ଆସନ୍ତା ମାସରେ ଅନ୍ତର୍ଜାତୀୟ ମହାକାଶ ଷ୍ଟେସନକୁ ଯିବେ ଭାରତୀୟ ମହାକାଶଚାରୀ ଶୁଭ୍ରାଂଶୁ ଶୁକ୍ଲା

ନନ୍ଦିଘୋଷ ବ୍ୟୁରୋ: ଆସନ୍ତା ମାସରେ ଅନ୍ତର୍ଜାତୀୟ ମହାକାଶ ଷ୍ଟେସନ ବା ଆଇଏସଏସକୁ ଯିବେ ଭାରତୀୟ ମହାକାଶଚାରୀ ଶୁଭ୍ରାଂଶୁ ଶୁକ୍ଲା। ଆମେରିକୀୟ ମହାକାଶ ଗବେଷଣା ସଂସ୍ଥା ନାସା ପକ୍ଷରୁ ଏହି ବିଷୟ ଘୋଷଣା କରାଯାଇଛି। ଆସନ୍ତା ମାସରେ ହେବାକୁ ଥିବା ନାସାର ଆକ୍ସିଅମ ମିସନ-4 (Ax-4)ରେ ମହାକାଶ ଯିବେ ଶୁଭ୍ରାଂଶୁ। ନାସାର ଏହି ବଡ଼ ନିଷ୍ପତ୍ତି ଭାରତର ମହାକାଶ ମିସନ ଲାଗି ଗୁରୁତ୍ବପୂର୍ଣ୍ଣ ସାବ୍ୟସ୍ତ ହୋଇଛି। ମହାକାଶ ଯାତ୍ରା କ୍ଷେତ୍ରରେ ୧୯୮୪ରେ ୱିଙ୍ଗ କମାଣ୍ଡର ରାକେଶ ଶର୍ମାଙ୍କ ପରେ ଦ୍ବିତୀୟ ଭାରତୀୟ ହେବେ ଶୁଭ୍ରାଂଶୁ।  ଶୁଭ୍ରାଂଶୁ ବର୍ତ୍ତମାନ ଭାରତୀୟ ବାୟୁସେନାର ଗ୍ରୁପ କ୍ୟାପଟେନ ଅଛନ୍ତି। ମହାକାଶ ଯାତ୍ରା କ୍ଷେତ୍ରରେ ବିଶ୍ବର ଆଗଧାଡିରେ ରାଷ୍ଟ୍ରଙ୍କ ସହ ଭାରତର ପ୍ରତିଯୋଗିତା ଚାଲିଥିବାବେଳେ ଶୁଭ୍ରାଂଶୁ ଆଉ ଏକ ନୂଆ ଇତିହାସ ଯୋଡିବେ। ଶୁଭ୍ରାଂଶୁଙ୍କ ସହ ଅନ୍ୟ ଯେଉଁମାନେ ମହାକାଶ ଯିବେ ସେମାନେ ହେଲେ ନାସାର ପୂର୍ବତନ ଆଷ୍ଟ୍ରୋନଟ ପେଗି ହୁଇଟସନ, ପୋଲାଣ୍ଡର ସ୍ଲାଓଜ ଉଜନାନସ୍କି ଓ ହଙ୍ଗେରୀର ତିବୋର କାପୁ।