ରତ୍ନଭଣ୍ଡାର ଗଣତିମଣତି ପାଇଁ ଦିନ ଧାର୍ଯ୍ୟ କରିବ ଶ୍ରୀମନ୍ଦିର ପରିଚାଳନା କମିଟି
ନନ୍ଦିଘୋଷ ବ୍ୟୁରୋ: ଶ୍ରୀଜିଉଙ୍କ ରତ୍ନଅଳଙ୍କାର ଗଣତି ମଣତି ପାଇଁ ଶୁଭ ମୁହୂର୍ତ୍ତ ଓ ଦିନ ଧାର୍ଯ୍ଯ କରିବ ଶ୍ରୀମନ୍ଦିର ପରିଚାଳନା କମିଟି । ଏଥରକ ୩ଟି ଯାକ ରତ୍ନଭଣ୍ଡାର ଗଣତି ମଣତି ୧୯୭୮ ମସିହା ଗଣତି ମଣତି ତାଲିକା ସହ ମେଳକ କରାଯିବ । ରତ୍ନ ଅଳଙ୍କାର କୌଣସି ପ୍ରକାରେ ମୂଲ୍ଯାଙ୍କନ କରାଯିବନି । ରତ୍ନଭଣ୍ଡାର ଗଣତି ମଣତି ନେଇ ସରକାରଙ୍କ ୧୪ ପୃଷ୍ଠା ସମ୍ବଳିତ ଏସଓପି ଜାରି ପରେ ଆଜି ଶ୍ରୀମନ୍ଦିର ମୁଖ୍ଯ ପ୍ରଶାସକ ବୈଠକ କରି ଏପରି ସୂଚନା ଦେଇଛନ୍ତି ।
ମୁଖ୍ଯ ପ୍ରଶାସକ ସୂଚନା ଦେଇ କହିଛନ୍ତି, ପ୍ରଥମେ ବର୍ଗ ୩ରେ ଆସୁଥିବା ଚଳନ୍ତି ଭଣ୍ଡାରରେ ଥିବା ମୂଲ୍ଯବାନ ଧାତବ ଅଳଙ୍କାରର ଗଣତି ମଣତି କରାଯିବ । ପରେ ବର୍ଗ ୨ ଶ୍ରେଣୀ ଅନ୍ତର୍ଭୁକ୍ତ ବାହାର ରତ୍ନଭଣ୍ଡାରରେ ଥିବା ରତ୍ନ ଅଳଙ୍କାରର ହେବ ଗଣତି ମଣତି । ସବାଶେଷରେ ହେବ ବର୍ଗ ୧ରେ ଆସୁଥିବା ଭିତର ରତ୍ନଭଣ୍ଡାର ଗଣତିମଣତି । ସବୁ ଗଣତିମଣତିର ହେବ ଡିଜିଟାଇଜେସନ । ଗଣତିମଣତି ପାଇଁ ଦୁଇଟି ଟିମ ଗଠନ କରାଯାଇଛି । ଗୋଟିଏ ତତ୍ତ୍ବାବଧାରକ ଟିମ ଓ ଅନ୍ଯଟି କାର୍ଯ୍ଯନିର୍ବାହୀ ଟିମ । ଦୁଇଟିଯାକ ଟିମ ମୁଖ୍ଯ ପ୍ରଶାସକଙ୍କ ନିର୍ଦ୍ଦେଶରେ କାର୍ଯ୍ଯ ସମ୍ପାଦନ କରିବେ ।
ତେବେ ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ଏବର୍ଷ ରଥଯାତ୍ରାର ନୀଳାଦ୍ରି ବିଜେ ସୁଦ୍ଧା ଗଣତି ମଣତି ସମ୍ପନ୍ନ କରିବା ନେଇ ଲକ୍ଷ୍ଯ ରଖାଯାଇଛି । ଭିତର ରତ୍ନଭଣ୍ଡାର ଗଣତିମଣତି ପାଇଁ ପ୍ରତ୍ଯେକ ଦିନ ଚାବି ଟ୍ରେଜେରିରୁ ଅଣାଯିବା ସହ ଟ୍ରେଜେରିରେ ଜମା ରଖାଯିବ । ଗଣତିମଣତିରେ ସାମିଲ କାର୍ଯ୍ଯନିର୍ବାହୀ ଦଳର ପ୍ରତ୍ଯେକ ସଦସ୍ଯ ସ୍ବାକ୍ଷର କରିବେ । ଏହାକୁ କମ୍ପ୍ଯୁଟରରେ ଅପଲୋଡ କରାଯିବ । ଗଣତିମଣତି ପ୍ରକ୍ରିୟାରେ ଚାବି ଖୋଲାଠୁ ଆରମ୍ଭ କରି ରତ୍ନଅଳଙ୍କାର ଯାଞ୍ଚ ଓ ଚିହ୍ନଟ ସବୁ କାର୍ଯ୍ଯର ହେବ ଭିଡିଓଗ୍ରାଫି। ଏଥିପାଇଁ ନିୟୋଜିତ କ୍ଯାମେରାମ୍ଯାନ ଓ ଭିଡିଓଗ୍ରାଫର ମହାପ୍ରଭୁଙ୍କ ନାମରେ ନିଷ୍ଠାର ସହ କାର୍ଯ୍ଯ ସମ୍ପାଦନ ପାଇଁ ହଲପନାମା ଦେବେ । ଗଣତିମଣତି ବେଳେ ଶ୍ରଦ୍ଧାଳୁ ବାହାରକାଠରୁ ଦର୍ଶନ କରିପାରିବେ । ଯେଉଁଦିନ ଅଧିକ ନୀତିକାନ୍ତି ଥିବ ସେଦିନ ଗଣତିମଣତିର ସମୟକୁ କାଣ୍ଟଛାଣ୍ଟ କରାଯିବ । ୧୯୭୮ ମସିହାରେ ହୋଇଥିବା ରତ୍ନଅଳଙ୍କାର ଗଣତିମଣତି ୭୨ ଦିନ ପର୍ଯ୍ଯନ୍ତ ଚାଲିଥିଲା ।
