ନନ୍ଦିଘୋଷ ବ୍ୟୁରୋ :ଧର୍ମ ପରିବର୍ତ୍ତନ ପରେ ଶବ ସତ୍କାରକୁ ନେଇ ବିବାଦ ଘଟଣା । ୩୫ ଘଣ୍ଟା ପରେ ହେଲା ଶବ ସତ୍କାର। ଏପରି ଏକ ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ରାଇଘର ବ୍ଲକର କୁନ୍ଦେଇ ଥାନା ଅଧୀନ ଅଡଣ୍ଡି ଗାଁରେ । ୬୦ ବର୍ଷୀୟା ଗାଗରୀ ଗଣ୍ଡଙ୍କ ମୃତ୍ୟୁ ପରେ ତାଙ୍କ ଶବ ସତ୍କାରକୁ ନେଇ ପ୍ରାୟ ୩୫ ଘଣ୍ଟା ଧରି ଅନିଶ୍ଚିତତା ଲାଗି ରହିଥିଲା। ମୂଳ ଧର୍ମ ଛାଡି ଗତ କିଛି ବର୍ଷ ହେଲା ମୃତକଙ୍କ ପରିବାର ଅନ୍ୟ ଧର୍ମ ଗ୍ରହଣ କରିଥିଲେ । ଗାଁରେ ଉକ୍ତ ଧର୍ମର କୌଣସି ସ୍ମଶାନ ନଥିବାରୁ ମୃତକଙ୍କ ପରିବାର ଗ୍ରାମର ସ୍ମଶାନରେ ଶବ ସତ୍କାର କରିବାକୁ ସ୍ଥିର କରିଥିଲେ । କିନ୍ତୁ ଗାଁ ମଶାଣିରେ ଶବ ସତ୍କାର କରିବାକୁ ଗ୍ରାମବାସୀ ବିରୋଧ କରିଥିଲେ । ପରେ ମୃତଦେହକୁ ଛତିଶଗଡ଼ର କେଶ୍କାଲକୁ ଜଣେ ସମ୍ପର୍କୀୟଙ୍କ ଘରକୁ ନିଆଯାଇଥିଲା। ସେଠାରେ ମଧ୍ୟ ତାଙ୍କୁ ବାରଣ କରାଯାଇଥିଲା। ପରେ ନବରଙ୍ଗପୁର ପାପଡ଼ାହାଣ୍ଡି ବ୍ଲକ୍ ଲହରାକାନି ଗାଁରେ ହୋଇଛି ଶବ ସତ୍କାର । ଖବର ପାଇ କୁନ୍ଦେଇ ପୋଲିସ ଗାଁରେ ପହଞ୍ଚି ବୁଝାସୁଝା କରୁଛି।
