ନନ୍ଦିଘୋଷ ବ୍ୟୁରୋ : ଗମ୍ଭାରିଆ ନାଳରେ ଜଳସ୍ତର ବଢ଼ିବାରୁ ଗାଁକୁ ଯାଇପାରିଲାନି ଶବବାହକ ଗାଡ଼ି। ଶେଷରେ ମୃତ ଦୁଇଭାଇଙ୍କ ଶବକୁ ଖଟିଆରେ ବୋହି ନାଳ ପାର କରାଇଲେ ପରିବାର ଲୋକେ। ଏଭଳି ଅଭାବନୀୟ ଘଟଣା ପରଜଙ୍ଗ ବ୍ଲକ ଆଖୁଆପାଳ ପଞ୍ଚାୟତର ଝରିପାଳ ବସ୍ତିରେ ଦେଖିବାକୁ ମିଳିଛି। ଝରିପାଳ ଗ୍ରାମର ଜୟଦେବ ସିଂଙ୍କ ଦୁଇ ପୁଅ ରଞ୍ଜନ ଓ ଗଣେଶ୍ୱର ଗତ ରବିବାର ରାତିରେ ବାଇକ୍ରେ ଘରକୁ ଫେରୁଥିବା ବେଳେ ଦଦରାଘାଟି ଜଳପ୍ରକଳ୍ପ ନିକଟରେ ଦୁର୍ଘଟଣାର ଶିକାର ହୋଇଥିଲେ। ପ୍ରଥମେ ସେମାନଙ୍କୁ ମଣ୍ଡାପାଳ ମେଡିକାଲ ଏବଂ ପରେ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ପରେ କଟକ ବଡ଼ ମେଡିକାଲରେ ଚିକିତ୍ସାଧୀନ ଅବସ୍ଥାରେ ଦୁଇଭାଇଙ୍କ ମୃତ୍ୟୁ ହୋଇଥିଲା।
ମୃତଦେହ ନେଇ ପରିବାର ଗାଁକୁ ଫେରିଥିବା ବେଳେ ଗମ୍ଭାରିଆ ନାଳରେ ଜଳସ୍ତର ବୃଦ୍ଧି ଯୋଗୁ ଶବବାହକ ଗାଡ଼ି ଆଗକୁ ଯାଇପାରିନଥିଲା। ଫଳରେ ଦୁଇଟି ଖଟିଆରେ ମୃତଦେହ ବୋହି ପ୍ରାୟ ଏକ କିଲୋମିଟର ରାସ୍ତା ପାର କରି ଗାଁରେ ପହଞ୍ଚାଇଥିଲେ ପରିବାର ଲୋକେ। ଗମ୍ଭାରିଆ ନାଳ ଉପରେ ବ୍ରିଜ୍ ନିର୍ମାଣ ପାଇଁ ବାରମ୍ବାର ଦାବି ସତ୍ତ୍ୱେ ପ୍ରଶାସନ ଓ ସ୍ଥାନୀୟ ରାଜନେତା ଦୃଷ୍ଟି ଦେଉନଥିବା ଅଭିଯୋଗ କରିଛନ୍ତି ଗ୍ରାମବାସୀ।
