ଆଜିଠାରୁ ବେସରକାରୀ କଲେଜର ଅଧ୍ୟାପକ ଓ କର୍ମଚାରୀଙ୍କ କାର୍ଯ୍ୟବନ୍ଦ ଆନ୍ଦୋଳନ…

ଭୁବନେଶ୍ବର: ବେସରକାରୀ କଲେଜରେ ଆଜିଠାରୁ କାର୍ଯ୍ୟବନ୍ଦ ଆନ୍ଦୋଳନ। ଆଜିଠାରୁ ହଜାରେରୁ ଅଧିକ କଲେଜରେ ଅଧ୍ୟାପକ ଓ କର୍ମଚାରୀଙ୍କ ଆନ୍ଦୋଳନରୁ ବାଧାପ୍ରାପ୍ତ ହେବ ଶିକ୍ଷାଦାନ। ଆଜିଠାରୁ ଆନ୍ଦୋଳନକୁ ଓହ୍ଲାଇଛି ଓଡିଶା ରାଜ୍ୟ ବେସରକାରୀ ଅଧ୍ୟାପକ ଓ କର୍ମଚାରୀ ସଙ୍ଘ ବା OSNLEA। ରାଜ୍ୟରେ ବିଭିନ ଅନୁଦାନପ୍ରାପ୍ତ ଏବଂ ଅଣ ଅନୁଦାନପ୍ରାପ୍ତ ମହାବିଦ୍ୟାଳୟରେ ୧ ଜୁନ ୨୦୦୮ ରୁ ୧ ଜୁନ ୨୦୧୮ ମଧ୍ୟରେ ନିଯୁକ୍ତ ଅଧ୍ୟାପକ ଓ କର୍ମଚାରୀଙ୍କୁ ରାଜ୍ୟ ସରକାର ଅନୁଦାନ ପରିସରର ଭୁକ୍ତ ଦାବିରେ ଆନ୍ଦୋଳନ ଜାରି ରଖିଛି ସଙ୍ଘ। ଅଗଷ୍ଟ ୧୫ସୁଦ୍ଧା ଦାବି ପୂରଣ ପାଇଁ ପୂର୍ବରୁ ସଙ୍ଘ ଚେତାବନୀ ଦେଇଥିଲେ ବି ଶୁଣିଲେନି ସରକାର। ଏହାପରେ ଅଗଷ୍ଟ ୧୬ ତାରିଖରେ ବିଧାନସଭା ସମୁଖରେ ଆନ୍ଦୋଳନ କରିଥିଲା ସଙ୍ଘ। ତଥାପି କିଛି ସୁଫଳ ହେଲାନି ।

ଏହାପରେ ଆଜିଠାରୁ କାର୍ଯ୍ୟବନ୍ଦ ଆନ୍ଦୋଳନ ଜାରି ରହିଛି ବୋଲି ସଙ୍ଘ ସଭାପତି ସୂଚନା ଦେଇଛନ୍ତି। ଶିକ୍ଷକ ଦାବି ଦିବସରେ ଅନୁପସ୍ଥିତ ଉଚ୍ଚଶିକ୍ଷା ମନ୍ତ୍ରୀ ଓ ସଚିବ ଆଲୋଚନାକୁ ବି ଡାକିଲେନି। ୩୦ ଜିଲ୍ଲାରେ ହଜାରେରୁ ଅଧିକ କଲେଜରୁ ବିଭିନ କଲେଜ ସମ୍ମୁଖରେ ଆନ୍ଦୋଳନ ଆଜିଠୁ ଆରମ୍ଭ ହୋଇଛି। ବାରମ୍ବାର ଦାବି ସତ୍ତ୍ବେ ମୁଖ୍ୟମନ୍ତ୍ରୀ ଏଯାଏ ସଙ୍ଘ ସହ ଆଲୋଚନା କରିନାହାଁନ୍ତି। କଲେଜ ମୁଖ୍ୟ ଫାଟକ ସମ୍ମୁଖରେ କାର୍ଯ୍ୟବନ୍ଦ କରି ଆନ୍ଦୋଳନକୁ ଜାରି ରଖିଛନ୍ତି। ଆଜିସୁଦ୍ଧା ମୁଖ୍ୟମନ୍ତ୍ରୀ ନିଜେ ସଙ୍ଘ ସହିତ ହସ୍ତକ୍ଷେପ କରି ପ୍ରତ୍ୟକ୍ଷ ଆଲୋଚନା ନକଲେ ଆନ୍ଦୋଳନକୁ ଆହୁରି ହଜାରେରୁ ଅଧିକ କଲେଜରେ ଆନ୍ଦୋଳନ ବ୍ୟାପକ କରିବାକୁ ଚେତାବନୀ ଦେଇଛି ସଙ୍ଘ ।