ନେପାଳରେ ବଦଳିଯିବ କି ସରକାର ? ବାଂଲାଦେଶ ପରେ ଏବେ ନେପାଳର ପାଳି ..

ନନ୍ଦିଘୋଷ ବ୍ୟୁରୋ: ପୁଣି ହେଉଛି ଇତିହାସର ପୁନରାବୃତ୍ତି । ବାଂଲାଦେଶ-ଶ୍ରୀଲଙ୍କା ଆଉ ପାକିସ୍ତାନ ପରେ ଏବେ ନେପାଳର ପାଳି । ନେପାଳକୁ ଭୟ ବାଂଲାଦେଶ ବିଦ୍ରୋହ । ଯେଉଁଭଳି ଭାବରେ ନେପାଳର ଜନସାଧାରଣ ରାଜରାସ୍ତାକୁ ଓହ୍ଲାଇଛନ୍ତି ତାହା ନେପାଳ ପାଇଁ ସତର୍କ ଘଣ୍ଟି । ନେପାଳରେ ଚାଲିଥିବା ଏହି ଆନ୍ଦୋଳନକୁ ଲୋକମାନେ ‘ଜେନ-ଜେଡ ବିପ୍ଳବ’ ବୋଲି କହୁଛନ୍ତି। କାରଣ ଏହାର ନେତୃତ୍ବ ଯୁବପିଢ଼ି ଏବଂ ଛାତ୍ରମାନେ ନେଉଛନ୍ତି। ସରକାର ଫେସବୁକ, ଟୁଇଟର, ଇନଷ୍ଟାଗ୍ରାମ, ହ୍ବଟସଆପ ଏବଂ ୟୁଟ୍ୟୁବ ସମେତ ୨୬ଟି ସୋସିଆଲ ମିଡିଆ ପ୍ଲାଟଫର୍ମକୁ ନିଷେଧ କରିଥିଲେ। ତା’ପରେ କ୍ରୋଧିତ ଯୁବକମାନେ ଏହାକୁ ସେମାନଙ୍କର ଅଭିବ୍ୟକ୍ତି ସ୍ବାଧୀନତା ଉପରେ ଆକ୍ରମଣ ବୋଲି କହି ରାସ୍ତାକୁ ଓହ୍ଲାଇଲେ। ପୋଲିସ ସହିତ ସଂଘର୍ଷ, କର୍ଫ୍ୟୁ, ପୋଡ଼ାଜଳା ଏବଂ ମୃତାହତଙ୍କ ସଂଖ୍ୟା ବୃଦ୍ଧି ପାଉଛି, ଏସବୁ ଦେଖି ପ୍ରଶ୍ନ ଉଠୁଛି ଯେ ନେପାଳରେ ହେବ କି ସରକାର ପରିବର୍ତ୍ତନ ?

ନେପାଳରେ ବାଂଲାଦେଶ ପରି ଜନସାଧାରଣ 5ଟି ମୁଖ୍ୟ ଦାବି ରାସ୍ତାକୁ ଓହ୍ଲାଇଛନ୍ତି । ସେମାନଙ୍କ ମତରେ ପ୍ରଧାନମନ୍ତ୍ରୀ କେପି ଓଲି ଇସ୍ତଫା ଦିଅନ୍ତୁ ଏବଂ ଶୀଘ୍ର ନିର୍ବାଚନ ହେଉ ବୋଲି ଚାହାଁନ୍ତି। ଜନ ଅସନ୍ତୋଷ ବୃଦ୍ଧି ପାଉଛି ଏବଂ ନେପାଳରେ ରାଜନୈତିକ ସଙ୍କଟ ବୃଦ୍ଧି ପାଉଛି । ସରକାରଙ୍କ ବିରୋଧରେ ପ୍ରତିବାଦ କରୁଥିବା ଲୋକମାନେ କହୁଛନ୍ତି ଯେ ଓଲି ସରକାରଙ୍କ ସମୟ ସରିଗଲାଣି। ଏବେ ଆମେ ତୁମର ନେତୃତ୍ୱ ଚାହୁଁନାହୁଁ। ଆମେ ତୁମକୁ ନିର୍ବାଚିତ କରିଥିଲୁ ତେଣୁ ତୁମେ ନେତା ହୋଇଗଲ, କିନ୍ତୁ ତୁମେ ଆମ ପିଲାମାନଙ୍କୁ ହତ୍ୟା କଲ। ଏବେ ଆମେ ସେହି କ୍ଷମତା ଫେରାଇ ନେଉଛୁ। ଆମେ ତୁମକୁ ଏବଂ ତୁମର ସରକାରକୁ ଚାହୁଁନାହୁଁ।

