ନନ୍ଦିଘୋଷ ବ୍ୟୁରୋ : ପଶ୍ଚିମବଙ୍ଗରେ ଆଜି ପ୍ରକାଶ ପାଇବ ଚୂଡ଼ାନ୍ତ ଭୋଟର ତାଲିକା l ରାଜ୍ୟରେ ହିଂସା ସମ୍ଭାବନା ଦୃଷ୍ଟିରୁ ମୁତୟନ ହେବେ 240 କମ୍ପାନି କେନ୍ଦ୍ରୀୟ ବାହିନୀ l କୋଲକାତା, ପୂର୍ବ ମେଦିନାପୁର, ଭାରତ-ବାଂଲାଦେଶ ସୀମାନ୍ତରେ ଏହି ବାହିନୀ ମୁତୟନ ହେବେ l ସେହିପରି ମାର୍ଚ୍ଚ 10 ପରେ ଆଉ 240 କମ୍ପାନି କେନ୍ଦ୍ରୀୟ ବାହିନୀକୁ ପଶ୍ଚିମବଙ୍ଗ ପଠାଯିବ l ଏନେଇ ଗୃହ ମନ୍ତ୍ରାଳୟ ପଦକ୍ଷେପ ନେଇଛି l ପଶ୍ଚିମବଙ୍ଗରେ ବିଧାନସଭା ନିର୍ବାଚନ ଏପ୍ରିଲ 15ରୁ 30 ମଧ୍ୟରେ ହେବା ସମ୍ଭାବନା ରହିଛି l ଫେବ୍ରୁଆରୀ 28ରେ ଚୂଡାନ୍ତ ଭୋଟର ତାଲିକା ପ୍ରକାଶ ଲାଗି ଇସିଆଇଙ୍କୁ ନିର୍ଦ୍ଦେଶ ଦେଇଥିଲେ ସୁପ୍ରିମକୋର୍ଟ l
ବିଶେଷ ଉତ୍ତେଜନାପ୍ରବଣ ଥିବା ଉତ୍ତର ଚବିଶ ପରଗଣାରେ ସବୁଠାରୁ ଅଧିକ ବାହିନୀ ମୁତୟନ ହେବେ l ସେମାନଙ୍କ ମଧ୍ୟରେ ରହିଛନ୍ତି CRPF, CISF, BSF, ITBP, ଓ SSB l ସେହିପରି ବାଂଲାଦେଶ ସୀମାନ୍ତରେ ଥିବା ମୁର୍ଶିଦାବାଦରେ ବି ଅଧିକ ବାହିନୀ ମୁତୟନ କରାଯିବ l କୋଲକାତା, ମାଲଦା ଓ ନଦିଆରେ 12 କମ୍ପାନୀ ନିୟୋଜିତ ହେବେ l ସେହିପରି ଦାର୍ଜିଲିଂ, କୁଚବିହାର,ପୂର୍ବ ବର୍ଦ୍ଧମାନ, ପଶ୍ଚିିମ ବର୍ଦ୍ଧମାନ, ପଶ୍ଚିମ ମେଦିନାପୁର, ପୁରୁଲିଆ, ଝାରଗ୍ରାମ ଆଦି ଜିଲ୍ଲାରେ ବି ପୋଲିସ ଓ କେନ୍ଦ୍ରୀୟ ବାହିନୀ ମୁତୟନ କରାଯିବ l
