ନନ୍ଦିଘୋଷ ବ୍ୟୁରୋ : ଖେଳରେ ଓଡ଼ିଶାର ମାଇଲଖୁଣ୍ଟ, ନବୀନଙ୍କ ଦୂରଦୃଷ୍ଟିରେ ବଦଳିଲା କ୍ରୀଡ଼ାର ଚିତ୍ର
ଆଜି ଜାତୀୟ କ୍ରୀଡ଼ା ଦିବସ। ଖେଳ ଜଗତରେ ଓଡ଼ିଶା ଆଜି ସୃଷ୍ଟି କରିଛି ସ୍ୱତନ୍ତ୍ର ପରିଚୟ। ଅନେକ ବାଧାବିଘ୍ନ ପାର କରି ବିକାଶର ସିଡ଼ି ଚଢ଼ିଛି ରାଜ୍ୟ। ତୃଣମୂଳ ସ୍ତରରୁ ଆରମ୍ଭ କରି ବିଶ୍ୱସ୍ତରୀୟ କ୍ରୀଡ଼ା ଆୟୋଜନ ପର୍ଯ୍ୟନ୍ତ, ଓଡ଼ିଶାର କ୍ରୀଡ଼ା ଯାତ୍ରା ରହିଛି ଚର୍ଚ୍ଚାରେ।
ନବୀନଙ୍କ ଦୂରଦୃଷ୍ଟି, କ୍ରୀଡ଼ାକୁ ନୂଆ ଦିଗ
ନବୀନ ପଟ୍ଟନାୟକଙ୍କ ମୁଖ୍ୟମନ୍ତ୍ରୀତ୍ୱ ସମୟରେ କ୍ରୀଡ଼ା କ୍ଷେତ୍ରରେ ଓଡ଼ିଶା ନେଇଥିଲା ବଡ଼ ଲମ୍ଫ। ଅତ୍ୟାଧୁନିକ ତାଲିମ, ବିଶ୍ୱସ୍ତରୀୟ ଇଭେଣ୍ଟ ଆୟୋଜନ ଏବଂ ତୃଣମୂଳ ସ୍ତରରେ କ୍ରୀଡ଼ା ଭିତ୍ତିଭୂମି ବିକାଶ ଉପରେ ଦିଆଯାଇଥିଲା ବିଶେଷ ଗୁରୁତ୍ୱ।
କ୍ରୀଡ଼ା ଓ ଭିତ୍ତିଭୂମି ବିକାଶ ପାଇଁ ତତ୍କାଳୀନ ସରକାର ୨ ହଜାର କୋଟି ଟଙ୍କାରୁ ଅଧିକ ବିନିଯୋଗ କରିଥିଲେ। ଯାହା ଓଡ଼ିଶାକୁ ବିଶ୍ୱ କ୍ରୀଡ଼ା ମାନଚିତ୍ରରେ ଏକ ନୂଆ ପରିଚୟ ଦେଇଥିଲା।
ସଙ୍କଟ ବେଳେ ଭାରତୀୟ ହକି ସହ ଛିଡ଼ା ହୋଇଥିଲା ଓଡ଼ିଶା
୨୦୧୮ରେ ସାହାରା ଆର୍ଥିକ ସହାୟତା ପ୍ରତ୍ୟାହାର କରିନେବା ପରେ ଭାରତୀୟ ହକି ସଙ୍କଟରେ ପଡ଼ିଥିଲା। ସେତେବେଳେ ଓଡ଼ିଶା ଭାରତୀୟ ପୁରୁଷ ଓ ମହିଳା ଜାତୀୟ ହକି ଦଳର ଆଧିକାରିକ ପ୍ରାୟୋଜକ ଭାବେ ଆଗକୁ ଆସିଥିଲା।
ପରବର୍ତ୍ତୀ ସମୟରେ ୪୩୪.୧୨ କୋଟି ଟଙ୍କାର ପ୍ରତିଶ୍ରୁତି ସହ ପ୍ରାୟୋଜକ ଚୁକ୍ତିକୁ ଆହୁରି ବୃଦ୍ଧି କରାଯାଇଥିଲା। ଓଡ଼ିଶାର ଏହି ସମର୍ଥନ ଭାରତୀୟ ହକିର ପୁନରୁତ୍ଥାନରେ ନୂଆ ଉର୍ଜା ଭରିଥିଲା।
ଟୋକିଓରେ ୪୧ ବର୍ଷ ପରେ ହକି ପଦକ
ଓଡ଼ିଶାର ସମର୍ଥନ ପରେ ଭାରତୀୟ ହକି ଦଳର ପ୍ରଦର୍ଶନରେ ଆସିଥିଲା ନୂଆ ଆତ୍ମବିଶ୍ୱାସ। ଟୋକିଓ ୨୦୨୦ ଅଲିମ୍ପିକ୍ସରେ ଭାରତୀୟ ପୁରୁଷ ହକି ଦଳ ବ୍ରୋଞ୍ଜ ପଦକ ଜିତିଥିଲା। ଦୀର୍ଘ ୪୧ ବର୍ଷ ପରେ ଅଲିମ୍ପିକ୍ସ ହକିରେ ଭାରତ ପଦକ ହାସଲ କରିଥିଲା।
