କିଲୋମିଟର ଉଚ୍ଚତା ପର୍ଯ୍ୟନ୍ତ ବ୍ୟାପିଛି। ଆସନ୍ତା ୧୮ ତାରିଖ ସନ୍ଧ୍ୟା ସୁଦ୍ଧା ଏହା ଉତ୍ତର ଆଣ୍ଡାମାନ ସାଗର ଅଞ୍ଚଳକୁ ପ୍ରବେଶ କରିବାର ସମ୍ଭାବନା ରହିଛି। ଏହାର ପ୍ରଭାବରେ ୧୯ ତାରିଖ ସନ୍ଧ୍ୟା ସୁଦ୍ଧା ଆଣ୍ଡାମାନ ସାଗର ଓ ଏହାର ଆଖପାଖରେ ଏକ ଲଘୁଚାପ କ୍ଷେତ୍ର ଗଠନ ହୋଇପାରେ। ପରବର୍ତ୍ତୀ ୩ରୁ ୪ ଦିନ ମଧ୍ୟରେ ଏହି ସିଷ୍ଟମ୍ ଧୀରେ ଧୀରେ ତୀବ୍ର ହୋଇ ପଶ୍ଚିମ-ଉତ୍ତର-ପଶ୍ଚିମ ଦିଗକୁ ଗତି କରି ଦକ୍ଷିଣ ଓଡ଼ିଶା-ଉତ୍ତର ଆନ୍ଧ୍ରପ୍ରଦେଶ ଉପକୂଳ ଆଡ଼କୁ ଯିବାର ସମ୍ଭାବନା ରହିଛି। ତେବେ ଏହା କେତେ ଘନୀଭୂତ ହେବ, ତାହା ଏବେଠାରୁ ସ୍ପଷ୍ଟ ନୁହେଁ। ଲଘୁଚାପ ସୃଷ୍ଟି ହେବା ପରେ ହିଁ ଏହାର ଗତିପଥ ଓ ତୀବ୍ରତା ସମ୍ପର୍କରେ ଅଧିକ ସ୍ପଷ୍ଟ ଚିତ୍ର ମିଳିବ।
ଅନ୍ୟପଟେ ECMWF, GFS, NCUM ସମେତ ବିଭିନ୍ନ ମଡେଲର ଆକଳନରେ ଆସନ୍ତା ସପ୍ତାହରେ ବଙ୍ଗୋପସାଗରରେ ଏକ ସଂଗଠିତ ସିଷ୍ଟମ୍ ଗଠନର ସଙ୍କେତ ମିଳୁଛି। କିଛି ମଡେଲରେ ଏହାର ତୀବ୍ରତା ବଢ଼ିବାର ସମ୍ଭାବନା ମଧ୍ୟ ଦେଖାଯାଉଛି। ତେବେ ମଡେଲ ଆକଳନ ଓ ବାସ୍ତବ ପାଣିପାଗ ସ୍ଥିତି ମଧ୍ୟରେ ପରିବର୍ତ୍ତନ ହୋଇପାରୁଥିବାରୁ, ଏବେଠାରୁ ବାତ୍ୟା ନେଇ ନିଶ୍ଚିତ ଭାବେ କହିବା ଠିକ୍ ନୁହେଁ। ଏନେଇ ଲୋକଙ୍କୁ ଗୁଜବ ଓ ସୋସିଆଲ ମିଡିଆର ଅପ୍ରମାଣିତ ଖବରରୁ ଦୂରେଇ ରହିବାକୁ ପାଣିପାଗ ବିଭାଗ ପରାମର୍ଶ ଦେଇଛି। IMD ଡିଜି ଡ. ମୃତ୍ୟୁଞ୍ଜୟ ମହାପାତ୍ର କହିଛନ୍ତି, ଏବେ କୌଣସି ବାତ୍ୟାର ପୂର୍ବାନୁମାନ କରାଯାଇନାହିଁ। ୧୯ ତାରିଖ ପରେ ସ୍ଥିତି ଅଧିକ ସ୍ପଷ୍ଟ ହେବ ଏବଂ ଆବଶ୍ୟକ ହେଲେ ଆଗୁଆ ସତର୍କ ସୂଚନା ଜାରି କରାଯିବ। ସେପଟେ ସମ୍ଭାବ୍ୟ ପ୍ରାକୃତିକ ବିପର୍ଯ୍ୟୟର ମୁକାବିଲା ପାଇଁ ଓଡ଼ିଶା ସରକାର ସବୁବେଳେ ପ୍ରସ୍ତୁତ ଥିବା କହିଛନ୍ତି ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ। ସମ୍ବଲପୁରରେ ଡପଲର ରାଡାର ସ୍ଥାପନ କରାଯାଇଥିବା ବେଳେ, ଆଗାମୀ ଦିନରେ ଭୁବନେଶ୍ୱର, ବାଲେଶ୍ୱର ଓ ଗୋପାଳପୁରରେ ମଧ୍ୟ ଅତ୍ୟାଧୁନିକ ଡପଲର ରାଡାର ସ୍ଥାପନ ଯୋଜନା ରହିଛି। ଏହା ଦ୍ୱାରା ବାତ୍ୟା ଓ ଅନ୍ୟ ପ୍ରାକୃତିକ ବିପର୍ଯ୍ୟୟ ସମ୍ପର୍କରେ ଅଧିକ ସଠିକ୍ ନିରୀକ୍ଷଣ ଓ ପୂର୍ବାନୁମାନରେ ସହାୟତା ମିଳିବ।
