ଗୁରୁ ରନ୍ଧାଓ୍ବା ଗୁରୁତର , ଆକ୍ସନ ଷ୍ଟଣ୍ଟ କରିବା ସମୟରେ ଘଟିଲା ଅଘଟଣ

ମୁମ୍ବାଇ: ଗାୟକ  ଗୁରୁ ରନ୍ଧାୱା ଗୁରୁତର ଆହତ ହୋଇଛନ୍ତି। ତାଙ୍କ ମୁଣ୍ଡ ଏବଂ ଶରୀରର ବିଭିନ୍ନ ସ୍ଥାନରେ ଆଘାତ ଲାଗିଛି। ଗୁରୁତର ଅବସ୍ତାରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ତାଙ୍କର ଆଗାମୀ ଫିଲ୍ମ ‘ଶଙ୍କି ସର୍ଦ୍ଦାର’ ସେଟରେ  ଏହି ଅଘଟଣ ଘଟିଛି । ଫିଲ୍ମର ଏକ ଆକ୍ସନ୍ ଷ୍ଟଣ୍ଟ ସୁଟିଂ ସମୟରେ ସେ ଗୁରୁତର ଆହତ ହୋଇଥିଲେ। ସେ ତାଙ୍କ ଇନଷ୍ଟାଗ୍ରାମ ଆକାଉଣ୍ଟରେ ହସ୍ପିଟାଲ ବେଡ୍ ରୁ ଏକ ଫଟୋ ସେୟାର କରିଛନ୍ତି। ଏହି ଫଟୋ ଦେଖି ସମସ୍ତେ ତାଙ୍କ ସୁରକ୍ଷା ଏବଂ ଶୀଘ୍ର ଆରୋଗ୍ୟ ପାଇଁ ପ୍ରାର୍ଥନା କରିଛନ୍ତି । ଏହି ଫଟୋରେ ଦେଖାଯାଉଛି ଯେ ତାଙ୍କ ମୁଣ୍ଡରେ ଏକ ପଟି ବନ୍ଧା ହୋଇଛି। ସେ ଏକ ସର୍ଭାଇକାଲ୍ କଲାର ପିନ୍ଧିଛନ୍ତି।

ଏହି ଫଟୋ ସେୟାର କରିବା ସମୟରେ ଗୁରୁ ରନ୍ଧାୱା କହିଛନ୍ତି ଯେ ଏହା ତାଙ୍କର ପ୍ରଥମ ଆକ୍ସନ୍ ଷ୍ଟଣ୍ଟ ଥିଲା। ଇନଷ୍ଟାଗ୍ରାମରେ ଫଟୋ ସେୟାର କରି ସେ ଲେଖିଛନ୍ତି, “ମୋର ପ୍ରଥମ ଷ୍ଟଣ୍ଟ, ମୋର ପ୍ରଥମ ଆଘାତ, କିନ୍ତୁ ମୋର ସାହସ ବଜାଇ ରହିଛି। ‘ଶଙ୍କି ସର୍ଦ୍ଦାର’ ଚଳଚ୍ଚିତ୍ର ସେଟର ଆକ୍ସନ ଷ୍ଟଣ୍ଟ କରିବା ବହୁତ କଷ୍ଟକର କାମ, କିନ୍ତୁ ମୁଁ ମୋ ଦର୍ଶକଙ୍କ ପାଇଁ କଠିନ ପରିଶ୍ରମ କରିବି।”

ଗୁରୁ ରନ୍ଧାୱାଙ୍କ ଏହି ପୋଷ୍ଟରେ ସେଲିବ୍ରିଟିମାନେ ପ୍ରତିକ୍ରିୟା ପ୍ରକାଶ କରିଛନ୍ତି। ସେଲିବ୍ରିଟି ଏବଂ ପ୍ରଶଂସକମାନେ ଆଶ୍ଚର୍ଯ୍ୟଜନକ ପ୍ରତିକ୍ରିୟା ଦେଇଛନ୍ତି। ମୃଣାଲ ଠାକୁର ହ୍ବାଟ କମେଣ୍ଟ କରିଥିବା ସହ ଏକ ଆଶ୍ଚର୍ଯ୍ୟଜନକ ଇମୋଜି ସେୟାର କରିଛନ୍ତି। ଅନୁପମ ଖେର ତାଙ୍କୁ ଷ୍ଟ୍ରଙ୍ଗ ରହିବାକୁ ପରାମର୍ଶ ଦେଇ ଲେଖିଛନ୍ତି , “ଆପ ସବସେ ଅଚ୍ଛେ ହୋ”,ବହୁତ ଜଲଦି ତୁମେ ସୁସ୍ଥ ହୋଇଯିବ।” ଗୁରୁଙ୍କ ଶୀଘ୍ର ଆରୋଗ୍ୟ କାମନା କରି ମିକା ସିଂହ ‘Get Well Soon’ ମଧ୍ୟ ଲେଖିଛନ୍ତି।