କ’ଣ ରହିଛି ୫ଟି ଗୁରୁତ୍ୱପୂର୍ଣ୍ଣ ଦାବି…

-ସଂସଦକୁ ଭାଙ୍ଗି ଦିଆଯିବା ଉଚିତ

-ସମସ୍ତ ସାଂସଦ ଇସ୍ତଫା ଦେବା ଉଚିତ।-

-ପ୍ରତିବାଦକାରୀଙ୍କୁ ଗୁଳି କରିବାକୁ ନିର୍ଦ୍ଦେଶ ଦେଇଥିବା ବରିଷ୍ଠ ଅଧିକାରୀମାନଙ୍କୁ ତୁରନ୍ତ ନିଲମ୍ବିତ କରାଯିବା ଉଚିତ

-ଆମ ନେତୃତ୍ୱରେ ଏକ ମଧ୍ୟବର୍ତ୍ତୀକାଳୀନ ସରକାର ଗଠନ କରାଯିବା ଉଚିତ

-ମଧ୍ୟବର୍ତ୍ତୀକାଳୀନ ସରକାରଙ୍କ ଅଧୀନରେ ଶୀଘ୍ର ନିର୍ବାଚନ ହେବା ଉଚିତ

-ଆମେ ତୁମକୁ ଆମର ଭୋଟରେ ପରାସ୍ତ କରିବୁ

ସରକାରଙ୍କ ବିରୋଧରେ ଜନସାଧାରଣଙ୍କ ଦାବିର ଏକ ପୋଷ୍ଟର ଭାଇରାଲ ହୋଇଛି। ଏଥିରେ ଲେଖାଯାଇଛି ଯେ ସଂସଦ ଜନସାଧାରଣଙ୍କ ବିଶ୍ୱାସ ହରାଇଛି, ଏହା ଆଉ ଆମର ସ୍ୱର ନୁହେଁ। ଆମେ ପ୍ରତ୍ୟେକ ଜୀବନ ପାଇଁ, ପ୍ରତ୍ୟେକ ହଜିଯାଇଥିବା ଆଶା ପାଇଁ ଆମର ସ୍ୱର ଉଠାଇବୁ। ଆମେ ଅଧିକ ଶକ୍ତିଶାଳୀ ହେବୁ। ତୁମେ ଗଣତନ୍ତ୍ରର ପ୍ରତିଶ୍ରୁତି ଦେଇଥିଲ, କିନ୍ତୁ ଦୁର୍ନୀତି ଏବଂ ଏକଛତ୍ରବାଦ ଦେଇଗଲ। ତୁମେ ପ୍ରତ୍ୟେକ ବିଦ୍ରୋହକୁ ଦମନ କରି ଚାଲିଥିଲ କିନ୍ତୁ ଏବେ ଏହି ଚକ୍ର ଶେଷ ହୋଇଯିବ। ଏଥର ଆମେ ତୁମକୁ ଆମର ଭୋଟରେ ପରାସ୍ତ କରିବୁ।

ନେପାଳର ଯୁବପିଢ଼ି ଦୁର୍ନୀତି, ବେକାରୀ ଏବଂ ଆର୍ଥିକ ମାନ୍ଦାବସ୍ଥାକୁ ନେଇ ଅତ୍ୟନ୍ତ କ୍ରୋଧିତ ଅଟନ୍ତି। ସୋମବାର ହଜାର ହଜାର ଯୁବକ ସୋସିଆଲ ମିଡିଆ ପ୍ରତିବନ୍ଧକ ବିରୋଧରେ ପ୍ରତିବାଦ କରିଥିଲେ। ହିଂସାତ୍ମକ ପ୍ରତିବାଦରେ ୨୧ ଜଣଙ୍କର ମୃତ୍ୟୁ ହୋଇଛି। ସରକାର ପ୍ରତିବନ୍ଧକ ଉଠାଇ ଦେଇଛନ୍ତି, କିନ୍ତୁ ପ୍ରଧାନମନ୍ତ୍ରୀ କେପି ଓଲି ଇସ୍ତଫା ଦେବାକୁ ମନସ୍ଥ କରିନାହାଁନ୍ତି । ସରକାର ମଧ୍ୟ ଯୁବପିଢ଼ିଙ୍କୁ ପ୍ରତିବାଦ ପ୍ରତ୍ୟାହାର କରିବାକୁ ନିବେଦନ କରିଛନ୍ତି। ତଥାପି, ଯୁବକ ଏବଂ ସାଧାରଣ ନାଗରିକମାନେ ପୁଣି ଥରେ କାଠମାଣ୍ଡୁର ସଂସଦ ବାହାରେ ଏକାଠି ହେଉଛନ୍ତି। ସେମାନେ କହିଛନ୍ତି ଯେ ସେମାନେ ଆଜି ପ୍ରତିବାଦକୁ ତୀବ୍ର କରିବେ।