ନନ୍ଦିଘୋଷ ବ୍ୟୁରୋ : ଦର୍ଶକଙ୍କୁ ମନ୍ତ୍ରମୁଗ୍ଧ କଲା ବାଞ୍ଛାର ବଗିଚା । ୪୫ ବର୍ଷ ତଳର ନାଟକ ଦେଖିଲେ ଦର୍ଶକ । ରବୀନ୍ଦ୍ର ମଣ୍ଡପରେ ଶତାବ୍ଦୀ କଳାକାରଙ୍କ ସୁବର୍ଣ୍ଣ ଜୟନ୍ତୀ ଉତ୍ସବ । ୧୭୭ ଥର ମଞ୍ଚସ୍ଥ ପରେ ବି କମିନି ନାଟକର କ୍ରେଜ୍ । ବାଞ୍ଛାର ସୁନ୍ଦର ବଗିଚା ନେବାକୁ ଜମିଦାର ଛକଡ଼ି ମହାନ୍ତି ବହୁ ଚେଷ୍ଟା କରି ଶେଷରେ ମୃତ୍ୟୁବରଣ କରନ୍ତି । ପୁଅ ନକଡ଼ି ମହାନ୍ତି ବାପାଙ୍କ ଅପୂର୍ଣ୍ଣ ଇଚ୍ଛାକୁ ପୂରଣ କରିବାକୁ ଲାଗିପଡ଼େ । ୯୫ ବର୍ଷର ରୋଗାଗ୍ରସ୍ତ ବାଞ୍ଛାକୁ ପ୍ରଲୋଭିତ କରି ଏକ ଚୁକ୍ତିପତ୍ର କରିନିଏ । ଚୁକ୍ତି ଅନୁସାରେ ବାଞ୍ଛା ବଞ୍ଚିଥିବା ପର୍ଯ୍ୟନ୍ତ ମାସକୁ ୨ଶହ ଟଙ୍କା ପାଇବେ ଓ ମୃତ୍ୟୁ ପରେ ବଗିଚାର ମାଲିକାନା ଜମିଦାର ହାତକୁ ଚାଲିଯିବ । କିନ୍ତୁ ନାତୁଣୀବୋହୂ ପଦ୍ମାଙ୍କ ସେବାରେ ସୁସ୍ଥ ହୋଇ ଉଠନ୍ତି ବାଞ୍ଛା । ଏମିତି ଏକ କାହାଣୀକୁ ନେଇ ରବୀନ୍ଦ୍ର ମଣ୍ଡପରେ ଶତାବ୍ଦୀ କଳାକାରଙ୍କ ସୁବର୍ଣ୍ଣ ଜୟନ୍ତୀ ଉତ୍ସବରେ ମଞ୍ଚସ୍ଥ ହୋଇଥିଲା ନାଟକ ବାଞ୍ଛାର ବଗିଚା । ୯୫ ବର୍ଷ ବୟସରେ ବାଞ୍ଛା ଭୂମିକାରେ ଅଭିନୟ କରୁଥିବା ବୃନ୍ଦାବନ ବାରିକଙ୍କ ଚମତ୍କାର ଅଭିନୟ ଦର୍ଶକଙ୍କୁ ଅଭିଭୂତ କରିଥିଲା ।
ମନୋଜ ମିତ୍ର ନାଟକର ରଚନା କରିଥିବା ବେଳେ ଓଡ଼ିଆ ଅନୁବାଦ କରିଛନ୍ତି ଧୀର ମଲ୍ଲିକ ଓ ନିର୍ଦ୍ଦେଶନା ଦେଇଛନ୍ତି ବୃନ୍ଦାବନ ବାରିକ । ଏଥିରେ ଧୀର ମଲ୍ଲିକ, ବୃନ୍ଦାବନ ବାରିକ, କାଳୀପ୍ରସନ୍ନ ମଲ୍ଲିକ, ଭାରତ ପଣ୍ଡା, ସକଳେଶ୍ଵର, ସନ୍ତୋଷ, ସୌମ୍ୟ, ହେମନ୍ତ, ନରେନ୍ଦ୍ର, ମନିଦୀପା, ଧାରା ଶ୍ରାବଣୀ, ସଂଗ୍ରାମ, ସରୋଜ, ଜ୍ୟୋତି ପ୍ରମୁଖ ଅଭିନୟ କରିଥିଲେ ।ପ୍ରାୟ ୪୫ ବର୍ଷ ଧରି ଏହି ନାଟକ ସମସ୍ତଙ୍କ ମନ ଜିଣିଥିବା କହିଛନ୍ତି ଶତାବ୍ଦୀର କଳାକାର ।
