ପୂଜାର୍ଚ୍ଚନା ପରେ ଖୋଲିଲା ହୀରାକୁଦ ଡ୍ୟାମ୍ ଗେଟ୍
ନନ୍ଦିଘୋଷ ବ୍ୟୁରୋ: ମହାନଦୀକୁ ନେଇ ବାଦ ବିବାଦ ଭିତରେ ଖୋଲିଛି ହୀରାକୁଦ ଡ୍ୟାମର ଗେଟ୍ । ପୂଜାର୍ଚ୍ଚନା ପରେ ପ୍ରଥମେ ୭ ନମ୍ବର ସ୍ଲୁଇସ ଗେଟ୍ ଖୋଲାଯାଇଛି । ପ୍ରଥମ ପର୍ଯ୍ୟାୟରେ ମୋଟ ୪ଟି ଗେଟ୍ ଖୋଲିଛି ।
ଗେଟ୍ ଖୋଲିବା ପରେ ପ୍ରଥମ ବନ୍ୟା ଜଳ ହୀରାକୁଦ ନେଇ ନିଷ୍କାସିତ ହୋଇଛି । ଏହି ପରୀପେକ୍ଷିରେ ସମସ୍ତ ତଳିଆ ଜିଲ୍ଲାକୁ ହାଇ ଆଲର୍ଟରେ ରଖାଯାଇଛି । ହୀରାକୁଦରୁ ପାଣି ଛଡ଼ା ଯାଇଥିଲେ ବି ତଳ ମୁଣ୍ଡରେ ବନ୍ୟା ହେବାର ସମ୍ଭାବନା ନଥିବା କୁହାଯାଇଛି ।
ସନ୍ଧ୍ୟାରେ ଖୋଲିବ ଆଉ ୬ ଗେଟ୍
ଚଳିତବର୍ଷର ପ୍ରଥମ ବନ୍ୟା ଜଳ ନିଷ୍କାସନ ଲାଗି ଆଜି ପ୍ରଥମେ ୪ଟି ଗେଟ ଖୋଲାଯାଇଛି । ବାମପାର୍ଶ୍ବରେ ୩ଟି ଓ ଡାହାଣ ପାର୍ଶ୍ବରେ ଗୋଟିଏ ସ୍ଲୁଇସ ଗେଟ ଖୋଲାଯାଇଥିବା କହିଛନ୍ତି ଜଳ ସଂପଦ ବିଭାଗ ସର୍ବୋଚ୍ଚ ଯନ୍ତ୍ରୀ । ଏବେ ସୁଦ୍ଧା ହୀରାକୁଦର ୪୭ ପ୍ରତିଶତ ଜଳଭଣ୍ଡାର ପୂର୍ଣ୍ଣ ହୋଇଗଲାଣି । ସେଥିପାଇଁ ଆଜି ସକାଳେ ୪ଟି ଗେଟ ଖୋଲାଯାଇଛି । ୯୪ ହଜାର କ୍ୟୁସେକ ଜଳ ଏବେ ଛଡା ଯାଉଛି । ଆଜି ସନ୍ଧ୍ୟାରେ ଆଉ ୬ଟି ଗେଟ ଖୋଲିବ । ଏହାଦ୍ୱାରା ଏକ ଲକ୍ଷ ୮୦ ହଜାର ଜଳ ହୀରାକୁଦରୁ ନିଷ୍କାସିତ ହେବ । ୩୬ରୁ ୪୮ ଘଣ୍ଟାରେ ମହାନଦୀ ଜଳ ମୁଣ୍ଡଳୀରେ ପହଞ୍ଚିବ ।
ଅନ୍ୟପକ୍ଷେ ଗତକାଲି ଛତିଶଗଡ ସହ CWCଙ୍କ ଅଧ୍ୟକ୍ଷତାରେ ବୈଠକ ହୋଇଥିଲା । ଛତିଶଗଡର ୮ ଷ୍ଟେସନରେ ଓଡ଼ିଶାର ୨୧ ଜଣ ଜଳ ସମ୍ପଦ ଅଧିକାରୀ ମହଜୁଦ ଅଛନ୍ତି । କଲମା ଗେଟ ଖୋଲାଯାଇଛି । ତେବେ ଏ ଯାଏଁ କୌଣସି ଅସୁବିଧା ହୋଇନି । କାରଣ ଜଳସ୍ତର କମ ଅଛି । ଛତିଶଗଡ ବି ସହଯୋଗ କରୁଛି । ଆଇଏମଡି କହିଛି ଜୁଲାଇ ୧୩ ପରେ ରିପୋର୍ଟ ଦେବ । ତା’ଭିତରେ ହୀରାକୁଦ ପରିଚାଳନା ହୋଇ ଯାଇଥିବ । ଯାହା ଦ୍ୱାରା ଆଗକୁ ଅନୁମାନ କରାଯାଉଥିବା ଲଘୁଚାପ ସମୟରେ ଜଳ ସଂରକ୍ଷଣ କରି ହେବ । କେଉଁଠି ବି ବନ୍ୟା ନାହିଁ । ମହାନଦୀ ଛଡା ବର୍ତ୍ତମାନ ଆଉ କେଉଁଠି ଜଳସ୍ତର ବଢିବାର ନାହିଁ । ଝାଡ଼ଖଣ୍ଡର ଚାନ୍ଦିଲି ଡ୍ୟାମରେ ବି ଏବେ ବନ୍ୟା ନାହିଁ । ଚାନ୍ଦିଲି ଡ୍ୟାମ ଝାଡ଼ଖଣ୍ଡ କରିଛି ସିନା ହେଲେ ପରିଚାଳନା କରିପାରୁନି । ଓଡ଼ିଶା ଓ ଝାଡ଼ଖଣ୍ଡ ମଧ୍ୟରେ ଏ ଦିଗରେ ଆଲୋଚନା ଚାଲିଛି ବୋଲି କହିଛନ୍ତି ସର୍ବୋଚ୍ଚ ଯନ୍ତ୍ରୀ ।
