ନନ୍ଦିଘୋଷ ବ୍ୟୁରୋ : ବଢ଼ିଲା ରୁଷୀୟ ମହିଳା ଭିକ୍ଟୋରିଆ ବସୁ ଅଡୁଆ। ନିଖୋଜ ମହିଳାଙ୍କ ଲାଗି ଲୁକ ଆଉଟ ନୋଟିସ ଜାରି କରିବାକୁ ବୈଦେଶିକ ବ୍ୟାପାର ମନ୍ତ୍ରାଳୟକୁ ସୁପ୍ରିମକୋର୍ଟ ଦେଇଛନ୍ତି ନିର୍ଦ୍ଦେଶ। ନିଜର ୫ ବର୍ଷର ସନ୍ତାନ ସହ ଗତ ଜୁଲାଇ ୭ରୁ ନିଖୋଜ ଅଛନ୍ତି ଭିକ୍ଟୋରିଆ। ତୁରନ୍ତ ଶିଶୁକୁ ଖୋଜିବା ଲାଗି ଦିଲ୍ଲୀ ପୋଲିସକୁ ବି ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ। ଜଷ୍ଟିସ ସୂର୍ଯ୍ୟକାନ୍ତ ଓ ଜଷ୍ଟିସ ଜୟମାଲା ବାଗଚୀଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାରେ ଉଦବେଗ ପ୍ରକାଶ କରିଛନ୍ତି। ଶିଶୁକୁ ଉଦ୍ଧାର କରି ତାକୁ ବାପା ସୈକତ ବସୁଙ୍କ ହାତରେ ଅର୍ପଣ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହା ସହ ଭିକ୍ଟୋରିଆଙ୍କ ପାସପୋର୍ଟ ଜବତ କରିବା ସହ ବିମାନ ବନ୍ଦର ଓ ବନ୍ଦର ପ୍ରତି ସଜାଗ ଦୃଷ୍ଟି ଦେବାକୁ ବି କୋର୍ଟ ନିର୍ଦ୍ଦେଶ ଦେଇଛନ୍ତି। ଦିଲ୍ଲୀର ସାକେତ କୋର୍ଟରେ ଭିକ୍ଟୋରିଆ ଓ ସୈକତଙ୍କ ଛାଡପତ୍ର ମାମଲା ଜାରି ରହିଛି। ଜୁଲାଇ ୪ରେ ଦିଲ୍ଲୀସ୍ଥିତ ରୁଷ ଦୂତାବାସ ପଛ ପଟେ ଭିକ୍ଟୋରିଆ ପ୍ରବେଶ କରୁଥିବାର ଭିଜୁଆଲ କଏଦ ହୋଇଥିଲା। ନିଖୋଜ ହେବା ପରେ ସୈକତ ଅଭିଯୋଗ କରିଥିଲେ ଉଭୟ ମା ଓ ଶିଶୁ ଭାରତ ଛାଡି ଚାଲିଯାଇଥିବା ଆଶଙ୍କା କରୁଛନ୍ତି। ଭିକ୍ଟୋରିଙ୍କ ବାପା ରୁଷ ଗୁଇନ୍ଦା ବିଭାଗର ଜଣେ ପୂର୍ବତନ ଅଫିସର ବୋଲି ସୂଚନା ମିଳିଛି। ସୈକତଙ୍କ ଯୁକ୍ତି ଅନୁସାରେ ଶିଶୁଟି ସପ୍ତାହରେ ମା ପାଖରେ ୩ ଦିନ ରହିବ ବୋଲି ବୁଝାମଣା ହୋଇଥିଲା। ଗତ ମେ ୨୨ରେ ଶିଶୁକୁ ନିଜ ହେପାଜତକୁ ନେଇଥିଲେ ଭିକ୍ଟୋରିଆ। ଦୁହେଁ ଚୀନରେ କାର୍ଯ୍ୟରତ ଥିବାବେଳେ ସମ୍ପର୍କରେ ଆସିଥିଲେ ଏବଂ ୨୦୧୭ରେ ସେମାନଙ୍କ ବିବାହ ହୋଇଥିଲା।
