ରାଜ୍ୟସଭା ଅଙ୍କକଷା: ଚତୁର୍ଥ ଆସନ ପାଇଁ କିଙ୍ଗ ମେକର ବନିବେ କି ନବୀନ
ନନ୍ଦିଘୋଷ ବ୍ୟୁରୋ: ରାଜ୍ୟସଭା ନିର୍ବାଚନରେ ଚତୁର୍ଥ ଆସନ ପାଇଁ ଖୁବଶୀଘ୍ର ବିଜେଡି ସଭାପତି ନବୀନ ପଟ୍ଟନାୟକଙ୍କୁ ଭେଟିବେ ପିସିସି ସଭାପତି ଭକ୍ତଚରଣ ଦାସ । ପିସିସି ସଭାପତି କହିଛନ୍ତି, ଆମେ ଜାଣିଛୁ ଜିତି ପାରିବୁନି ହେଲେ ରାଜ୍ୟର ସ୍ବାର୍ଥ ପାଇଁ ଆମେ ରାଜ୍ୟସଭା ନିର୍ବାଚନ ଲଢିବୁ । ଯାହାକୁ ନେଇ ରାଜ୍ୟସଭା ଗଣିତ ଚର୍ଚ୍ଚା ଥମିବାର ନାଁ ନେଉନାହିଁ । ବିଜେଡି କହିଛି ଚତୁର୍ଥ ଆସନ ଜିତିବା ପାଇଁ ଆମେ ଚେଷ୍ଟା କରିବୁ । ରାଜ୍ୟସଭା ନିର୍ବାଚନ ପ୍ରସଙ୍ଗରେ ଚିରାଚରିତ ଉତ୍ତର ରଖିଛି ବିଜେପି ।
ସଂଖ୍ୟା ନାହିଁ । ହେଲେ ଦଳର ମର୍ଯ୍ୟାଦା ପାଇଁ ଲଢିବ କଂଗ୍ରେସ । ଦିନେ କି ଦୁଇଦିନ ଭିତରେ ବିଜେଡି ସଭାପତି ନବୀନ ପଟ୍ଟନାୟକଙ୍କୁ ଭେଟି ଆଲୋଚନା କରିବେ ପିସିସି ସଭାପତି । ରାଜ୍ୟସଭାର ଚତୁର୍ଥ ଆସନ ପାଇଁ ଦୁଇ ଜାତୀୟ ଦଳ ବିଜେପି ଓ କଂଗ୍ରେସ ପାଖରେ ଆବଶ୍ୟକ ସଂଖ୍ୟା ନାହିଁ । କଂଗ୍ରେସ ପାଖରେ ୧୪ ଜଣ ବିଧାୟକ ଥାଇ ଦଳ ରାଜ୍ୟସଭାରେ ପ୍ରାର୍ଥୀ ଦେବା ପାଇଁ କସରତ ଜାରି ରଖିଛି । ପିସିସି ସଭାପତି ଭକ୍ତ ଦାସ କହିଛନ୍ତି ରାଜ୍ୟସଭା ନିର୍ବାଚନ ଉପରେ ଆଲୋଚନା କରିବା ପାଇଁ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ଭେଟିବାକୁ ସମୟ ମାଗିଥିଲି । ଖୁବଶୀଘ୍ର ନବୀନ ପଟ୍ଟନାୟକ ଭେଟି ଆଲୋଚନା କରିବି । ଅନ୍ୟପଟେ ଏ ପ୍ରସଙ୍ଗରେ ସଂସଦୀୟ ମନ୍ତ୍ରୀ ମୁକେଶ ମହାଲିଙ୍ଗ କିଛି ମତ ରଖିବାକୁ ମନା କରିଥିବା ବେଳେ ସଂଖ୍ୟା ନଥାଇ ମଧ୍ୟ ଯୋଗାଣ ମନ୍ତ୍ରୀ କହିଛନ୍ତି ୪ଟି ଆସନ ବିଜେପି ନେବ ।
ବିଜେପି ଓ କଂଗ୍ରେସ ବିଜେଡିର ସହଯୋଗ ଲୋଡିବା ପ୍ରସଙ୍ଗରେ ବିଜେଡି କହିଛି, ସମୟ ଆସିଲେ ବିରୋଧୀ ଦଳ ନେତା ନିଷ୍ପତ୍ତି ନେବେ । ବିଜେଡି ବିଧାୟକ ପ୍ରଦୀପ ଦିଶାରୀ କହିଛନ୍ତି ରାଜ୍ୟସଭା ନିର୍ବାଚନରେ ଚତୁର୍ଥ ଆସନ କିପରି ବିଜେଡି ଖାତାକୁ ଯିବ ତାହା ଉପରେ ନଜର ରହିଛି । ଦୁଇ ଜାତୀୟ ଦଳ ସହଯୋଗ ମାଗିବା କଥାରେ ଦଳର ସଭାପତି ନବୀନ ପଟ୍ଟନାୟକ ହିଁ ଶେଷ ନିଷ୍ପତ୍ତି ନେବେ ବୋଲି ସେ କହିଛନ୍ତି ।
ଏପ୍ରିଲ ମାସରେ ଓଡ଼ିଶାର ୪ଟି ଆସନ ଖାଲି ପଡୁଥିବାରୁ ୨ଟି ଆସନରେ ବିଜେପି ଓ ଗୋଟିଏ ଆସନ ବିଜେଡି ହାତେଇବା ନିଶ୍ଚିତ । ଚତୁର୍ଥ ଆସନ ପାଇଁ ନବୀନ କିଙ୍ଗ ମେକର ସାଜିଥିବାରୁ ସମସ୍ତଙ୍କ ନଜର ଏବେ ବିଜେଡି ଉପରେ ।
