ବିମାନ ଦୁର୍ଘଟଣାରେ ଚାଲିଗଲା ଦନ୍ତ ଚିକିତ୍ସକଙ୍କ ଜୀବନ

ନନ୍ଦିଘୋଷ ବ୍ୟୁରୋ :  ଅହମ୍ମଦାବାଦ ବିମାନ ଦୁର୍ଘଟଣାରେ ୨୪୧ ଜଣଙ୍କ ମୃତ୍ୟୁ ହୋଇଛି । ବିମାନରେ ଥିବା କେବଳ ଜଣେ ବ୍ୟକ୍ତି ବଞ୍ଚି ଯାଇଛନ୍ତି। ଏହା ବ୍ୟତୀତ, ମୃତକଙ୍କ ମଧ୍ୟରୁ କିଛି ଲୋକ ସେହି ମେଡିକାଲ୍ ହଷ୍ଟେଲର ମଧ୍ୟ ଅଛନ୍ତି ଯେଉଁଠାରେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଦୁର୍ଘଟଣାରେ ଜଣେ ଭାରତୀୟ ବଂଶୋଦ୍ଭବ କାନାଡିୟ ନାଗରିକଙ୍କ ମୃତ୍ୟୁ ହୋଇଛି, କାନାଡି ପ୍ରଧାନମନ୍ତ୍ରୀ ଓ ଓଣ୍ଟାରିଓର ପ୍ରିମିୟର ଏହି ଘଟଣାରେ ଶୋକ ପ୍ରକାଶ କରିଛନ୍ତି।

ଅହମ୍ମଦାବାଦରେ ହୋଇଥିବା ଏହି ବିମାନ ଦୁର୍ଘଟଣାରେ ଜଣେ କାନାଡିୟ ନାଗରିକଙ୍କ ମଧ୍ୟ ମୃତ୍ୟୁ ହୋଇଥିଲା। ଗଣମାଧ୍ୟମ ରିପୋର୍ଟ ଅନୁସାରେ, ଦୁର୍ଘଟଣାରେ ଦନ୍ତ ଚିକିତ୍ସକ ନିରାଲି ପଟେଲଙ୍କ ମୃତ୍ୟୁ ହୋଇଥିଲା। ନିରାଲି କାନାଡାର ଏକ ଦନ୍ତ ହସ୍ପିଟାଲରେ ଡାକ୍ତର। ସେ ମୂଳତଃ ଜଣେ ଭାରତୀୟ, ଯଦିଓ ତାଙ୍କର କାନାଡିୟ ନାଗରିକତା ଥିଲା। ପଟେଲ ୫ ଦିନ ପାଇଁ ଭାରତ ଆସିଥିଲେ। ଫେରିବା ସମୟରେ ସେ ଏହି ଦୁର୍ଘଟଣାର ଶିକାର ହୋଇଥିଲେ।

ନିରାଲି ପଟେଲଙ୍କ ବାପାମା, ଭାଇ ଏବଂ ଭଉଣୀ ବ୍ରାମ୍ପଟନରେ ରୁହନ୍ତି। ପଟେଲ ଏକ ମିସିସାଗା ଡେଣ୍ଟାଲ୍ କ୍ଲିନିକ୍‌ରେ କାମ କରୁଥିଲେ ଓ ସେ ୨୦୧୬ରେ ଭାରତରେ ଡେଣ୍ଟାଲ୍ ଡିଗ୍ରୀ ହାସଲ କରିଥିଲେ । ତା’ପରେ ୨୦୧୯ରେ କାନାଡାରେ ତାଙ୍କର ଲାଇସେନ୍ସ ହାସଲ କରିଥିଲେ। ନିରାଲିଙ୍କ ସ୍ୱାମୀ ମଧ୍ୟ ସେମାନଙ୍କର ଏକ ବର୍ଷର ପିଲା ସହିତ ଭାରତ ଆସିବାକୁ ଯୋଜନା କରୁଥିଲେ। କିନ୍ତୁ, ଏହି ଯୋଜନା ପୂର୍ବରୁ ଆସିଥିବା ନିରାଲି ଦୁର୍ଘଟଣାର ଶିକାର ହୋଇଥିଲେ।

ନିରାଲିଙ୍କ ମୃତ୍ୟୁ ଓ ବିମାନ ଦୁର୍ଘଟଣାରେ ଅଣ୍ଟାରିଓ ପ୍ରିମିୟର ଡଗ୍ ଫୋର୍ଡ ଗଭୀର ଶୋକ ପ୍ରକାଶ କରିଛନ୍ତି। ସେ ଗୁରୁବାର ଟ୍ୱିଟରରେ ଏକ ପୋଷ୍ଟରେ କହିଛନ୍ତି, ‘ଅହମ୍ମଦାବାଦ ନିକଟରେ ହୋଇଥିବା ଦୁଃଖଦ ଏୟାର ଇଣ୍ଡିଆ ବିମାନ ଦୁର୍ଘଟଣାରେ ପ୍ରାଣ ହରାଇଥିବା ଲୋକଙ୍କ ମଧ୍ୟରୁ ଅଣ୍ଟାରିଓର ମିସିସାଗାର ଜଣେ କାନାଡିଆନ ନାଗରିକଙ୍କ ନାମ ଜାଣିବା ପରେ ମୁଁ ଦୁଃଖିତ। ଅଣ୍ଟାରିଓର ଲୋକଙ୍କ ପକ୍ଷରୁ, ମୁଁ ସମସ୍ତ ପୀଡିତଙ୍କ ପରିବାର ଏବଂ ପ୍ରିୟଜନଙ୍କ ପ୍ରତି ଗଭୀର ସମବେଦନା ଜଣାଉଛି ।