୨୫ ହଜାର ଶିକ୍ଷକ ଓ ଅଣଶିକ୍ଷକ ନିଯୁକ୍ତି ରଦ୍ଦ ପ୍ରସଙ୍ଗ; କୋଲକାତା ହାଇକୋର୍ଟଙ୍କ ରାୟ କାଏମ ରଖିଲେ ସୁପ୍ରିମକୋର୍ଟ

ନୂଆଦିଲ୍ଲୀ: ୨୫ ହଜାର ୭୫୩ ଶିକ୍ଷକ ଅଣଶିକ୍ଷକ ହରାଇବେ ଚାକିରି । ଏମାନଙ୍କ ନିଯୁକ୍ତି ରଦ୍ଦ ନେଇ କୋଲକାତା ହାଇକୋର୍ଟ ଦେଇଥିବା ରାୟକୁ କାଏମ ରଖିଛନ୍ତି ସର୍ବୋଚ୍ଚ ଅଦାଲତ । ୨୦୧୬ରେ ପଶ୍ଚିମବଙ୍ଗ ସ୍କୁଲ ସେବା ଆୟୋଗ ପକ୍ଷରୁ ନିଯୁକ୍ତ ୨୫ ହଜାର ଶିକ୍ଷକ ଓ ଅଣଶିକ୍ଷକଙ୍କ ନିଯୁକ୍ତିକୁ ରଦ୍ଦ କରିଥିଲେ ହାଇକୋର୍ଟ । ଚାକିରି ଲାଗି ଟଙ୍କା କାରବାର ନେଇ ଅଭିଯୋଗ ହେବା ପରେ ମାମଲା ଯାଇଥିଲା ହାଇକୋର୍ଟ ।

ସୁପ୍ରିମକୋର୍ଟ ପ୍ରଧାନବିଚାରପତି ଜଷ୍ଟିସ ସଞ୍ଜୀବ ଖାନ୍ନା, ଜଷ୍ଟିସ ସଞ୍ଜୟ କୁମାରଙ୍କୁ ନେଇ ଗଠିତ ଖଣ୍ଡପୀଠ ଚୟନ ପ୍ରକ୍ରିୟାରେ ଅସାଧୁ ପ୍ରକ୍ରିୟା ସମ୍ପର୍କରେ ଅନୁଧ୍ୟାନ କରିବା ପରେ ଏହି ନିଷ୍ପତ୍ତି ନେଇଛନ୍ତି । ଟଙ୍କା ଦେଇ ଆଶାୟୀ ଚାକିରି ପାଇଥିବା ହୃଦବୋଧ କରିବା ପରେ କୋର୍ଟ ଏହି ନିଷ୍ପତ୍ତି ନେଇଛନ୍ତି । କଲିକତା ହାଇକୋର୍ଟଙ୍କ ନିଷ୍ପତ୍ତି ଉପରେ ହସ୍ତକ୍ଷେପ କରିବାର କୌଣସି କାରଣ ନାହିଁ ବୋଲି କହିଛନ୍ତି ସୁପ୍ରିମକୋର୍ଟ । ତେବେ ସେତେବେଳେ ନିଯୁକ୍ତି ପାଇଥିବା ପ୍ରାର୍ଥୀମାନେ ବର୍ତ୍ତମାନ ସୁଦ୍ଧା ଦରମା ବାବଦରେ ପାଇଥିବା ଅର୍ଥ ଫେରସ୍ତ କରିବେ ନାହିଁ ବୋଲି ଖଣ୍ଡପୀଠ କହିଛନ୍ତି ।

୨୦୧୬ରେ ପଶ୍ଚିମବଙ୍ଗରେ ପ୍ରାଥମିକ ଓ ଉଚ୍ଚମାଧ୍ୟମିକ ବିଦ୍ୟାଳୟରେ ବେଆଇନ ଚୟନ ନେଇ ଅଭିଯୋଗ ହୋଇଥିଲା । ରାଙ୍କ ସ୍ତରରେ ଓ ଓଏମଆର ସିଟରେ ବ୍ୟାପକ ଜାଲିଆତି ହୋଇଥିବାରୁ ୨୫ ହଜାର ୭୫୩ ପ୍ରାର୍ଥୀଙ୍କ ଚୟନକୁ ରଦ୍ଦ କରିଥିଲେ ହାଇକୋର୍ଟ । ଗତବର୍ଷ ମେ’ ୭ରେ ହାଇକୋର୍ଟଙ୍କ ଆଦେଶ ଉପରେ ରହିତାଦେଶ ଜାରି କରିଥିଲେ ସୁପ୍ରିମକୋର୍ଟ । ଏହାସହ ମାମଲାର ତଦନ୍ତ ସିବିଆଇ କରିବ ବୋଲି ଗ୍ରୀନ ନିର୍ଦ୍ଦେଶ ଦେଇଥିଲେ । ହାଇକୋର୍ଟଙ୍କ ରାୟ ବିରୋଧରେ ରାଜ୍ୟ ସରକାରଙ୍କ ସମେତ ୧୨୬ଟି ଆବେଦନ ସୁପ୍ରିମକୋର୍ଟରେ ଦାୟର ହୋଇଥିଲା ।