ନନ୍ଦିଘୋଷ ବ୍ୟୁରୋ : ବଲାଙ୍ଗୀର ଦେଓଗାଁ ସୋନଗଡ ନଦୀରେ ହେବ ବ୍ୟାରେଜ I ଶସ୍ୟଶ୍ୟାମଳ ହେବ ମରୁଡ଼ି ପ୍ରବଳ ବଲାଙ୍ଗୀର ଜିଲ୍ଲା । ପୂର୍ବ ସରକାରଙ୍କ ଯୋଜନାକୁ ବାଜିଲା ମୋହର । ଜଳସମ୍ପଦ ବିଭାଗ ପକ୍ଷରୁ ବାହାରିଲା ଟେଣ୍ଡର । ବଲାଙ୍ଗୀର ଜିଲ୍ଲାରେ ୮ଟି ନଦୀ ଥିଲେ ସୁଦ୍ଧା ପାଣି ଅଭାବରୁ ଚାଷୀ ହନ୍ତସନ୍ତ I ଜଳସେଚନ ସୁବିଧା ନଥିବାରୁ ପ୍ରତିବର୍ଷ ମରୁଡ଼ି ଆଶଂକା ଦେଖାଦିଏ । ଲୋକଙ୍କ ସୁବିଧା ପାଇଁ ତତ୍କାଳୀନ ନବୀନ ପଟ୍ଟନାୟକଙ୍କ ସରକାର ସମୟରେ ସୋନଗଡ଼ ପ୍ରକଳ୍ପ ପାଇଁ ପ୍ରସ୍ତୁତ ହୋଇଥିଲା ଡିପିଆର । ତେବେ ସରକାର ବଦଳିବା ପରେ ଟେଣ୍ଡର ହୋଇପାରି ନଥିଲା । ଏବେ ନବୀନଙ୍କ ଉଦ୍ୟମକୁ ମୋହର ମାରିଛନ୍ତି ସରକାର I ବଲାଙ୍ଗୀର ବିଧାୟକଙ୍କ ଚିଠି ପରେ ଆନ୍ତରିକତା ଦେଖାଇଛନ୍ତି ସରକାର I ନଦୀ ଉପରେ ନିର୍ମାଣ ହେବ ସୋନଗଡ଼ ଗ୍ରାଉଣ୍ଡ ଓ୍ବାଟର କନଜରଭେସନ ପ୍ରୋଜେକ୍ଟ I ରାଜ୍ୟ ସରକାର ଏଥିପାଇଁ ୯୧ କୋଟି ୧୧ ଲକ୍ଷ ଟଙ୍କା ମଞ୍ଜୁର କରିଛନ୍ତି I ଯାହାକୁ ନେଇ ସ୍ଥାନୀୟ ଅଞ୍ଚଳରେ ଖୁସିର ଲହରୀ ଖେଳିଯାଇଛି I
ସୋନଗଡ ବ୍ୟାରେଜ ହେଲେ ଦେଓଗାଁ ଏବଂ ବଲାଙ୍ଗୀର ବ୍ଲକର ଭାଗ୍ୟ ବଦଳିବ I ୨୧୨୧ ହେକ୍ଟର ଚାଷ ଜମିକୁ ରବି ଓ ଖରିଫରେ ଜଳସେଚନ ସୁବିଧା ମିଳିବ I କେବଳ ଜଳସେଚନ ନୁହେଁ, ୨୮ଟି ପାନୀୟ ଜଳ ଯୋଗାଣ ପ୍ରକଳ୍ପ ମଧ୍ୟ ଏହି ବ୍ୟାରେଜ ସହ ଯୋଡିହେବ I ଫଳରେ ପିଇବା ପାଣି ସମସ୍ୟା ମଧ୍ୟ ଦୂର ହେବ I ପ୍ରାୟ ୫୦ ଖଣ୍ଡ ଗାଁ ଲୋକ ସିଧାସଲଖ ଲାଭାନ୍ବିତ ହେବେ I ଜିଲ୍ଲାରେ ଭୂତଳ ଜଳସ୍ତର କ୍ରମାଗତ ଭାବେ ଖସୁଥିବାରୁ ବ୍ୟାରେଜ ହେଲେ ବର୍ଷା ଜଳ ସଂରକ୍ଷଣ ହେବ । ରବି ଚାଷ ହେବ, ମାଛ ଚାଷ ଓ ପଶୁପାଳନରେ ମଧ୍ୟ ସୁଯୋଗ ପାଇବେ ସ୍ଥାନୀୟ ଲୋକେ I