ଦୁଇଥର ହକି ବିଶ୍ୱକପ୍, ଓଡ଼ିଶାର ଐତିହାସିକ ସଫଳତା
୨୦୧୮ ଓ ୨୦୨୩ରେ ଓଡ଼ିଶା ଦୁଇଥର ହକି ବିଶ୍ୱକପ୍ ଆୟୋଜନ କରିଥିଲା। ବିଶ୍ୱସ୍ତରୀୟ ଏହି ମହାକୁମ୍ଭର ସଫଳ ଆୟୋଜନ ଓଡ଼ିଶାର କ୍ରୀଡ଼ା ଭିତ୍ତିଭୂମି ଓ ପରିଚାଳନା କ୍ଷମତାକୁ ବିଶ୍ୱ ସମ୍ମୁଖରେ ପ୍ରଦର୍ଶିତ କରିଥିଲା।
କଳିଙ୍ଗରୁ ବିର୍ସା ମୁଣ୍ଡା ଷ୍ଟାଡିୟମ୍
ଭୁବନେଶ୍ୱରର କଳିଙ୍ଗ ଷ୍ଟାଡିୟମ୍ ସ୍ପୋର୍ଟସ କମ୍ପ୍ଲେକ୍ସ ଆଜି ଏକ ପ୍ରମୁଖ କ୍ରୀଡ଼ା କେନ୍ଦ୍ର। ଏଠାରେ ଇଣ୍ଡୋର ଆଥଲେଟିକ୍ସ ସେଣ୍ଟର, ଅତ୍ୟାଧୁନିକ ଜଳକ୍ରୀଡ଼ା କେନ୍ଦ୍ର ଏବଂ କ୍ରୀଡ଼ା ବିଜ୍ଞାନ କେନ୍ଦ୍ର ଭଳି ଆଧୁନିକ ସୁବିଧା ଗଢ଼ିଉଠିଛି।
ସେହିପରି ରାଉରକେଲାର ବିର୍ସା ମୁଣ୍ଡା ଆନ୍ତର୍ଜାତୀୟ ହକି ଷ୍ଟାଡିୟମ୍ ବିଶ୍ୱର ସର୍ବବୃହତ ହକି ଷ୍ଟାଡିୟମ୍ ଭାବେ ପରିଚିତ ହୋଇଛି।
ଯୁବ ପ୍ରତିଭା ପାଇଁ ନୂଆ ସୁଯୋଗ
କେବଳ ବଡ଼ ବଡ଼ ଷ୍ଟାଡିୟମ୍ ନୁହେଁ, ତୃଣମୂଳ ସ୍ତରରେ ମଧ୍ୟ କ୍ରୀଡ଼ାର ବିକାଶ ଉପରେ ଦିଆଯାଇଥିଲା ଗୁରୁତ୍ୱ। ବିଭିନ୍ନ ପୌରପାଳିକାରେ ୧୦୦ରୁ ଅଧିକ ବହୁମୁଖୀ ଇଣ୍ଡୋର ଷ୍ଟାଡିୟମ୍ ନିର୍ମାଣ କରାଯାଇ ଯୁବ ପ୍ରତିଭାଙ୍କ ପାଇଁ ଉଚ୍ଚସ୍ତରୀୟ ତାଲିମର ସୁଯୋଗ ସୃଷ୍ଟି କରାଯାଇଥିଲା।
ବିଶ୍ୱସ୍ତରୀୟ କ୍ରୀଡ଼ା ଗନ୍ତବ୍ୟସ୍ଥଳ ଓଡ଼ିଶା
୨୦୧୭ ଏସୀୟ ଆଥଲେଟିକ୍ସ ଚାମ୍ପିଅନସିପ୍, ୨୦୧୪ ପୁରୁଷ ହକି ଚାମ୍ପିଅନ୍ସ ଟ୍ରଫି, ଫିଫା ୧୭ ବର୍ଷରୁ କମ୍ ମହିଳା ବିଶ୍ୱକପ୍ ମ୍ୟାଚ୍ ଏବଂ ଅନ୍ତର୍ଜାତୀୟ ରଗବି ଟୁର୍ଣ୍ଣାମେଣ୍ଟ ଭଳି ବଡ଼ ବଡ଼ କ୍ରୀଡ଼ା ଇଭେଣ୍ଟ ଆୟୋଜନ କରିଛି ଓଡ଼ିଶା।
ଆଜି ଭୁବନେଶ୍ୱର ଓ ରାଉରକେଲା ଭଳି ସହର ଅନ୍ତର୍ଜାତୀୟ କ୍ରୀଡ଼ା ମାନଚିତ୍ରରେ ସ୍ୱତନ୍ତ୍ର ସ୍ଥାନ ହାସଲ କରିଛି। ଜାତୀୟ କ୍ରୀଡ଼ା ଦିବସରେ ଓଡ଼ିଶାର ଏହି କ୍ରୀଡ଼ା ଯାତ୍ରା ରାଜ୍ୟର ବିକାଶ ଓ ସଫଳତାର ଏକ ଗର୍ବର କାହାଣୀ।
