ଭାରତର କେଉଁ ନିଷ୍ପତ୍ତି ଇରାନକୁ କରିଛି ନିରାଶ ?
ନନ୍ଦିଘୋଷ ବ୍ୟୁରୋ: ଭାରତ ଓ ଇରାନ ମଧ୍ୟରେ ସମ୍ପର୍କ ବହୁତ ଭଲ । ହେଲେ ଭାରତୀୟ ସାଂସଦରେ ବଜେଟ ପାସ ପରେ ଇରାନ ନିରାଶ ହୋଇଛି । ଯାହାକୁ ନେଇ ଇରାନ ବୈଦେଶିକ ମନ୍ତ୍ରୀ ମୁହଁ ଖୋଲିଛନ୍ତି । ଦୁଇ ଦେଶ ମଧ୍ୟରେ ରଣନୈତିକ ସ୍ତରରେ ଗୁରୁତ୍ବପୂର୍ଣ୍ଣ ଚାବାହାର ବନ୍ଦରକୁ ନେଇ ପୁଣି ଚର୍ଚ୍ଚା ଆରମ୍ଭ ହୋଇଛି । ଇରାନ ବିଦେଶମନ୍ତ୍ରୀ ଅବ୍ବାସ ଅରାଗଚି କହିଛନ୍ତି ଚାବାହାର ବନ୍ଦର ପାଇଁ ଭାରତ ଚଳିତବର୍ଷ ବଜେଟରେ କୌଣସି ଫଣ୍ଡ ଘୋଷଣା ନକରିବା ନିରାଶ କରିଛି । ଚାବାହାର ପୋର୍ଟ ହିନ୍ଦ ମହାସାମଗ କ୍ଷେତ୍ରରେ ମଧ୍ୟ ଏସିଆ ଓ ୟୁରୋପୀୟ ଦେଶଙ୍କୁ ଯୋଡ଼ିବାର ଏକ ଗୋଲଡେନ ଗେଟଓ୍ବେ ବୋଲି ସେ କହିଛନ୍ତି ।
ଅରାଗଚି ନିରାଶା ପ୍ରକାଶ କରି କହିଛନ୍ତି, ଭାରତ ଚଳିତ ବଜେଟରେ ଚାବାହାର ପୋର୍ଟ ପରିଯୋଜନା ପାଇଁ କୌଣସି ଫଣ୍ଡ ଆବଣ୍ଟନ ନକରିବାକୁ ନିଷ୍ପତ୍ତି ନେଇଛି ଯାହା ଦୁଇ ଦେଶ ପାଇଁ କ୍ଷତିକାରକ ହୋଇପାରେ ।
ସେ କହିଛନ୍ତି, ଥରେ ପ୍ରଧାନମନ୍ତ୍ରୀ ମୋଦି କହିଲେ, ଏହା ଏକ ଗୋଲଡେନ ଗେଟ୍ । ଯାହା ହିନ୍ଦ ମହାସାଗର କ୍ଷେତ୍ରକୁ ମଧ୍ୟ ଏସିଆ, କାକେଶସ ଓ ପରେ ୟୁରୋପ ସହ ଯୋଡ଼ିଥାଏ । ଏହା ଏକ ରଣନୈତିକ ପୋର୍ଟ । ଯଦି ଏହାକୁ ସମ୍ପୂର୍ଣ୍ଣ ବିକଶିତ କରାଯାଏ ତେବେ ଇରାନ ଜରିଆରେ ଏସବୁ ଅଞ୍ଚଳକୁ ଯୋଡ଼ି ହେବାକୁ ସହଜ ହେବ ।
ସେ ଆଗକୁ କହିଛନ୍ତି, ଏହା ସବୁଠାରୁ ଭଲ ମାର୍ଗ ହେବ । ମୋର ଆଶା ଅଛି, ଦିନେ ଆମେ ଏହି ବନ୍ଦର ସମ୍ପୂର୍ଣ୍ଣ ବିକଶିତ ରୂପ ଦେଖିପାରିବା । ଚାବାହାର ବନ୍ଦର ପ୍ରୋଜେକ୍ଟ ଏକ ରଣନୈତିକ ପୋର୍ଟ, ଯାହାକୁ ଭାରତ ଦକ୍ଷିଣ-ପୂର୍ବ ଇରାନର ଚାବାହାରରେ ବିକଶିତ କରାଯାଉଛି । ଏହାର ଉଦ୍ଦେଶ୍ୟ ପାକିସ୍ତାନକୁ ବାଇପାସ କରି ଆଫଗାନିସ୍ତାନ ଓ ସେଣ୍ଟ୍ରାଲ ଏସିଆ ପାଇଁ ସିଧା ବାଣିଜ୍ୟିକ ଓ ପରିବହନ ରୁଟ୍ ବନାଇବା ।
ଭାରତକୁ ଦେବାକୁ ଥିଲା ୧୦୦ କୋଟି
ଗତ କେନ୍ଦ୍ରୀୟ ବଜେଟରେ ଭାରତ ଇରାନର ଦକ୍ଷିଣ ସିସ୍ତାନ-ବଲୁଚିସ୍ତାନ ପ୍ରାନ୍ତରେ ଏହି ବଡ଼ କନେଟିଭିଟି ପ୍ରୋଜେକ୍ଟ ପାଇଁ ପ୍ରତିବର୍ଷ ୧୦୦ କୋଟି ଟଙ୍କାର ପ୍ରାବଧାନ ରଖିଥିଲା । ଏହି ଅଞ୍ଚଳରେ ଭାରତ ଏକ ମୁଖ୍ୟ ଓ ଗୁରୁତ୍ବପୂର୍ଣ୍ଣ ପାର୍ଟନର ଅଟେ । ଗତ ସେପ୍ଟେମ୍ବରରେ ଆମେରିକା ଇରାନ ଉପରେ ଆର୍ଥିକ ପ୍ରତିବନ୍ଧକ ଲଗାଇ ଥିଲା । ହେଲେ ଭାରତକୁ ଚାବାହାର ପୋର୍ଟରେ କାମ କରିବାକୁ ୬ ମାସର ସମୟ ଦେଇଥିଲା । ଏହି ସମୟ ୨୦୨୬ ଏପ୍ରିଲରେ ସରୁଛି । ଗତମାସ ବିଦେଶ ମନ୍ତ୍ରାଳୟ ପ୍ରବକ୍ତା ରଣଧିର ଜୟସଓ୍ବାଲ କହିଥିଲେ, ଚାବାହାର ପ୍ରସଙ୍ଗକୁ ନେଇ ଭାରତ ଓ୍ବାସିଂଟନ ସହ ଆଲୋଚନା କରୁଛି ।
