ଭାଷଣରେ ଚାଲିଛି ଯୋଜନା, ଲୋକଙ୍କୁ ମିଳୁନି ପିଇବାକୁ ମୁନ୍ଦେ ପାଣି
ନନ୍ଦିଘୋଷ ବ୍ୟୁରୋ: ପ୍ରଚଣ୍ଡ ଦ୍ରୌଦ୍ରତାପକୁ ଅସହ୍ୟ ଗୁଳୁଗୁଳି । ସୁଖି ଗଲାଣି ଜଳ ଉତ୍ସ । ପିଇବା ପାଣି ମୁନ୍ଦେ ପାଇଁ ଉପାନ୍ତରୁ ଉପକୂଳ ଡହଳ ବିକଳ ହେଉଛନ୍ତି ଲୋକେ । ହେଲେ ପାଣି ଯୋଗାଇବାରେ ସରକାର ଫେଲ । ଖୋଦ ଭୁବନେଶ୍ଵର ଉପକଣ୍ଠରେ ପାଣି ପାଇଁ ଲୋକଙ୍କ ମଧ୍ୟରେ ଚାଲିଛି ପ୍ରତିଯୋଗିତା । ଜଟଣୀ ବ୍ଲକ ବଡ଼ତୋଟା ଗାଁର ଏକ ନମ୍ବର ୱାର୍ଡରେ ଥିବା ନଳକୂପ ଆଗରେ ଗରା, ବାଲଟି ଥୋଇ ଧାଡ଼ି ବାନ୍ଧି ଠିଆ ହେଉଛନ୍ତି ମହିଳା । ଭୂତଳ ଜଳସ୍ତର ଖସିଯିବାରୁ ସେଥିରୁ ବାହାରୁଛି ଲୌହ ମିଶ୍ରିତ ପାଣି । ହେଲେ ବିକଳ୍ପ ନଥିବାରୁ ଏହି ପାଣି ପିଇବାକୁ ଲୋକେ ବାଧ୍ୟ ହେଉଥିବା ଅଭିଯୋଗ ।
ଖୋର୍ଦ୍ଧା ଜିଲ୍ଲା ଜଟଣୀ ବ୍ଲକ ପଦନପୁର ପଞ୍ଚାୟତ ବଡ଼ତୋଟା ଗାଁରେ ଏକ ନମ୍ବର ୱାର୍ଡରେ ପାନୀୟ ଜଳ ସଙ୍କଟ ଉତ୍କଟ ରୂପ ଧାରଣ କରିଛି । ୱାର୍ଡରେ ପାଇପ ଲାଇନ ପଡ଼ିଛି, ହେଲେ ସେଥିରୁ ପାଣି ମୁନ୍ଦାଏ ବାହାରୁନି । କୂଅଟି ପରିତ୍ୟକ୍ତ ଅବସ୍ଥାରେ ପଡ଼ିରହିଛି । ଗୋଟିଏ ମାତ୍ର ନଳକୂପ ୨ ଶହ ପରିବାରଙ୍କ ପାଲଟିଛି ସାହାରା । ଭୂତଳ ଜଳସ୍ତର ଖସି ଖସି ଯିବାରୁ ଗୋଟିଏ ଗରା ପାଣି ପାଇଁ ଟ୍ୟୁବଲ ପାଖରେ ୧୦ରୁ ୧୫ ମିନିଟ ଠିଆ ହେବାକୁ ପଡୁଛି । ସେଥିରୁ ଲୁହା ମିଶ୍ରିତ ପାଣି ବାହାରୁଥିବା ୱାର୍ଡବାସୀ ଅଭିଯୋଗ କରିଛନ୍ତି ।
ପୂର୍ବ ସରକାର ପ୍ରତି ଘରକୁ ପାନୀୟ ଜଳ ଯୋଗାଇ ଦେବା ପାଇଁ ବିଭିନ୍ନ ଯୋଜନା କରିଥିଲେ । ଗ୍ରୀଷ୍ମରେ ଗାଁକୁ ଗାଁ ଟ୍ୟାଙ୍କର ମାଧ୍ୟମରେ ଜଳ ଯୋଗାଣ କରୁଥିଲେ । ସରକାର ପରିବର୍ତ୍ତନ ପରେ ଲୋକ ହିତକର ଯୋଜନା ଠପ ହୋଇଯାଇଛି । ପାନୀୟ ଜଳ ସମସ୍ୟା ସଂପର୍କରେ ୱାର୍ଡର ମହିଳାମାନେ ଜଟଣୀ ବିଡିଓଙ୍କୁ ଲିଖିତ ଅଭିଯୋଗ କରିଥିଲେ ସୁଦ୍ଧା ଫଳ ଶୂନ । ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ଅନ୍ୟପଟେ ସରପଞ୍ଚଙ୍କ ସହ ଆଲୋଚନା କରି ସମସ୍ୟାର ସମାଧାନ କରାଯିବ କହିଛନ୍ତି ବ୍ଲକ ଉନ୍ନୟନ ଅଧିକାରୀ ।
