ରାଜ୍ୟର ସବୁଠୁ ବଡ଼ ସରକାରୀ ହସ୍ପିଟାଲ କଟକ ଏସସିବି । ସୁରକ୍ଷା ଦାୟିତ୍ବରେ ମାଳ ମାଳ ସୁରକ୍ଷା କର୍ମଚାରୀ । ହେଲେ କ୍ୟାମ୍ପସ ଭିତରେ ନିଜକୁ ସୁରକ୍ଷିତ ମଣୁନାହାନ୍ତି ରୋଗୀ । ଗତ ରବିବାର ହସ୍ପିଟାଲର ନୂଆ ମେଡ଼ିସିନ୍ ICUରେ ରୋଗୀଙ୍କୁ ଅସଦାରଣ ଘଟଣା ପରେ ଏବେ ଚର୍ଚ୍ଚାରେ ଏହି ହସ୍ପିଟାଲ । ନିଶାଶକ୍ତ ଅବସ୍ଥାରେ ଅଭିଯୁକ୍ତ ମାନସ ରଞ୍ଜନ ପତି ଆଉ ଜଣେ ରୋଗୀଙ୍କୁ ଆଇସିୟୁରେ ଭର୍ତ୍ତି କରିବାକୁ ଯାଇଥିବା ସମୟରେ ଚିକିତ୍ସିତ ହେଉଥିବା ଆଉ ଜଣେ ଯୁବତୀଙ୍କୁ ପାଣି ଦେବା ବାହାନାରେ ଅସଦାଚରଣ କରିଥିଲା । ଏନେଇ ରୋଗୀଙ୍କ ପରିବାର ପକ୍ଷରୁ ମଙ୍ଗଳାବାଗ ଥାନାରେ ଅଭିଯୋଗ ହୋଇଥିଲା । ଅଭିଯୋଗ ପରେ ଯୁବକଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ଦୀର୍ଘ ବର୍ଷ ଧରି ଏସିବିର ମଞ୍ଜୁଶ୍ରୀ ଆଉଟ ସୋରଶିଙ୍ଗରେ କାର୍ଯ୍ୟରତ ଥିଲା ମାନସ ।ତା ଘର ଯାଜପୁର ଜିଲ୍ଲାରେ ହୋଇଥିବା ବେଳେ କଟକରେ ମାଛୁଆ ବଜାର ଅଞ୍ଚଳରେ ଭଡ଼ାରେ ରହୁଥିଲା । ତେବେ ଏଭଳି ଲଜ୍ଜା ଜନକ ଘଟଣା ଘଟାଇବା ପରେ ଏବେ ମାନସ ଗିରଫ ହୋଇଛି ।
ଏଭଳି ଘଟଣା ଘଟିବା ପରେ ଏସସିବିକୁ ଆସୁଥିବା ହଜାର ହଜାର ରୋଗୀଙ୍କ ସୁରକ୍ଷା ଉପରେ ସୃଷ୍ଟି ହୋଇଛି ପ୍ରଶ୍ନବାଚୀ । ଏମିତିକି ଏସସିବି ଓ ଠିକା ସଂସ୍ଥା ମଧ୍ୟରେ ମଧୁଚନ୍ଦ୍ରିକା ଚାଲିଥିବା ଅଭିଯୋଗ ଆଣିଛନ୍ତି ସମାଜସେବୀ । ଏହି ଘଟଣା ଲୋକ ଲୋଚନକୁ ଆସିଥିବା ବେଳେ ଆହୁରି ଅନେକ ସମ୍ବେଦନଶୀଳ ଘଟଣାକୁ ଲୁକ୍କାୟିତ ରଖାଯାଇଥିବା ଅଭିଯୋଗ ହୋଇଛି । ବିଗତ ବର୍ଷରେ କାର୍ଡ଼ିଓଲୋଜି ବିଭାଗରେ ଜଣେ ମହିଳାଙ୍କୁ ଅସଦାଚରଣ କରିଥିଲେ ଜଣେ ଡ଼ାକ୍ତର । ବାରମ୍ବାର ଏଭଳି ଘଟଣା ପରେ କଟକ ଏସସିବି କଳଙ୍କର ମୁକୁଟ ମୁଣ୍ଡାଉଥିବା କୁହାଯାଇଛି । ଏ ସମ୍ପର୍କରେ କ୍ୟାମେରା ଆଗରେ କୌଣସି ପ୍ରତିକ୍ରିୟା ଦେବାକୁ ଦୂରେଇ ରହିଥିଲେ ଏସସିବି କର୍ତ୍ତୃପକ୍ଷ ।
