ନନ୍ଦିଘୋଷ ବ୍ୟୁରୋ : ଯୁଦ୍ଧବିରତି ପ୍ରସ୍ତାବ ଭିତରେ ପୁଣି ଅଶାନ୍ତ ପଶ୍ଚିମ ଏସିଆ। ଲେବାନନ ରାଜଧାନୀ ବେରୁଟ, ବେକାସ ଭାଲି ସମେତ ବହୁସ୍ଥାନରେ ଇସ୍ରାଏଲର ବଡ଼ ଧରଣର ହମଲା। ୧୦ ମିନଟରେ ୧୦୦ରୁ ଅଧିକ ଟାର୍ଗେଟ ଉପରେ ହୋଇଛି ଏୟାରଷ୍ଟ୍ରାଇକ। ବେରୁଟରେ ବଡ଼ ଧରଣର ବିସ୍ଫୋରଣ ଘଟିବା ସହ ଅନେକ କୋଠା ନଷ୍ଟ ହୋଇଛି। ଲେବାନନର ପ୍ରତିରକ୍ଷା ବାହିନୀ ସୂତ୍ରରୁ କୁହାଯାଇଛି ଏହି ହମଲାରେ ୨୫୪ ଲୋକଙ୍କ ମୃତ୍ୟୁ ଘଟିଥିବାବେଳେ ୮୩୭ରୁ ଅଧିକ ଲୋକ ଆହତ ହୋଇଛନ୍ତି। ଇରାନ କହିଛି ଯୁଦ୍ଧ ବିରତି ପ୍ରସଙ୍ଗରେ ଯେଉଁ ୧୦ଟି ପ୍ରସ୍ତାବ ଦିଆଯାଇଥିଲା ସେଥିରେ ଲେବାନନ ପ୍ରସଙ୍ଗ ବି ରହିଥିଲା। ମାତ୍ର ଏହାକୁ ଅବମାନନା କରାଯାଇ ଲେବାନନ ଉପରେ ହମଲା କରାଯାଇ
ହର୍ମୁଜକୁ ସମ୍ପୂର୍ଣ୍ଣ ବନ୍ଦ କରିବାକୁ ଧମକ ଦେଇଛି ଇରାନ। ସେପଟେ ଆମେରିକା ଉପରାଷ୍ଟ୍ରପତି ଜେ.ଡି. ଭାନ୍ସ କହିଛନ୍ତି- ଯୁଦ୍ଧ ବିରତି ପ୍ରସ୍ତାବରେ ଲେବାନନ ସାମିଲ ବିଷୟରେ ଆମେରିକା ସହମତି ପ୍ରକାଶ କରି ନଥିଲା। ଗତକାଲି ୟୁଏଇ, କୁଏତ ଓ ବାହାରିନ ଉପରେ ଇରାନ ହମଲା କରିବା ପରେ ଯୁଦ୍ଧ ବିରତି ପ୍ରସ୍ତାବ ନେଇ ସସପେନ୍ସ ପ୍ରକାଶ ପାଇଥିଲା । ସେପଟେ ହର୍ମୁଜ ପ୍ରଣାଳୀ ଦେଇ ଯାଉଥିବା ଟ୍ୟାଙ୍କର ଉପରେ ବ୍ୟାରେଲ ପିଛା ୧ ଡଲାର କ୍ରିପ୍ଟୋ ଟୋଲ ଆଦାୟ ଲାଗି ଘୋଷଣା କରିଛି ଇରାନ। ବିଟକଏନ ଓ ଅନ୍ୟ ଡିଜିଟାଲ କରେନ୍ସିରେ ଏହା ଦାଖଲ କରିବାକୁ ଇରାନ କହିଛି।
