ନନ୍ଦିଘୋଷ ବ୍ୟୁରୋ : କେବେ କାର୍ଯ୍ୟକ୍ଷମ ହେବ ଅକ୍ସିଜେନ ପ୍ଲାଣ୍ଟ । ନିର୍ମାଣର ୫ ବର୍ଷ ପରେ ବି ହେଉନି କାର୍ଯ୍ୟକାରୀ । କୋଭିଡ ସମୟରେ ଗୁରୁତର ରୋଗୀଙ୍କୁ ଅକ୍ସିଜେନ ଯୋଗାଇଦେବା ଲକ୍ଷ୍ୟରେ ଗୁଣୁପୁର ଉପଖଣ୍ଡ ମେଡିକାଲ ପରିସରରେ ଅକ୍ସିଜେନ ପ୍ଳାଣ୍ଟ ସ୍ଥାପନ କରାଯାଇଥିଲା । ହେଲେ ପ୍ଲାଣ୍ଟଟି କାର୍ଯ୍ୟକ୍ଷମ ହୋଇପାରୁନି । ଏହାକୁ ନେଇ ପ୍ରକାଶ ପାଇଛି ଅସନ୍ତୋଷ।
କୋମାରେ ଅକ୍ସିଜେନ ପ୍ଲାଣ୍ଟ । ଲାଗୁନି ରୋଗୀଙ୍କ ହିତରେ । ନିର୍ମାଣର ୫ ବର୍ଷ ପରେ ବି ହେଉନି କାର୍ଯ୍ୟକ୍ଷମ । ନିଘୋଡ଼ ନିଦ୍ରାରେ ଜିଲ୍ଲା ସ୍ଵାସ୍ଥ୍ୟ ବିଭାଗ । କୋଭିଡ ସମୟରେ ଗୁରୁତର ରୋଗୀଙ୍କୁ ଅକ୍ସିଜେନ ଯୋଗାଇଦେବା ଲକ୍ଷ୍ୟରେ ରାୟଗଡ ଜିଲ୍ଲା ଗୁଣୁପୁର ଉପଖଣ୍ଡ ମେଡିକାଲ ପରିସରରେ ଅକ୍ସିଜେନ ପ୍ଲାଣ୍ଟ ସ୍ଥାପନ କରାଯାଇଥିଲା । ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ପକ୍ଷରୁ ୨ କୋଟିରୁ ଉର୍ଦ୍ଧ୍ଵ ଟଙ୍କାରେ ନିର୍ମାଣ ହୋଇଥିବା ପ୍ଲାଣ୍ଟର ଦାୟିତ୍ଵ ହିନ୍ଦୁସ୍ଥାନ ପେଟ୍ରୋଲିୟମ କର୍ପୋରେସେନକୁ ଦିଆଯାଇଥିଲା । ଦୀର୍ଘ ଦିନ ହେଲା ୪୫୦ ଏଲ.ପି.ଏମ୍ କ୍ଷମତା ବିଶିଷ୍ଟ ପ୍ଲାଣ୍ଟ କାମ ସରିଲାଣି । ବିଭିନ୍ନ ୱାର୍ଡକୁ ଅକ୍ସିଜେନ ଯୋଗାଇବା ପାଇଁ ପାଇପ ଲାଇନ ବିଛା ବି ସରିଛି । ହେଲେ ଅକ୍ସିଜେନ ପ୍ଲାଣ୍ଟ କାର୍ଯ୍ୟକ୍ଷମ ହୋଇନଥିବାରୁ ପ୍ରକାଶ ପାଇଛି ପ୍ରତିକ୍ରିୟା।
ଗୁଣପୁର ଉପଖଣ୍ଡ ମେଡିକାଲ ଉପରେ ଦୈନିକ ଶତାଧିକ ରୋଗୀ ନିର୍ଭର କରନ୍ତି । ହେଲେ ମେଡିକାଲରେ ଭିତ୍ତିଭୂମି ସୁଦୃଢ ନଥିବାରୁ ରୋଗୀମାନେ ଉତ୍ତମ ସ୍ଵାସ୍ଥ୍ୟସେବା ପାଇବାରୁ ବଞ୍ଚିତ ହେଉଛନ୍ତି। ଗୁଣୁପୁର ଉପଖଣ୍ଡ ଚିକିତ୍ସାଳୟରେ ନିର୍ମାଣଧୀନ ପ୍ଲାଣ୍ଟଟି ଯାନ୍ତ୍ରିକ ତୃଟି କାରଣରୁ ଅଚଳ ଅଛି ବୋଲି କହିଛନ୍ତି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ।
