ଓଡ଼ିଶା ଷ୍ଟାଫ୍ ସିଲେକସନ କମିଶନ ଅଫସ ଆଗରେ ଏଲଟିଆର ଆଶାୟୀ ଶିକ୍ଷକ ସଂଘର ଅହୋରାତ୍ର ଧାରଣା ଜାରି ରହିଛି । ଗତ ୮ ଦିନରୁ ସେମାନେ ଅଫିସ ଆଗ ରାସ୍ତାରେ ଧାରଣା ଦେଇଛନ୍ତି । ଏହା ପୂର୍ବରୁ ବି ୨୦୨୪ ଓ ୨୦୨୫ରେ ସେମାନେ ଧାରଣା ଦେଇଥିଲେ । ଓଡ଼ିଶା ଷ୍ଟାଫ୍ ସିଲେକସନ କମିଶନ ଏଯାଏଁ ଏଲଟିଆର ଶିକ୍ଷକଙ୍କ ମେରିଟ ଲିଷ୍ଟ ପ୍ରକାଶ କରୁନି । ଯେଉଁଥିପାଇଁ ଆଜି ଆନ୍ଦୋଳନ ତୀବତ୍ରର ହେବା ସହ ସରକାର ବିରୋଧୀ ନାରାବାଜି କରିଥିଲା ଏଲଟିଆର ଆଶାୟୀ ଶିକ୍ଷକ ସଂଘ । ଆଜି ସେମାନଙ୍କ ସହ ଆଲୋଚନା କରିବାକୁ ବିଜୁ ଜନତା ଦଳ ପକ୍ଷରୁ ବିଧାୟକ ଅରୁଣ ସାହୁ ଓ ଯୁବ ସଭାପତି ଚିନ୍ମୟ ସାହୁଙ୍କ ସମେତ ଶତାଧିକ ଯୁବ ନେତା ଆସିଥିଲେ । କାହିଁକି ହାଇକୋର୍ଟଙ୍କ ନିର୍ଦ୍ଦେଶକୁ କାର୍ଯ୍ୟକାରୀ କରି ଏଲଟିଆର ଆଶାୟୀ ଶିକ୍ଷକଙ୍କ ମେରିଟ ଲିଷ୍ଟ ଓଡ଼ିଶା ଷ୍ଟାଫ୍ ସିଲେକସନ କମିଶନ ପ୍ରକାଶ କରୁନି ସେ ନେଇ ବିଜେଡି ପ୍ରଶ୍ନ କରିଛି । ଆଶାୟୀ ପରୀକ୍ଷାର୍ଥୀଙ୍କ ସହ ଆଲୋଚନା କରିବା ପରେ ଓଡ଼ିଶା ଷ୍ଟାଫ୍ ସିଲେକସନ କମିଶନ କର୍ତ୍ତୃପକ୍ଷଙ୍କୁ ଭେଟିଥିଲା ବିଜେଡି ଟିମ୍ । ଆସନ୍ତାକାଲି ସୁଦ୍ଧା ମେରିଟ ଲିଷ୍ଟ ପ୍ରକାଶ ନ ପାଇଲେ, ବିଧାନସଭା ଭିତରେ ଓ ବାହାରେ ଏଲଟିଆର ଆଶାୟୀ ଶିକ୍ଷକ ସଂଘ ସହ ମିଶି ଆନ୍ଦୋଳନ କରାଯିବା ନେଇ ଓଡ଼ିଶା ଷ୍ଟାଫ୍ ସିଲେକସନ କମିଶନ କର୍ତ୍ତୃପକ୍ଷଙ୍କୁ ରୋକଠୋକ୍ ଶୁଣାଇଛି ବିଜେଡି ।
ପୂର୍ବ ନବୀନ ପଟ୍ଟନାୟକ ସରକାର ୨୦୨୩ ମସିହାରେ ୬୦୨୫ ଏଲଟିଆର ବା ଲିଭ୍ ଟିଚର ରିଜର୍ଭ ପଦବୀ ନୂତନ ଭାବେ ପ୍ରକାଶ କରିଥିଲେ । ହାଇସ୍କୁଲ ଶିକ୍ଷକଙ୍କ କ୍ୟାଡର ୧୫ ପ୍ରତିଶତ ଥିଲା । ୨୦୨୪ ମସିହା ଅଗଷ୍ଟ ଓ ସେପ୍ଟେମ୍ବର ମାସରେ ଓଡ଼ିଶା ହାଇସ୍କୁଲ ଶିକ୍ଷକ ଆଶାୟୀ ସଂଘ ଦୁଇ ଦୁଇ ଥର ଆନ୍ଦୋଳନ କରିଥିଲେ । ଏହା ପରେ ୨୨ ଅକ୍ଟୋବରରେ ମୋହନ ସରକାର ଏଲଟିଆର ପଦବୀ ପାଇଁ ଷ୍ଟାଫ୍ ସିଲେକସନ୍ କମିଶନ ଜରିଆରେ ବିଜ୍ଞପ୍ତି ପ୍ରକାଶ କରିଥିଲେ । ଅକ୍ଟୋବର ୩୦ରୁ ଅନଲାଇନ ଆବେଦନ ଆରମ୍ଭ ହେବ ବୋଲି ବିଜ୍ଞପ୍ତିରେ ଉଲ୍ଲେଖ ଥିଲା । ଡିସେମ୍ବରରେ ପରୀକ୍ଷା ବି ହୋଇଥିଲା । ହେଲେ କେବଳ ବିଜ୍ଞାନର ମେରିଟ ଲିଷ୍ଟ ପ୍ରକାଶ ପାଇଲା । ଯେଉଁଥି ପାଇଁ କଳା, ଓଡ଼ିଆ ଓ ସଂସ୍କୃତ ଏଲଟିଆର ଆଶାୟୀ ଶିକ୍ଷକ ହାଇକୋର୍ଟ ଯାଇଥିଲେ । ଜାନୁଆରୀ ୧୬ ସୁଦ୍ଧା ମେରିଟ ଲିଷ୍ଟ ପ୍ରକାଶ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଥିଲେ ସୁଦ୍ଧା ଏହାକୁ ଓଡ଼ିଶା ଷ୍ଟାଫ ସିଲେକସନ କମିଶନ ପ୍ରକାଶ କରି ପାରି ନଥିବାରୁ ଆନ୍ଦୋଳନ ବଢିବାରେ ଲାଗିଛି ।
ଓଡ଼ିଶାରେ ବିଜେପି ସରକାରକୁ ୧୮ ମାସରୁ ଅଧିକ ସମୟ ହେଲାଣି ଶାସନକୁ ଆସିଲାଣି । ଗୋଟେ ପଟେ ବର୍ଷ ପୂର୍ତ୍ତିର ସଫଳତା ଜୋରସୋରରେ ବିଜେପି ମନେଇଲା, ହେଲେ ବାସ୍ତବରେ ୧୮ ମାସରେ ୧୮ ସରକାରୀ ପରୀକ୍ଷାରେ ବିଭ୍ରାଟ ଘଟିଛି । ସରକାରୀ ପରୀକ୍ଷା ଦୁର୍ନୀତିର ଭେଟି ଚଢୁଥିବାରୁ, ନିଯୁକ୍ତି ଆଶାୟୀଙ୍କ ଭବିଷ୍ୟତ ଅନ୍ଧାର ଆଡ଼କୁ ଠେଲି ହେଲାଣି ।
