କଟକ : ହୃଦରୋଗୀଙ୍କ ପାଇଁ ଦେବଦୂତ ସାଜିବେ ଦେବଶ୍ରିତା । କଟକର ଝିଅ ତିଆରି କରିଛନ୍ତି ହାର୍ଟ ଗାର୍ଡ । ନିଜର ଅନ୍ତର୍ନିହିତ ଜ୍ଞାନ କୌଶଳରୁ ବ୍ୟବହାର କରି ଉଦଭାବନ କରିଛନ୍ତି ସ୍ବତନ୍ତ୍ର ଡିଭାଇସ୍ । ରେଭେନ୍ସା ବିଶ୍ଵ ବିଦ୍ୟାଳୟ ବିଏସସି, ଆଇଟିଏମ୍ ବିଭାଗର ତୃତୀୟ ବର୍ଷ ଛାତ୍ରୀ ଦେବଶ୍ରିତା ଦାସ । ସେ ନିର୍ମାଣ କରିଥିବା ହାର୍ଟ ଗାର୍ଡକୁ ମାସ୍କ୍ ଭଳି ପିନ୍ଧିବାକୁ ପଡ଼ିଥାଏ । ବିଶେଷ କରି ଯେଉଁ ମାନେ ହୃଦରୋଗରେ ପୀଡ଼ିତ ଅଛନ୍ତି କିମ୍ବା ତାଙ୍କ ଠାରେ କୌଣସି ଲକ୍ଷଣ ଦେଖା ଦେଇଛି ତେବେ ସେମାନେ ଏହି ହାର୍ଟ ଗାର୍ଡ କୁ ପରିଧାନ କରିପାରିବେ । ଯେତେବେଳେ ହୃଦଘାତର ସମ୍ଭାବନା ଆସିବ ସେତେବେଳେ ଏହି ଡିଭାଇସ ଟିକୁ ଖାଲି ସ୍ପର୍ଶ କରିଦେଲ ତୁରନ୍ତ ଏହା ଆକ୍ଟିଭ ହୋଇଯିବ । ଏହାପରେ ପ୍ରାଥମିକ ସପୋର୍ଟ ଦେବାସହ, ଅକ୍ସିଜେନ୍ ଓ ଉକ୍ତ ବ୍ୟକ୍ତିଙ୍କ ଘର ଲୋକଙ୍କୁ ମେସେଜ ଯୋଗେ ଆଲର୍ଟ କରେଇଦେବ । ସଂପୂର୍ଣ୍ଣ ଭାବେ ଏ ଆଇ ଦ୍ଵାରା ଓ ଦୀର୍ଘ ସ୍ଥାୟୀ ଭାବେ ଏହି ଡିଭାଇସଟି ପରିଚାଳିତ ହେବ । ଖାଲି ସେତିକି ନୁହେଁ ହୃଦଘାତର ଶିକାର ବ୍ୟକ୍ତିଙ୍କ ସଠିକ୍ ଲୋକେଶନ ମଧ୍ୟ ଜଣାଇଦେବ । ଆଇଆଇଟି ବମ୍ବେର ଟେକ୍ନିକାଲ ସପୋର୍ଟ ନେଇ ଏହି ଡିଭାଇଜ୍ ତିଆରି କରିଛନ୍ତି ଦେବଶ୍ରିତା । ବର୍ତ୍ତମାନ ଏହାର ସଫଳ ପରୀକ୍ଷଣ ହୋଇଥିଲେ ସୁଦ୍ଧା ଅର୍ଥାଭାବ ପ୍ରୋଜେକ୍ଟକୁ ଆଗକୁ ବଢ଼ିବାରେ ଅଙ୍କୁଶ ଲଗାଇଛି । କେବଳ ପ୍ରୋଜେକ୍ଟ ଟି ପାଇଁ ପ୍ରାଇଜ୍ ପାଇଥିବା ଏକ ଲକ୍ଷ ଟଙ୍କା ଓ ଘରୁ ୨୦ ହଜାର ଏମିତିକି ମୋଟ ୧ ଲକ୍ଷ କୋଡିଏ ହଜାର ଟଙ୍କା ବର୍ତ୍ତମାନ ସୁଦ୍ଧା ଖର୍ଚ୍ଚ କରି ସାରିଲାଣି ଦେବଶ୍ରିତା । କିନ୍ତୁ ଏହାକୁ ସମୂର୍ଣ୍ଣ କରିବା ପାଇଁ ପାଖାପାଖି ୬ ରୁ ୭ଲକ୍ଷ ଟଙ୍କା ଆବଶ୍ୟକ । ଯାହା ବର୍ତ୍ତମାନ ଚିନ୍ତାର କାରଣ ପାଲଟିଛି । ଯଦି ସରକାରୀ ସହାୟତା ଦିଆଯାଏ ତେବେ ଏହା ସଫଳ ଭାବେ ପ୍ରୋଜେକ୍ଟ ସଂପୂର୍ଣ୍ଣ ହେବ ।
ପିଲାଟି ବେଳୁ ମେଧାବୀ ଛାତ୍ରୀ ଥିବା ଦେବଶ୍ରିତା ଅନେକ ବାଧାବିଘ୍ନ ଓ ଆର୍ଥିକ ଦୂରାବସ୍ଥା ମଧ୍ୟରେ ଗତି କରି ପାଖାପାଖି ୨ ବର୍ଷ ସମୟ ଖର୍ଚ୍ଚ କରି ଏହି ହାର୍ଟ ଗାର୍ଡ ଡିଭାଇସ୍ ତିଆରି କରିଛନ୍ତି । ଆଗକୁ ବଢିବା ସହ ଏହି ପ୍ରୋଜେକ୍ଟ ପୁରା କରିବା ପାଇଁ ସରକାରୀ ସହାୟତା ପାଇଁ ନିବେଦନ କରିଛନ୍ତି ମାଆ ଅର୍ପିତା । ସେହିଭଳି ପଡୋଶୀ ମାନେ ମଧ୍ୟ ଦେବଶ୍ରିତାଙ୍କ ଏହି ପ୍ରୋଜେକ୍ଟ ପାଇଁ ସରକାରୀ ସହାୟତା ପାଇଁ ଅନୁରୋଧ କରିଛନ୍ତି । ସ୍ୱଦେଶୀ ଜ୍ଞାନ କୌଶଳରେ ଏହିଭଳି ଡିଭାଇସ୍ ତିଆରି କରିଥିବା ଦେବଶ୍ରିତାଙ୍କୁ ସରକାରୀ ସ୍ତରରେ ଅଧିକ ପ୍ରୋତ୍ସାହନ ମିଳିଲେ ହୁଏତ ଅନେକ ଜୀବନ ବଞ୍ଚିପରିବ ।
ଦେବାଶ୍ରିତା ତିଆରି କରିଛନ୍ତି ହାର୍ଟ ଗାର୍ଡ, ଉଦଭାବନ କଲେ ସ୍ବତନ୍ତ୍ର ଡିଭାଇସ୍
