ରାଜ୍ୟସଭାରେ ମାନସଙ୍କ ପ୍ରଶ୍ନ: PMGSYରେ କେତେ ଆର୍ଥିକ ସହୟତା ଦେଇଛ ?

ନନ୍ଦିଘୋଷ ବ୍ୟୁରୋ : ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନାରେ ରାଜ୍ୟରେ ଗତ ୫ବର୍ଷ ମଧ୍ୟରେ ୧୦ ହଜାର ୭୫୩ କିଲୋମିଟରର ୨୮୧୦ଟି ସବୁଦିନିଆ ରାସ୍ତା ନିର୍ମାଣ ହୋଇଛି । ପିଏମଜିଏସୱାଇ ଆରମ୍ଭ ହେବା ଦିନରୁ କେନ୍ଦ୍ର ସରକାର ପକ୍କା ରାସ୍ତା ନଥିବା ଗାଁକୁ ସଡକ ନିର୍ମାଣ ପାଇଁ ୨୪ ହଜାର ୮୪୫ କୋଟି ଟଙ୍କା ପ୍ରଦାନ କରିଛନ୍ତି । ରାଜ୍ୟ ସରକାର ନିଜସ୍ବ ଅଂଶଧନକୁ ମିଶାଇ ୩୩ ହଜାର ୩୧୧ କୋଟି ଟଙ୍କା ଖର୍ଚ୍ଚ କରିଛନ୍ତି । ରାଜ୍ୟରେ ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନାରେ କେନ୍ଦ୍ର ସରକାର ଓଡିଶାକୁ ଦେଇଥିବା ଆର୍ଥିକ ସହୟତା ସମ୍ପର୍କରେ ବିଜେଡି ସାଂସଦ ମାନସ ମଙ୍ଗରାଜଙ୍କ ପ୍ରଶ୍ନର ଉତ୍ତରରେ କେନ୍ଦ୍ର ଗ୍ରାମ୍ୟ ବିକାଶ ରାଷ୍ଟ୍ରମନ୍ତ୍ରୀ କମଲେଶ ପାଶୱାନ ଏହି ସୂଚନା ଦେଇଛନ୍ତି । ସବୁ ଦିନିଆ ରାସ୍ତା ନଥିବା ସବୁ ଗାଁକୁ ପକ୍କା ରାସ୍ତା ନିର୍ମାଣ ପାଇଁ କେନ୍ଦ୍ର ସରକାର ୨୦୦୦ ମସିହା ଡିସେମ୍ବର ୨୫ ତାରିଖରେ ପିଏମଜିଏସଓ୍ବାଇ ଯୋଜନା ଆରମ୍ଭ କରିଥିଲେ । ୫୦୦ରୁ ଅଧିକ ଜନସଂଖ୍ୟା ବିଶିଷ୍ଟ ଗାଁ ସହ ଉତ୍ତର ପୂର୍ବ ଓ ଆଦିବାସୀ ଅଧ୍ୟୁଷିତ ଅଂଚଳରେ ୨୫୦ରୁ ଅଧିକ ଜନସଂଖ୍ୟା ଥିବା ଗାଁ ଏବଂ ମାଓ ପ୍ରଭାବିତ ୧୦୦ରୁ ଅଧିକ ଜନସଂଖ୍ୟା ବିଶିଷ୍ଟ ଗାଁରେ ସବୁଦିନିଆ ରାସ୍ତା ନିର୍ମାଣ ପାଇଁ ପିଏମଜିଏସୱାଇରେ ପକ୍କା ରାସ୍ତା ନିର୍ମାଣ ହେଉଥିଲା । ରାଜ୍ୟରେ ଗତ ୨୫ ବର୍ଷ ମଧ୍ୟରେ ପ୍ରସ୍ତାବିତ ୨୫୦ରୁ ଅଧିକ ଜନସଂଖ୍ୟା ବିଶିଷ୍ଟ ୧୫ହଜାର ୩୧୩ଟି ଗାଁ ମଧ୍ୟରୁ ୧୫ହଜାର ୩୦୭ ଗାଁକୁ ପକ୍କା ରାସ୍ତା ନିର୍ମାଣ ସରିଛି । ସେହିଭଳି ମାଓ ଅଧ୍ୟୁଷିତ ୧୬୮୮ ଗାଁ ମଧ୍ୟରୁ ୧୬୮୪ ଗାଁକୁ ସବୁଦିନିଆ ରାସ୍ତା ନିର୍ମାଣ ସରିଛି ବୋଲି କେନ୍ଦ୍ରମନ୍ତ୍ରୀ ସୂଚନା ଦେଇଛନ୍ତି ।