ନନ୍ଦିଘୋଷ ବ୍ୟୁରୋ : ପ୍ରକାଶ ପାଶୱାନଙ୍କ ଅପରାଧିକ କାର୍ଯ୍ୟକଳାପର ପେଡ଼ି ଖୋଲିବ କି ? ରିମାଣ୍ଡ ବେଳେ ସାମ୍ନାକୁ ଆସିବ କି ଅନେକ ଗୁପ୍ତ ତଥ୍ୟ? ଏନେଇ ତଦନ୍ତକୁ ଜୋରଦାର କରିଛି ରାଉରକେଲା ପୋଲିସ। ନିଲମ୍ବିତ ବିଜେପି ଯୁବନେତା ପ୍ରକାଶ ପାଶୱାନ ଗିରଫ ହୋଇ ଜେଲ ହାଜତରେ ଥିବାବେଳେ ରଘୁନାଥପାଲ୍ଲୀ ଥାନା ପୋଲିସ ତାଙ୍କୁ ଦୁଇ ଦିନିଆ ରିମାଣ୍ଡରେ ଆଣି ପଚରାଉଚରା ଆରମ୍ଭ କରିଛି। ରାଉରକେଲା ଜେଲ ହାଜତରୁ ପ୍ରକାଶଙ୍କୁ କଡ଼ା ସୁରକ୍ଷା ବଳୟରେ ରାଉରକେଲା ସରକାରୀ ଡାକ୍ତରଖାନାକୁ ନିଆଯାଇ ଡାକ୍ତରୀ ପରୀକ୍ଷା କରାଯିବା ପରେ ତାଙ୍କୁ ପଚରାଉଚରା ପାଇଁ ରଘୁନାଥପାଲ୍ଲୀ ଥାନାକୁ ନିଆଯାଇଛି।
ରାଉରକେଲା ସହରରେ ଚୋରା ବନ୍ଧୁକ କାରବାର ସହ ବିଭିନ୍ନ ଅପରାଧିକ କାର୍ଯ୍ୟ ପାଇଁ ଷଡ଼ଯନ୍ତ୍ର, ବେଆଇନ ଅସ୍ତ୍ରଶସ୍ତ୍ର ରଖିବା ଓ ଦାଦାବଟି ଆଦାୟ ଭଳି ବିଭିନ୍ନ ମାମଲାରେ ୧୨ ଜଣ ଅଭିଯୁକ୍ତ ଗିରଫ ହୋଇ ରାଉରକେଲା ଜେଲ ହାଜତରେ ରହିଛନ୍ତି। ଏହି ଅଭିଯୁକ୍ତମାନଙ୍କ ସହ ପ୍ରକାଶ ପାଶୱାନଙ୍କ କି ସମ୍ପର୍କ ରହିଛି ଏବଂ ଏହି ରାକେଟରେ ଆଉ କିଏ କିଏ ସମ୍ପୃକ୍ତ ଅଛନ୍ତି, ସେନେଇ ପୋଲିସ ପଚରାଉଚରା କରୁଛି।
ବନ୍ଧୁକ ଚୋରା କାରବାର ସହ ବିଭିନ୍ନ ଅପରାଧ ଘଟାଇବା ପାଇଁ ଏକ ବଡ଼ ଷଡ଼ଯନ୍ତ୍ର ହୋଇଥିବା ସନ୍ଦେହ କରାଯାଉଛି। ଏହି ରାକେଟରେ ସମ୍ପୃକ୍ତ ଅନ୍ୟ ଅଭିଯୁକ୍ତମାନଙ୍କୁ ଗିରଫ କରିବା ପାଇଁ ପୋଲିସର ଉଦ୍ୟମ ଜାରି ରହିଛି। ପ୍ରକାଶଙ୍କୁ ୫ ଦିନିଆ ରିମାଣ୍ଡରେ ନେବା ପାଇଁ ପୋଲିସ ଆବେଦନ କରିଥିଲେ ମଧ୍ୟ ଦୁଇ ଦିନିଆ ରିମାଣ୍ଡ ପାଇଁ ଅନୁମତି ମିଳିଛି। ତଦନ୍ତର ଆବଶ୍ୟକତା ଅନୁସାରେ ପୋଲିସ ପୁଣି ଅଧିକ ଦିନିଆ ରିମାଣ୍ଡ ପାଇଁ ଆବେଦନ କରିପାରେ ବୋଲି ଆଇନଜୀବୀ କହିଛନ୍ତି।
