ନନ୍ଦିଘୋଷ ବ୍ୟୁରୋ : ପର୍ଣ୍ଣଗ୍ରାଫିରେ ନାବାଳିକାଙ୍କୁ ବ୍ୟବହାର । ମାନବ ଚାଲାଣ ଏବେ ପାଲଟିଛି ମୁଣ୍ଡବିନ୍ଧା । ୧୭ ଟି ସ୍ପେଶାଲ ଟିମ୍ କରୁଛି ରାଜ୍ୟ ବାହାରେ ଚଢ଼ାଉ । ମୁଖ୍ୟମନ୍ତ୍ରୀଙ୍କ ତାଗିଦ ପରେ ବ୍ୟାପକ ହେଉଛି ‘ଅପରେସନ ଅନ୍ୱେଷଣ’ । ତତ୍ପର ପୋଲିସ, ସଜାଗ ପ୍ରଶାସନ। ତଥାପି ରାଜ୍ୟରୁ ନିଖୋଜ ହୋଇଯାଉଛନ୍ତି ହଜାର ହଜାର ନାବଳିକା । ମହିଳାଙ୍କ ମିଳୁନି ପତ୍ତା । NRCB ରିପୋର୍ଟ ମୁତାବକ ଗତ ୫ ବର୍ଷରେ ଓଡିଶାରୁ ୨୪ ହଜାର ଶିଶୁ ନିଖୋଜ ହେବା ପରେ ଏବେ ବଢିଛି ଚିନ୍ତା। ଗତ ଶନିବାର ପୋଲିସ ଭବନରେ ଆୟୋଜିତ ଆଇପିଏସ ମିଟିଂରେ ମୁଖ୍ୟମନ୍ତ୍ରୀ ଗଭୀର ଉଦବେଗ ପ୍ରକାଶ ପାଇବା ପରେ ଆରମ୍ଭ ହୋଇଛି ‘ଅପରେସନ ଅନ୍ୱେଷଣ’ । ୧୭ ଟି ଟିମ୍ ରାଜ୍ୟ ବାହାରେ ଚଢ଼ାଉ ଜାରି ରଖିଛି । ମାନବ ଚାଲାଣ, ପର୍ଣ୍ଣଗ୍ରାଫି, ଦେହ ବେପାରରେ ନାବଳିକା ଓ ମହିଳାଙ୍କୁ ବ୍ୟବହାର କରିବା ନେଇ ଖବର ପାଇବା ପରେ ଜୋରଦାର ଚଢ଼ାଉ ଜାରି ରଖିଛି ଓଡିଶା ପୋଲିସ ।
ଜିଲ୍ଲା ପୋଲିସ ଓ ପ୍ରଶାସନ ମଧ୍ୟରେ ସମନ୍ୱୟ ରକ୍ଷା, ପ୍ରଯୁକ୍ତି ବିଦ୍ୟାର ବ୍ୟବହାର, ଡିଜିଟାଲ ଟ୍ରାକିଂ ଓ ଡାଟା ଆନାଲିସିସ ଆଧାରରେ ଶିଶୁ ଚାଲାଣକାରୀଙ୍କୁ ଧରିବା ସହ ଦଲାଲଙ୍କୁ ଠାବ କରିବାକୁ ଚାଲିଛି ଛାନବିନ । କିଛିଦିନ ତଳେ ଓଡ଼ିଶାର ଏଭଳି ଅବସ୍ଥା ନେଇ ଚିନ୍ତାବ୍ୟକ୍ତ କରିଥିଲେ କେନ୍ଦ୍ର ଗୃହ ମନ୍ତ୍ରଣାଳୟ । ହ୍ୟୁମାନ ଟ୍ରାଫିକିଂ ରେ ସାମିଲ ଦଲାଲଙ୍କ ସହ ଭିକ୍ଷାବୃତିରେ ନିବୃତ୍ତ କରୁଥିବା ଗ୍ୟାଙ୍ଗକୁ ଠାବ କରିବାକୁ ରାଜ୍ୟ ପ୍ରଶାସନକୁ ଦେଇଥିଲେ ନିର୍ଦ୍ଦେଶ । ନିଯୁକ୍ତି ସୁଯୋଗ ଅଭାବରୁ ପଛୁଆ ଜିଲ୍ଲାର ନାବଳିକା ରୋଜଗାର ଆଶାରେ ବାହାର ରାଜ୍ୟକୁ ଚାଲାଣ ହେଉଛନ୍ତି । ଏସବୁ ସ୍ଥାନରେ ଗ୍ରାମବାସୀ, ସ୍ଥାନୀୟ ନେତା, ବିଭିନ୍ନ ସଂଗଠନ ଓ ଏନଜିଓ ର ସହଭାଗିତାର ଆବଶ୍ୟକତା ଥିବା କହିଛନ୍ତି ବିଶେଷଜ୍ଞ ।
୨୦୨୪ ମସିହାରେ ଓଡିଶାରୁ ସର୍ବାଧିକ ୬ ହଜାର ୨୨୩ ଶିଶୁ ନିଖୋଜ ହୋଇଛନ୍ତି । ଓଡିଶା ପୋଲିସ ପକ୍ଷରୁ ପୁରସ୍କାର ରାଶି ସହ ନିଖୋଜ ଶିଶୁଙ୍କୁ ଖୋଜିବାକୁ ବ୍ୟାପକ ହ୍ୟୁମାନ ଇଣ୍ଟେଲ୍ଲିଜେନ୍ସ ର ବ୍ୟବହାର ହେଉଥିବା ଦେଖାଯାଇଛି ।
