କର୍ଣ୍ଣାଟକ ମୁଖ୍ୟମନ୍ତ୍ରୀ ଚୌକି ବିବାଦ: ସିଦ୍ଦରମୈୟାଙ୍କୁ ଭେଟିଲେ ଶିବକୁମାର
ନନ୍ଦିଘୋଷ ବ୍ୟୁରୋ: କର୍ଣ୍ଣାଟକରେ ମୁଖ୍ୟମନ୍ତ୍ରୀ ଚୌକିକୁ ନେଇ ଥମୁନି ବିବାଦ । ମୁଖ୍ୟମନ୍ତ୍ରୀ ସିଦ୍ଦରମୈୟାଙ୍କୁ ବାସଭବନରେ ଭେଟିଛନ୍ତି ଉପମୁଖ୍ୟମନ୍ତ୍ରୀ ଡିକେ ଶିବକୁମାର । ବ୍ରେକଫାଷ୍ଟ ମିଟିଂରେ ଉଭୟଙ୍କ ମଧ୍ୟରେ ଗୁରୁତ୍ଵପୂର୍ଣ୍ଣ ପ୍ରସଙ୍ଗ ନେଇ ଆଲୋଚନା ହୋଇଥିବା ଜଣାପଡ଼ିଛି ।
ବୈଠକରେ ପରେ ଉଭୟ ପ୍ରେସମିଟ କରିଥିଲେ । ପରସ୍ପରଙ୍କ ମଧ୍ୟରେ କୌଣସି ମତଭେଦ ନଥିବା କହିଥିଲେ ମୁଖ୍ୟମନ୍ତ୍ରୀ ସିଦ୍ଦରମୈୟା ଓ ଉପମୁଖ୍ୟମନ୍ତ୍ରୀ ଡିକେ ଶିବକୁମାର । ଦଳ ଯାହା ନିଷ୍ପତ୍ତି ନେବ ଏହାକୁ ଗ୍ରହଣ କରିବେ ବୋଲି କହିଥିଲେ ସିଦ୍ଦରମୈୟା । ସୋସିଆଲ ମିଡିଆରେ ପରସ୍ପରକୁ ମେସେଜକୁ ନେଇ କଡ଼ା ନିର୍ଦ୍ଦେଶ ଜାରି କରିଥିଲେ କଂଗ୍ରେସ ମହାସଚିବ କେସି ଭେନୁଗୋପାଳ । ସେ ସ୍ପଷ୍ଟ ଭାବରେ କହିଥିଲେ, ସୋସିଆଲ ମିଡିଆରେ ପରସ୍ପର ଉପରେ ମନ୍ତବ୍ୟ ଦେବା କଂଗ୍ରେସ ପରମ୍ପରା ନୁହେଁ । ଦିଲ୍ଲୀ ଆସିବା ପୂର୍ବରୁ ସମସ୍ତ ମତଭେଦକୁ ସୌହାର୍ଦ୍ଦ୍ୟପୂର୍ଣ୍ଣ ଭାବରେ ସମାଧାନ କରିବା ଉଚିତ ।
ସେପଟେ ଆଜି ଦିଲ୍ଲୀରେ ବସିଛି ବଡ଼ ଧରଣର ବୈଠକ । ଏଆଇସିସି ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଡାକିଥିବା ବୈଠକରେ ସାମିଲ ହୋଇଛନ୍ତି ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ସମେତ ଦଳର ବହୁ ବରିଷ୍ଠ ନେତା । ଏଥିରେ ମୁଖ୍ୟମନ୍ତ୍ରୀ ସିଦ୍ଦରମୈୟା ଓ ଉପମୁଖ୍ୟମନ୍ତ୍ରୀ ଡି.କେ. ଶିବକୁମାରଙ୍କ ମଧ୍ୟରେ ଚାଲିଥିବା ଶୀତଳ ଯୁଦ୍ଧର ଅବସାନ ଲାଗି ହୋଇପାରେ ଆଲୋଚନା । ଅଢ଼େଇ ବର୍ଷିଆ ମୁଖ୍ୟମନ୍ତ୍ରୀ ପରିବର୍ତ୍ତନ ନିଷ୍ପତ୍ତିକୁ କାର୍ଯ୍ୟକାରୀ କରିବା ଲାଗି ଏହି ବୈଠକରେ ନିଆଯାଇପାରେ ନିଷ୍ପତ୍ତି । ସିଦ୍ଦରମୈୟା ସରକାର ନଭେମ୍ବର ୨୦ ତାରିଖରେ ତାଙ୍କର ଅଢ଼େଇ ବର୍ଷର କାର୍ଯ୍ୟକାଳ ପୂରଣ କରିଥିଲା । ଯାହା ନେତୃତ୍ୱ ପରିବର୍ତ୍ତନ ନେଇ କଳ୍ପନାଜଳ୍ପନା ସୃଷ୍ଟି କରିଥିଲା । ଶିବକୁମାରଙ୍କ ସମର୍ଥକମାନେ ତାଙ୍କ ପ୍ରାର୍ଥିତ୍ୱ ପାଇଁ ବାରମ୍ବାର ଦାବି କରି ଆସୁଛନ୍ତି ।
