ICC ଜାରି କଲା ଦିନିକିଆ ବିଶ୍ବକପର ନୂଆ ଶିଡ୍ୟୁଲ, ଜାଣନ୍ତୁ କେବେ ଓ କେଉଁଠି ଖେଳାଯିବ ମ୍ୟାଚ
1 min read
ମହିଳା ଦିନିକିଆ ବିଶ୍ବକପ ୨୦୨୫ର ଶିଡ୍ୟୁଲରେ ପରିବର୍ତ୍ତନ କରିଛି ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) । ବେଙ୍ଗାଲୁରୁର ଚିନ୍ନାସ୍ବାମୀ ଷ୍ଟାଡିୟମରେ ହେବାକୁ ଥିବା ମ୍ୟାଚକୁ ମୁମ୍ବାଇର ଡିଓ୍ବାଇ ପାଟିଲ ଷ୍ଟାଡିୟମକୁ ଶିଫ୍ଟ କରାଯାଇଛି । ବେଙ୍ଗାଲୁରୁ ଦଳାଚକଟା ଘଟଣା ପରେ କର୍ଣ୍ଣାଟକ ସରକାର ଏକ ବଡ଼ ପଦକ୍ଷେପ ଗ୍ରହଣ କରିଥିଲେ । ଫଳସ୍ବରୂପ ଚିନ୍ନାସ୍ବାମୀ ଷ୍ଟାଡିୟମକୁ ବିଶ୍ବକପର ମ୍ୟାଚ ଆୟୋଜନର ଅନୁମତି ମିଳିନଥିଲା । ମହିଳା ଦିନିକିଆ ବିଶ୍ବକପ ସେପ୍ଟେମ୍ବର ୩୦ରୁ ଆରମ୍ଭ ହେବ ଓ ନଭେମ୍ବର ୨ରେ ଫାଇନାଲ ମ୍ୟାଚ ଖେଳାଯିବ ।
ବିଶ୍ବକପର ଭେନ୍ୟୁରେ ପରିବର୍ତ୍ତନ କରାଯାଇଥିଲେ ହେଁ ଟୁର୍ଣ୍ଣାମେଣ୍ଟର ତାରିଖରେ ପରିବର୍ତ୍ତନ କରାଯାଇନାହିଁ । ପୂର୍ବ ପରି ବିଶ୍ବକପର ପ୍ରଥମ ମ୍ୟାଚ ଭାରତ ଓ ଶ୍ରୀଲଙ୍କା ମଧ୍ୟରେ ଖେଳାଯିବ । ଏହି ଦୁଇ ରାଷ୍ଟ୍ର ଏଥର ବିଶ୍ବକପ ଆୟୋଜନ କରୁଛନ୍ତି । ଏସିଏ ଷ୍ଟାଡିୟମ (ଗୌହାଟୀ), ହୋଲକର ଷ୍ଟାଡିୟମ (ଇନ୍ଦୋର), ଡିଓ୍ବାଇ ପାଟିଲ ଷ୍ଟାଡିୟମ (ନବୀ ମୁମ୍ବାଇ), ଏଡିଏ-ଭିଡିସିଏ ଷ୍ଟାଡିୟମ (ବିଶାଖାପଟନମ) ଓ ଆର. ପ୍ରେମଦାସା ଷ୍ଟାଡିୟମ (କଲମ୍ବୋ) ଆଦି ୫ଟି ଷ୍ଟାଡିୟମରେ ମ୍ୟାଚ ଖେଳାଯିବ । ସେପ୍ଟମ୍ବର ୩୦, ଅକ୍ଟୋବର ୫, ୯, ୧୨, ୧୯, ୨୩ ଓ ୨୬ରେ ଭାରତ ଯଥାକ୍ରେମ ଶ୍ରୀଲଙ୍କା, ପାକିସ୍ତାନ, ଦକ୍ଷିଣ ଆଫ୍ରିକା, ଅଷ୍ଟ୍ରେଲିଆ, ଇଂଲଣ୍ଡ, ନ୍ୟୁଜିଲାଣ୍ଡ ଓ ବାଂଲାଦେଶ ବିପକ୍ଷରେ ଖେଳିବ ।
