ଆଜି ଲୋକସଭାରେ ଉପସ୍ଥାପିତ ହେବ ୱାକଫ୍ ସଂଶୋଧନ ବିଲ୍

ନନ୍ଦିଘୋଷ ବ୍ୟୁରୋ: ଆଜି ଲୋକସଭାରେ ଉପସ୍ଥାପିତ ହେବ ୱାକଫ ବିଲ୍ । ତେବେ ବିଲ୍ ବିରୋଧରେ ଭୋଟ ଦିଆଯିବ ବୋଲି ବିରୋଧୀ ଦଳ କରିଛନ୍ତି ଘୋଷଣା । ବିଲ୍ ସମ୍ପର୍କରେ ସବିଶେଷ ଆଲୋଚନା ଲାଗି ଦାବି କରିଥିଲେ ପ୍ରାୟ ସମସ୍ତ ବିରୋଧୀ ଦଳ । ଗତକାଲି ବସିଥିବା ବିରୋଧୀ ଦଳ ବୈଠକରେ ଏହି ପ୍ରସଙ୍ଗରେ ଆଲୋଚନା ହୋଇଥିଲା। ବିରୋଧୀ ଦଳ ଗୃହ ବର୍ଜନ ନକରି ଏହି ବିଲକୁ ବିରୋଧ କରିବେ । ଇଣ୍ଡି ମେଣ୍ଟ ଓ ଅନ୍ୟାନ୍ୟ ବିରୋଧୀ ଦଳ ଏହି ବିଲକୁ ବିରୋଧ କରୁଛନ୍ତି । ଦେଶରେ ୱାକଫ ସମ୍ପତ୍ତିର ପରିଚାଳନା ଓ ପ୍ରଶାସନିକ ବ୍ୟବସ୍ଥାରେ ଉନ୍ନତି ଆଣିବା ଉଦ୍ଦେଶ୍ୟରେ ଏହି ବିଲ୍ ଆସିଛି ବୋଲି କୁହାଯାଇଛି । ଲୋକସଭାରେ ଉପସ୍ଥିତ ରହିବା ଲାଗି ବିଜେପି, କଂଗ୍ରେସ, ଆରଜେଡି, ଟିଏମସି, ଟିଡିପି,ଜେଡିୟୁ, ଶିବସେନା, ଏଲଜେପି(ରାମବିଳାସ) ଆଦି ଦଳ ନିଜ ନିଜର ସାଂସଦମାନଙ୍କୁ ହୁଇପ ଜାରି କରିଥିଲେ । ୫୪୩ ଆସନରୁ ଲୋକସଭାରେ ଏନଡିଏର ୨୯୩ ସାଂସଦ ଅଛନ୍ତି । କେବଳ ବିଜେପିର ରହିଛନ୍ତି ୨୪୦ ସାଂସଦ । ବିରୋଧୀଙ୍କ ସଦସ୍ୟ ସଂଖ୍ୟା ରହିଛି ୨୪୯ । ଏଥିରୁ କଂଗ୍ରେସର ସଦସ୍ୟ ସଂଖ୍ୟା ରହିଛି ୯୯ । ସମ୍ବିଧାନର ଧାରା ୧୪, ୨୫, ୨୬ ଓ ୨୯କୁ ଏହି ବିଲ୍ ବିରୋଧ କରୁଛି ବୋଲି କହିଛି ଏଆଇଏମଆଇଏମ ।

ସଂଶୋଧିତ ବିଲରେ କ’ଣ ଅଛି ?
ସର୍ଭେ କମିଶନରଙ୍କ ସ୍ଥାନରେ ଜିଲ୍ଲାପାଳମାନେ ଜମିର ସର୍ଭେ କରିବେ । କେନ୍ଦ୍ରୀୟ ୱାକଫ୍ କାଉନସିଲ୍ ୩ ଜଣ ସାଂସଦଙ୍କୁ ସାମିଲ କରିବେ । ୩ ଜଣ ସାଂସଦଙ୍କ ମଧ୍ୟରୁ ୨ ଜଣ ଲୋକସଭାରୁ ହୋଇଥିବା ଦରକାର । କେନ୍ଦ୍ରୀୟ ୱାକଫ୍ କାଉନସିଲରେ ୨ ଜଣ ଅଣ ମୁସଲିମ୍ ସଦସ୍ୟ ରହିବେ । କେନ୍ଦ୍ରୀୟ କାଉନସିଲ୍ ଓ ରାଜ୍ୟ ୱାକଫ୍ ବୋର୍ଡରେ ମହିଳା ସଦସ୍ୟ ରହିବେ । ଭୋରା ଏବଂ ଆଗାଖାନୀ ମୁସଲମାନଙ୍କୁ ପରିଚୟ ପ୍ରଦାନ ବ୍ୟବସ୍ଥା । ସେଣ୍ଟ୍ରାଲ ଡାଟାବେସରେ ବୋର୍ଡ ପଞ୍ଜିକରଣ ବାଧ୍ୟତାମୂଳକ । ଆଇନ ଗୃହୀତ ହେବାର ୬ ମାସରେ ପଞ୍ଜିକରଣ ବାଧ୍ୟତାମୂଳକ । ସମୟ ବୃଦ୍ଧି କ୍ଷମତା ରହିଛି ୱାକଫ ଟ୍ରିବ୍ୟୁନାଲ ନିକଟରେ ବିବାଦ କ୍ଷେତ୍ରରେ ରାଜ୍ୟ ସରକାରଙ୍କ ଅଧିକାରୀ ନେବେ ନିଷ୍ପତ୍ତି ।