ନନ୍ଦିଘୋଷ ବ୍ୟୁରୋ : ପାରାଦୀପ ଛାଡ଼ିଲେ ଓସେନ ଓ୍ବିନର ଜାହାଜର ଉଦ୍ଧାର ଦୁଇ କ୍ରିୟୁ ସଦସ୍ୟ । ଜାହାଜ ଏଜେନ୍ସି ସହାୟତାରେ ତାଙ୍କୁ ଏକ କାର ଯୋଗେ କୋଲକାତା ନିଆଯାଇଛି । କୋଲକାତାରୁ ଉଭୟଙ୍କୁ ଚୀନ ଦୂତାବାସକୁ ହସ୍ତାନ୍ତର କରାଯିବ ଏବଂ ସେଠାରୁ ସେମାନଙ୍କୁ ଚୀନ ପଠାଯିବାର ବ୍ୟବସ୍ଥା କରାଯିବ । ଜାହାଜର ଏଜେଣ୍ଟ ଚାଇନା ଦୂତାବାସ ସହିତ ଯୋଗାଯୋଗ କରି ଉଭୟଙ୍କ ଭିସା ଓ ପାସପୋର୍ଟ କାର୍ଯ୍ୟ ସାରିଛନ୍ତି ।
ଗତକାଲି ତଦନ୍ତକାରୀ ସଂସ୍ଥା ନିକଟରେ ସମୁଦ୍ର ଭିତରର ସଂଘର୍ଷର କାହାଣୀ ବଖାଣିଥିଲେ ଉଭୟ କ୍ରିୟୁ ସଦସ୍ୟ । ଜାହାଜ ଓସେନ୍ ଓ୍ବିନର ର ୨୪ କ୍ରିୟୁ ସଦସ୍ୟଙ୍କ ମଧ୍ୟରୁ ଉଦ୍ଧାର ହୋଇଛନ୍ତି ମାତ୍ର ଦୁଇଜଣ । ଗତ ୨୦ ତାରିଖରେ ପାରାଦୀପ ବନ୍ଦରରୁ ୭୨ ହଜାର ମେଟ୍ରିକ୍ ଟନ୍ ଲୁହାପଥର ନେଇ ଯାଉଥିବା ପଣ୍ୟବାହୀ ଜାହାଜ ଓସେନ୍ ଓ୍ବିନର ୨୩୦ ନଟିକାଲ ମାଇଲ ଦୂରରେ ହଠାତ୍ ଯୋଗାଯୋଗ ବିଚ୍ଛିନ୍ନ ହୋଇ ବୁଡିଯାଇଥିଲା। ସେମାନଙ୍କ ମଧ୍ୟରୁ ମାତ୍ର ଦୁଇଜଣଙ୍କୁ ହିଁ ଉଦ୍ଧାର କରାଯାଇଥିଲା ।
ଉଭୟ ପାରାଦୀପରେ ପହଞ୍ଚିବା ପରେ ପ୍ରାଥମିକ ଚିକିତ୍ସା ପରେ ଗତକାଲି ଭାରତୀୟ ବିଭିନ୍ନ ତଦନ୍ତକାରୀ ସଂସ୍ଥା ପକ୍ଷରୁ ଦୁଇଜଣ କନସୋଲେଟର, ଜଣେ ଆଡଭୋକେଟ୍ ଓ ଜଣେ ଭାଷା ଅନୁବାଦକଙ୍କ ଦ୍ଵାରା ଉଭୟଙ୍କୁ ଜେରା କରାଯିବା ପରେ ମିଳିଥିଲା ଚାଞ୍ଚଲ୍ୟକର ତଥ୍ୟ । ସମୁଦ୍ରରେ ଅଧିକ ରୋଲିଂ ଯୋଗୁଁ ଖୁବ୍ କମ୍ ସମୟ ମଧ୍ୟରେ ବୁଡ଼ି ଯାଇଥିଲା ଜାହାଜ ଓସେନ୍ ଓ୍ବିନର । ଜାହାଜର କ୍ୟାପଟେନ୍ ବିପଦ ସଂକେତ ଦେବା ସହିତ ସାଇରନ ବଜାଇଥିଲେ । ହେଲେ ଜାହାଜର ୨୪ ସଦସ୍ୟଙ୍କ ମଧ୍ୟରୁ ମାତ୍ର ୧୦ ଜଣ ଜାହାଜ ଉପରକୁ ଆସି ସମୁଦ୍ରକୁ ଡେଇଁ ପଡ଼ିଥିଲେ ।
ଜାହାଜ ବୁଡିବା ସମୟରେ ସମୁଦ୍ରରେ ସୃଷ୍ଟି ହୋଇଥିବା ଭଉଁରୀରେ ଫସିଯାଇ ବୁଡିଯାଇଥିଲେ ୮ ଜଣ କ୍ରିୟୁ ସଦସ୍ୟ । ଅନ୍ୟ ୧୪ ଜଣ ଜାହାଜ ଭିତରେ ହିଁ ରହିଯାଇଥିବା ଉଦ୍ଧାର କ୍ରିୟୁ ସଦସ୍ୟ ପ୍ରକାଶ କରିଥିବା ସୂଚନା ମିଳିଛି । ତେବେ ସେମାନେ ଦୀର୍ଘ ୨୦ ଘଣ୍ଟା ସମୁଦ୍ରରେ ଭାସିବା ପରେ ଭାରତ ଆସୁଥିବା ଏକ ତୈଳ ଜାହାଜ ସେମାନଙ୍କୁ ଉଦ୍ଧାର କରିଥିଲା । ଅନ୍ୟ ପକ୍ଷରେ ଏବେ ବି ଜାହାଜର ଅନ୍ୟ ସଦସ୍ୟ ଏବଂ ଜାହାଜ ବୁଡିଥିବା ସ୍ଥାନର କୌଣସି ସଠିକ୍ ତଥ୍ୟ ମିଳିପାରି ନାହିଁ । ଏବେବି ଚାଇନାର ଦୁଇଟି ଜାହାଜ ଓ ନ୍ୟାଭିର ଦୁଇଟି ଏୟାରକ୍ରାଫ୍ଟ ଦ୍ବାରା ସର୍ଚ୍ଚ ଅପରେସନ ଜାରି ରହିଛି ।
