ଭୁବନେଶ୍ବର: ଗୁରୁବାର ଭାରତ ବନ୍ଦ । ଓଡିଶାରେ ବି ବନ୍ଦ ରହିବ ଅଖଚକ । ଆନ୍ଦୋଳନକୁ ଓହ୍ଲାଇବ ୧୦ଟି ଶ୍ରମିକ ସଂଗଠନ । କଂଗ୍ରେସ, ବାମଦଳର ବନ୍ଦକୁ ସମର୍ଥନ ।ବିଜେପି କହିଲା ପଡିବନି ପ୍ରଭାବ । ମନରେଗା ଉଚ୍ଛେଦ ସହ କେନ୍ଦ୍ର ସରକାରଙ୍କ ଶ୍ରମିକ ସ୍ବାର୍ଥ ବିରୋଧୀ ୪ଟି ଶ୍ରମ କୋଡ ବାତିଲ ଓ ଅନ୍ୟାନ୍ୟ ଦାବି ନେଇ ଦେଶବ୍ୟାପୀ ବନ୍ଦ ଧର୍ମଘଟ କରିବ ଟ୍ରେଡ ୟୁନିୟନ । ୧୦ଟି ଟ୍ରେଡ ୟୁନିୟନ ସହ ଏହି ବନ୍ଦ ଧର୍ମଘଟକୁ ସମର୍ଥନ କରିଛି କଂଗ୍ରେସ ଓ ବାମଦଳ । ଅଖ ଚକ ବନ୍ଦ କରିବାକୁ ଟ୍ରେଡ ୟୁନିୟନ ଅପିଲ କରିଛି । ଫଳରେ ପରିବହନ, ବ୍ୟାଙ୍କ ଓ ସରକାରୀ କାର୍ଯ୍ୟାଳୟ ଉପରେ ବନ୍ଦ ପ୍ରଭାବ ପଡିବାର ସମ୍ଭାବନା ରହିଛି । ଏହି ଧର୍ମଘଟରେ ଦେଶର ୩୦ କୋଟି ଶ୍ରମିକ ସାମିଲ ହେବେ ବୋଲି ଟ୍ରେଡ ୟୁନିୟନ ଦାବି କରିଛି । INTUCରାଜ୍ୟ ସଭାପତି ରାମଚନ୍ଦ୍ର ଖୁଣ୍ଟିଆ କହିଛନ୍ତି କେନ୍ଦ୍ର ସରକାର ଲଗାତାର ଭାବେ ଦେଶର ଶ୍ରମଜୀବୀ ଜନଗଣକୁ ଶୋଷଣ କରୁଛନ୍ତି । ଶ୍ରମିକ, କୃଷକ, କୃଷି ଶ୍ରମିକ, ମହିଳା, ଯୁବ ଛାତ୍ରଙ୍କ ଅଧିକାର ଉପରେ ବିଜେପି ଆକ୍ରମଣ କରି ଚାଲିଛି । ଯାହାକୁ ବିରୋଧ କରି ଧର୍ମଘଟ କରାଯାଉଛି । ତେଣୁ ରାଜ୍ୟବାସୀ ଏହି ଧର୍ମଘଟକୁ ସଫଳ କରିବାକୁ ସେ ଅପିଲ କରିଛନ୍ତି । ସେପଟେ ବାମଦଳ ନେତା ନାରାୟଣ ରେଡ୍ଡୀ କହିଛନ୍ତି ସକାଳ୬ରୁ ସଂନ୍ଧ୍ୟା ୬ ଯାଏ ବନ୍ଦକୁ ସଫଳ କରିବାକୁ ବିଭିନ୍ନ ସ୍ଥାନରେ ଟ୍ରେଡ ୟୁନିୟନର କର୍ମକର୍ତ୍ତାମାନେ ରାସ୍ତାକୁ ଓହ୍ଲାଇବେ ।
ବନ୍ଦକୁ ସଫଳ କରିବାକୁ ଟ୍ରେଡ ୟୁନିୟନ ସଂଗଠନମାନେ ଅଣ୍ଟା ଭିଡ଼ିଛନ୍ତି। ଦେଶବ୍ୟାପୀ ଧର୍ମଘଟକୁ କଂଗ୍ରେସ ସମର୍ଥନ କରିଛି । ଟ୍ରେଡ ୟୁନିୟନ, ବାମଦଳ ସହ ମିଶି କଂଗ୍ରେସ ରାସ୍ତାକୁ ଓହ୍ଲାଇବ ବୋଲି ବରିଷ୍ଠ କଂଗ୍ରେସ ନେତା ସୁରେଶ କୁମାର ରାଉତରାୟ କହିଛନ୍ତି । ଅନ୍ୟପଟେ ଧର୍ମଘଟ ସଫଳ ହେବ ନାହିଁ ବୋଲି ବିଜେପି କହିଛି । କେନ୍ଦ୍ର ସରକାରଙ୍କ ନୀତି ସକାଶେ ସବୁ ମହଲରେ ଅସନ୍ତୋଷ ତୀବ୍ର ରୂପ ନେଲାଣି । ଏହା ବିରୋଧରେ ଟ୍ରେଡ ୟୁନିଅନର ଦେଶବ୍ୟାପୀ ବନ୍ଦ ଓ ଧର୍ମଘଟର କେତେ ପ୍ରଭାବ ପଡୁଛି ତାହା ଦେଖିବାର କଥା ।
କାଲି ଭାରତ ବନ୍ଦ ଡାକରା ଦେଇଛନ୍ତି ୧୦ ଶ୍ରମିକ ସଂଗଠନ
