ନନ୍ଦିଘୋଷ ବ୍ୟୁରୋ : ରାଜ୍ୟସଭାର ଶୂନ୍ୟକାଳରେ ରାଜ୍ୟର ଡିଜିଟାଲ ଓ ମୋବାଇଲ ସଂଯୋଗର ସାନ୍ଦ୍ରତା ନେଇ ପ୍ରଶ୍ନ ଉଠାଇଛନ୍ତି ବିଜେଡି ସାଂସଦ ମାନସ ରଂଜନ ମଙ୍ଗରାଜ। ଗ୍ରାମାଞ୍ଚଳ ଓ ଆଦିବାସୀ ବହୁଳ ଅଞ୍ଚଳରେ ଏବେ ବି ନେଟୱର୍କ ଦୁର୍ବଳ ରହିଛି। ଇଣ୍ଟରନେଟ ସେବା ମଧ୍ୟ ଭଲ ନାହିଁ। ଏ ନେଇ ସେ ରାଜ୍ୟସଭା ଅଧ୍ୟକ୍ଷଙ୍କ ଦୃଷ୍ଟି ଆକର୍ଷଣ କରିବା ସହିତ ମାଲକାନଗିରି, କୋରାପୁଟ, ନବରଙ୍ଗପୁର, ରାୟଗଡ଼ା, କନ୍ଧମାଳ ଓ କଳାହାଣ୍ଡି ଜିଲ୍ଲାରେ ଡିିଜିଟାଲ ସେବା ବୃଦ୍ଧି କରିବାକୁ ଦାବି କରିଛନ୍ତି ମାନସ ମଙ୍ଗରାଜ। ମୋବାଇଲ ନେଟୱର୍କ ପାଇଁ ପାହାଡ଼ ଚଢିବାକୁ ପଡୁଛି। ନେଟୱର୍କ ନ ଥିବାରୁ ବିଭିନ୍ନ ସରକାରୀ ସେବା ମିଳୁନି, ପାଠପଢ଼ା ଠିକରେ ହୋଇପାରୁନି। ଏହାର ସମାଧାନ ପାଇଁ ବ୍ରଡବ୍ୟାଣ୍ଡ ସେବା ବୃଦ୍ଧି କରିବାକୁ, ଅଧିକ ମୋବାଇଲ ଟାୱାର ବସାଇବାକୁ ଦାବି କରିଛନ୍ତି ମାନସ ମଙ୍ଗରାଜ।
