ବଢ଼ୁଛି ମିଆଁମାର ଭୂକମ୍ପ ମୃତକଙ୍କ ସଂଖ୍ୟା: ମୃତ୍ୟୁସଂଖ୍ୟା ୨ ହଜାର ଟପିଲା, ଆହତଙ୍କ ସଂଖ୍ୟା ୪ ହଜାର

ମିଆଁମାରରେ ଘଟିଥିବା ପ୍ରଳୟଙ୍କରୀ ଭୂକମ୍ପ ମୃତ୍ୟୁ ସଂଖ୍ୟା ହେଲା ୨ ହଜାର ୫୬ । ଆହତଙ୍କ ସଂଖ୍ୟା ପ୍ରାୟ ଚାରି ହଜାର । ମତ ମାର୍ଚ୍ଚ ୨୮ରେ ଘଟିଥିବା ବିଭୀଷିକାରେ ବର୍ତ୍ତମାନ ସୁଦ୍ଧା ୨୭୦ ଜଣ ନିଖୋଜ ଥିବା ସୂଚନା ମିଳିଛି । ସେପଟେ ମିଆଁମାରର ଜୁଣ୍ଟା ସରକାର ମୃତକଙ୍କ ଉଦ୍ଦେଶ୍ୟରେ ସାତଦିନିଆ ଜାତୀୟ ଶୋକ ସପ୍ତାହ ପାଳନ କରୁଛି । ୭.୭ ତୀବ୍ରତାର ଭୂକମ୍ପରେ ଛାରଖାର ହୋଇଯାଇଥିଲା ମିଆଁମାର । ଏହାର ପ୍ରଭାବ ଥାଇଲାଣ୍ଡ, ଭାରତ, ଚୀନ, ବାଂଲାଦେଶରେ ପଡିଥିଲା । ଏବେ ବି ଅନେକ ମୃତଦେହ ଭଗ୍ନସ୍ତୂପ ତଳେ ପୋତି ହୋଇଥିବା କୁହାଯାଉଛି ।

ବ୍ୟାଙ୍କକରେ ଏକ ଭଗ୍ନକୋଠା ଭିତରେ ୭୬ ଜଣ ଲୋକ ପୋତିହୋଇଯାଇଥିବା ଆଶଙ୍କା କରାଯାଉଛି । ବର୍ତ୍ତମାନ ସୁଦ୍ଧା ଧ୍ବଂସସ୍ତୂପକୁ ବାହାର କରାଯାଇ ନଥିବାରୁ ମୃତାହତଙ୍କ ସମ୍ପର୍କରେ ସବିଶେଷ ସୂଚନା ମିଳିପାରିନାହିଁ । ଥାଇଲାଣ୍ଡର ମୋଟ ମୃତ୍ୟୁ ସଂଖ୍ୟା ୧୮ ବୋଲିସୂଚନା ମିଳିଛି । ଭୂକମ୍ପ ବେଳେ ଅନେକ ସ୍ଥାନରେ ଶୁକ୍ରବାର ପ୍ରାର୍ଥନା ଚାଲିଥିବାରୁ ୭୦୦ରୁ ଅଧିକ ଶ୍ରଦ୍ଧାଳୁଙ୍କ ମୃତ୍ୟୁ ଘଟିଥିଲା । ଭୂକମ୍ପରେ ଅନେକ ମସଜିଦ ବି ଧୂଳିସାତ ହୋଇଛି । ତେଣେ ଜାତିସଂଘ ପକ୍ଷରୁ ମିଆଁମାରକୁ ସହାୟତା ଘୋଷଣା କରାଯାଇଛି । ୨୦୨୧ରେ ମିଆଁମାରରେ ନୋବେଲ ବିଜୟିନୀ ଅଙ୍ଗ ସାନ ସୁ କିଙ୍କୁ ହଟାଇ ସାମରିକ ଶାସନ ଲାଗୁ କରିଥିଲା ଜୁଣ୍ଟା ସରକାର । ସେବଠାରୁ ଦେଶରେ ଗୃହଯୁଦ୍ଧ ସ୍ଥିତି ଲାଗୁ ରହିଛି ।