ନନ୍ଦିଘୋଷ ବ୍ୟୁରୋ : ସୁ ସୁ ହୋଇ ଗର୍ଜୁଛି ସମୁଦ୍ର। ଗାଁ ମୁହାଁ ପ୍ରଚଣ୍ଡ ଜୁଆର। ସାତଭାୟା ପରେ ଏବେ ଡାଳୁଅକଣି ନିକଟରେ କୂଳ ଲଙ୍ଘୁଛି ସମୁଦ୍ର। ଉପୁଡ଼ି ପଡ଼ୁଛି ବିରାଟକାୟ ଝାଉଁ ଗଛ। ମହୋଦଧିରେ ଲୀନ ହେଉଛି ଜଙ୍ଗଲ। ସମୁଦ୍ରର ଏଭଳି ଭୟଙ୍କର ରୂପକୁ ନେଇ ଏବେ ଆତଙ୍କିତ ଅସ୍ତରଙ୍ଗ ଅଞ୍ଚଳର ଲୋକେ।
ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ କେଳୁଣୀ ନଦୀର ମୁହାଣ ନିକଟରେ ମୁହାଣ ବୁଲିଯିବା ପରେ ସମୁଦ୍ରର ଗତିପଥ ସମ୍ପୂର୍ଣ୍ଣ ବଦଳି ଯାଇଛି। ଛୁରିଆନା ପଞ୍ଚାୟତ ଡାଳୁଅକଣି ନିକଟରେ ସମୁଦ୍ର କୂଳ ଲଙ୍ଘିବାରେ ଲାଗିଛି। ଫଳରେ ଡାଳୁଅକଣି, ଅଣକଣା, ଛୁରିଆନା ସମେତ ୫ଟି ଗାଁ ଏବେ ବିପଦ ଘେରରେ।ଡାଳୁଅକଣି ଗାଁଠାରୁ ମାତ୍ର ୫୦ ମିଟର ଦୂରରେ ରହିଛି ସମୁଦ୍ର। ତେଣୁ ଏହି ୫ଟି ଗାଁର ଲୋକଙ୍କ ଆଖିରେ ନିଦ ନାହିଁ। ପ୍ରତି ମୁହୂର୍ତ୍ତରେ ଭୟ ଓ ଆଶଙ୍କା ମଧ୍ୟରେ ଜୀବନ ବିତାଉଛନ୍ତି ଲୋକେ। ସମୁଦ୍ର ଜୁଆର ଯୋଗୁଁ ଚାଷଜମି ଓ ବାସଗୃହ ଲୁଣିପାଣିରେ ନଷ୍ଟ ହୋଇଯିବାର ଆଶଙ୍କା ମଧ୍ୟ ବଢ଼ିଛି। ଏଭଳି ସ୍ଥିତିରେ ସମୁଦ୍ର କୂଳ କ୍ଷୟର ସ୍ଥାୟୀ ସମାଧାନ ନକରାଗଲେ ଆଗକୁ ବଡ଼ ବିପର୍ଯ୍ୟୟକୁ ଏଡ଼ାଇବା କଷ୍ଟକର ହୋଇପାରେ।
