ଭୁବନେଶ୍ବର : ଛିଡୁନି ଚତୁର୍ଥ ଆସନ ଅଙ୍କ । ପୃଥ୍ବୀରାଜ ଓ ଜଗନ୍ନାଥଙ୍କ ବୟାନ ବଢାଇଲା ସସପେନ୍ସ । ବିଜେଡି କହିଲା, ସମୟ ଆସିଲେ ନେବୁ ନିଷ୍ପତ୍ତି । ଶୃଙ୍ଖଳା ଛାଟ ଉଠାଇଲେ ଭକ୍ତ । ୪ ଆସନ । ଆଶା ଅନେକ । ଚତୁର୍ଥ ଆସନ ହେବ କାହାର ? ତାକୁ ନେଇ ସସପେନ୍ସ ଜାରି ରହିଥିବା ବେଳେ ଶାସକ ଦଳ କଷୁଛି ଅଙ୍କ। ଏହାଭିତରେ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ଦେଇଛନ୍ତି ବଡ ବୟାନ । କିଏ ଚତୁର୍ଥ ଆସନ ଜିତିବ ? କେମିତି କଣ ସମୀକରଣ ହେବ ସେ ନେଇ ସମୟକୁ ଅପେକ୍ଷା କରିବା ହିଁ ଠିକ୍ ହେବ ବୋଲି ସେ କହିଛନ୍ତି । ଗଣିତ କଣ ହେବ, ମିଶାଣ ହେଉଛି କି ଫେଡ଼ାଣ ହେଉଛି ସେ ସମୟ ମଧ୍ୟ ବହୁତ ଶୀଘ୍ର ଆସିଯିବ । ରାଜ୍ୟସଭା ଉପନିର୍ବାଚନରେ ନାମାଙ୍କନ ଦାଖଲ କରି ଚର୍ଚ୍ଚାରେ ରହିଥିବା ବିଜେପି ନେତା ଜଗନ୍ନାଥ ପ୍ରଧାନ ରାଜ୍ୟସଭା ଗଣିତ ନେଇ ମତ ରଖିଛନ୍ତି । ଦଳ ଯାହାକୁ ପଠାଇବ କାର୍ଯ୍ୟକର୍ତ୍ତା ଭାବେ ଆମେ ଗ୍ରହଣ କରିବୁ l ମତେ ନାମାଙ୍କନ ଦାଖଲ ପାଇଁ ଗତଥର ଦଳର ନିର୍ଦ୍ଦେଶ ଥିଲା । ତେଣୁ ମୁଁ ନାମାଙ୍କନ ଭରିଥିଲି l ମୁଁ ରାଜ୍ୟସଭା ଅପେକ୍ଷାରେ ନାହିଁ l
ଏପ୍ରିଲ ମାସରେ ଓଡିଶାର ୪ଟି ଆସନ ଖାଲି ପଡୁଥିବାରୁ ୨ଟି ଆସନରେ ବିଜେପି ଓ ଗୋଟିଏ ଆସନ ବିଜେଡି ହାତେଇବା ନିଶ୍ଚିତ। ଚତୁର୍ଥ ଆସନ ପାଇଁ ବିଜେଡ କିଙ୍ଗ ମେକର ସାଜିବ ବୋଲି କୁହାଯାଉଛି । ବିଜେଡି ବିଧାୟକ ଧୃବ ସାହୁ କହିଛନ୍ତି, ସମୟ ଆସିଲେ ଦଳ ନିଷ୍ପତ୍ତି ନେବ । ଅନ୍ୟପଟେ ପିସିସି ସଭାପତି କହିଛନ୍ତି, ସଂଖ୍ୟା ନଥିଲେ ମଧ୍ୟ ଆମେ ପ୍ରାର୍ଥୀ ଦେବୁ । ରାଜ୍ୟସଭା ନିର୍ବାଚନ ନେଇ କଂଗ୍ରେସ ବିଧାୟକଙ୍କୁ ଶୃଙ୍ଖଳା ଛାଟ ଦେଖାଇଛନ୍ତି ଭକ୍ତ । ରାଜ୍ୟସଭାର ଚତୁର୍ଥ ଆସନ ପାଇଁ କାହା ପାଖରେ ସଂଖ୍ୟା ନାହିଁ । ଦୁଇ ଜାତୀୟ ଦଳ ବିଜେପି ଓ କଂଗ୍ରେସ ସଂଖ୍ୟା ହାତେଇବା ପାଇଁ ବିଜେଡି ଉପରେ ନିର୍ଭର କରିଛନ୍ତି ।
