ଶିକ୍ଷାଗତ ଯୋଗ୍ୟତା MBA । କିନ୍ତୁ ଜୀବିକା ଗୋପାଳନ । ନବରଙ୍ଗପୁର ଜିଲ୍ଲା ତାରାଗାଁ ଗ୍ରାମର ସଫଳ ଚାଷୀ ଇରଫାନ ଖାନ। MBA ଡିଗ୍ରୀ ହାସଲ ପରେ କୋଣସି କମ୍ପାନୀରେ ଚାକରି କରି ବହୁ ଅର୍ଥ ଉପାର୍ଜନ କରି ପାରିଥାନ୍ତେ। କିନ୍ତୁ ଆଜି ଗୋପାଳନ କରି ନିଜେ ରୋଜଗାରକ୍ଷମ ହେବା ସହ ଦଶ ଜଣଙ୍କୁ ନିଜ ଡାଇରୀ ଫାର୍ମରେ ରୋଜଗାରର ସୁଯୋଗ ଦେଇଛନ୍ତି। ୨୦୧୩ ମସିହାରୁ ଅତ୍ୟାଧୁନିକ ଗୋଶାଳା କରି ଜର୍ସି ଓ ଏଚ୍ଏଫ୍ ଜାତୀୟ ଗାଈ ଓ ମଇଁଷି ପାଳନ କରୁଛନ୍ତି । ଆଜି ଇରଫାନଙ୍କ ଡାଇରୀ ଫାର୍ମରେ ଷାଠିଏରୁ ଅଧିକ ଗାଈ ଥିବା ବେଳେ ପ୍ରତିଦିନ ୫ଶହ ଲିଟରରୁ ଅଧିକ କ୍ଷୀର ଉତ୍ପାଦନ କରି ବଜାରରେ ବିକ୍ରି କରୁଛନ୍ତି । ଗୋପାଳନ କରି ବାର୍ଷିକ ୧୨ ରୁ ୧୫ ଲକ୍ଷ ଲାଭ ପାଉଥିବା ସେ କହିଛନ୍ତି।
ମାତ୍ର ଚାରୋଟି ଗାଈରୁ ଫାର୍ମ ଆରମ୍ଭ କରିଥିଲେ ଇରଫାନ। ବର୍ତ୍ତମାନ ଇରଫାନଙ୍କ ପାଖରେ ଷାଠିଏଟି ଗାଈ ଓ ମଇଁଷି ଅଛନ୍ତି । ଏମାନଙ୍କ ପାଇଁ ଅତ୍ୟାଧୁନିକ ଘର, ଖାଦ୍ୟ, ପିଇବା ପାଣି ବ୍ୟବସ୍ଥା ସହ ମେସିନ ଯୋଗେ କ୍ଷୀର ସଂଗ୍ରହ କରାଯାଉଛି । ଦୈନିକ ପାଞ୍ଚ ସହ ଲିଟର କ୍ଷୀର ସଂଗ୍ରହ ହେଉଛି । ପ୍ରତିବର୍ଷ ଆଠରୁ ଦଶଟି ବାଛୁରୀ ସେ ବିକ୍ରି କରନ୍ତି । ମୋଟାମୋଟି ବାର୍ଷିକ ବାରରୁ ଚଉଦ ଲକ୍ଷ ଟଙ୍କା ରୋଜଗାର ହେଉଥିବା ସେ କହିଛନ୍ତି। ଏହି ଡାଏରି ଫାର୍ମ ପାଇଁ ୭୦ ଲକ୍ଷ ଟଙ୍କା ବ୍ୟାଙ୍କ ଋଣ ମଧ୍ୟ କରିଛନ୍ତି । ଗାଈଙ୍କୁ ପୁଷ୍ଟିକର ଓ ପ୍ରାକୃତିକ ଖାଦ୍ୟ ଉପରେ ଗୁରୁତ୍ବ ଦେଉଛନ୍ତି । ଏଣୁ ନିଜ ଫାର୍ମରେ ଗୋଖାଦ୍ୟ ପ୍ରସ୍ତୁତ କରନ୍ତି ଇରଫାନ । ମକା ଓ ଘାସ ଗଛକୁ କାଟି ସାଇଲେସ ପ୍ରସ୍ତୁତ କରି ଗାଈମାନଙ୍କୁ ଖାଇବାକୁ ଦେଉଛନ୍ତି। ସେମାନଙ୍କ ସ୍ବାସ୍ଥ୍ୟ ପ୍ରତି ଯତ୍ନବାନ ହେବା ସହ ନବରଙ୍ଗପୁର ପ୍ରାଣୀ ସମ୍ପଦ ବିଭାଗ ପକ୍ଷରୁ ମଧ୍ୟ ବିଭିନ୍ନ ସହାୟତା ଯୋଗାଇ ଦିଆଯାଉଛି ବୋଲି ଇରଫାନ କହିଛନ୍ତି।
