ଏତେ ବଡ଼ ବିହନ ଦୁର୍ନୀତି, କାହିଁକି ଚୁପ ସରକାର ?

ନନ୍ଦିଘୋଷ ବ୍ୟୁରୋ: ରାଜ୍ୟ ବିହନ ନିଗମର ବିହନ ଦୁର୍ନୀତି ଅଭିଯୋଗକୁ ନେଇ ଚାଷୀ ମହଲରେ ଦାନା ବାନ୍ଧୁଛି ଅସନ୍ତୋଷ । ଏ ପର୍ଯ୍ୟନ୍ତ ସରକାରଙ୍କ ପକ୍ଷରୁ ଉଁ କି ଚୁଁ  ପଦୁଟିଏ ଏ ବାବଦରେ କେହି କିଛି ମୁହଁ ଖୋଲୁନାହାନ୍ତି । ବିଶେଷଜ୍ଞ କହିବା କଥା, ପ୍ରାମାଣିକ ବିହନ ପାଇବାକୁ ହେଲେ ଦୁଇରୁ ୩ ବର୍ଷ ସମୟ ଲାଗିଥାଏ । ବିହନ ସାର୍ଟିଫାଏଡ୍ ହେବାର ୯ ମାସ ଭିତରେ ବ୍ୟବହାର ନ ହେଲେ ତାହା ଆଉ ଅମଳକ୍ଷମ ହୁଏ ନାହିଁ । ସେପଟେ ସଂଯୁକ୍ତ ମୋର୍ଚ୍ଚା ଚାଷୀ ସଂଗଠନ ଅଭିଯୋଗ କରିଛି ଏହି ଦୁର୍ନୀତିରେ କିକ୍ ବ୍ୟାକ୍ ପରିମାଣ ୨୦୦ କୋଟି ଟପିପାରେ ।

ବିହନ ନିଗମ ଦୁର୍ନୀତି ନେଇ ଏତେବଡ଼ ଅଭିଯୋଗ ଉଠିଲାଣି । ହେଲେ ସରକାର ଚୁପ୍ କାହିଁକି ? ନା କୃଷି ମନ୍ତ୍ରୀ କିଛି ପ୍ରତିକ୍ରିୟା ରଖିଛନ୍ତି । ନା ଏ ନେଇ ତଦନ୍ତ ନିର୍ଦ୍ଦେଶ ଦେଇଛନ୍ତି । ସରକାରଙ୍କ ଏପରି ନିରବତାକୁ ନେଇ ତାତିଲେଣି ଚାଷୀ ସଂଗଠନ । ରାଷ୍ଟ୍ରାୟତ୍ତ ସଂସ୍ଥାକୁ ବାଦ ଦେଇ ଘରୋଇ ସଂସ୍ଥାଠାରୁ ଅଧିକ ଦାମରେ ମଞ୍ଜି କିଣାହେଲା । ତା ପୁଣି ନିମ୍ନମାନର । ଯଦି ସେହି ବିହନ ପ୍ରାମାଣିକ ବିହନ ଥିଲା ତାହେଲେ କାହିଁକି ବିହନ ପ୍ୟାକେଟ୍ ଉପରେ କମ୍ପାନୀର ନାମ, ପ୍ରାମାଣିକ ପ୍ରମାଣ ପାଇବା ତାରିଖ କାହିଁକି ଲେଖାଗଲାନି । କ୍ଷତିଗ୍ରସ୍ତ ଚାଷୀ କାହା ବିରୋଧରେ ଆଇନଗତ ଆଶ୍ରୟ ନେବେ ? ଚାଷୀ ସଂଗଠନ ଅଭିଯୋଗ କରିଛି ପୂର୍ବରୁ ପ୍ରତ୍ୟାହାର ହୋଇଥିବା କଳା କୃଷି ଆଇନର ଚୁକ୍ତିଭିତ୍ତିକ ଚାଷ ବ୍ୟବସ୍ଥାରେ ଚାଷୀ କ୍ଷତିଗ୍ରସ୍ତ ହେଲେ ଆଇନର ଆଶ୍ରୟ ନେଇପାରିବେ ନାହିଁ ବୋଲି ବ୍ୟବସ୍ଥା ଥିଲା । ସେହି ବ୍ୟବସ୍ଥାକୁ ଭିନ୍ନ ଢଙ୍ଗରେ ଏବେ ଓଡ଼ିଶାରେ ପ୍ରୟୋଗ କରିବାକୁ ଉଦ୍ୟମ କରୁଛନ୍ତି ରାଜ୍ୟ ସରକାର । ବିହନ ଦୁର୍ନୀତିରେ ପ୍ରାୟ ୨୦୦ କୋଟିରୁ ଅଧିକ କିକ୍ ବ୍ୟାକ୍ ହେବା ସନ୍ଦେହ କରାଯାଉଛି । ଗଞ୍ଜାମ ଜିଲ୍ଲାର ଚାଷୀଙ୍କୁ ଯୋଗାଣ ହୋଇଥିବା ବିହନ ପ୍ରାମାଣିକ କି ନୁହେଁ ତାକୁ ନେଇ ବି ପ୍ରଶ୍ନ ଉଠିଛି ।

ବିଶେଷଜ୍ଞଙ୍କ ମତରେ ବିଭିନ୍ନ କିସମର ପ୍ରାମାଣିକ ବିହନ ସାର୍ଟିଫାଏଡ୍ ହେବା ତାରିଖଠାରୁ ୯ ମାସ ଭିତରେ ବ୍ୟବହାର ହେବା ଦରକାର । ଗୋଟିଏ ବିହନ ପ୍ରାମାଣିକ ମାନ୍ୟତା ପାଇବାକୁ ହେଲେ ଦୁଇରୁ ୩ ବର୍ଷ ସମୟ ଲାଗିଥାଏ । ପ୍ରାମାଣିକ ବିହନ ମାନ୍ୟତା ପାଇଁ ଇଣ୍ଡିଆନ୍ ମିନିମମ୍ ସିଡ୍ ସାର୍ଟିଫିକେସନ୍ ଷ୍ଟାଣ୍ଡାର୍ଡର ସବୁ ସର୍ତ୍ତ ପୂରା କରୁଥିବା ଆବଶ୍ୟକ । କୃଷି ବିଶ୍ବବିଦ୍ୟାଳୟ ହେଉ କି ଗବେଷଣା ପରିଷଦ ବିହନ ନୂଆ କିସମର ବିହନ ଉତ୍ପାଦନ କରିବା ପାଇଁ ପ୍ରଥମେ ଉତ୍ତମମାନର ନ୍ୟୁକ୍ଲିୟସ ବିହନ ଉଦ୍ଭାବନ କରାଯାଏ । ଗୋଟିଏ ବିହନରୁ ହାରାହାରି ୮୦ଟି ପ୍ରାମାଣିକ ବିହନ ଉତ୍ପାଦନ ପାଇଁ ପ୍ରଥମେ ବିହନର ନମୁନା ଦେଇ ପଞ୍ଜୀକରଣ କରିବାକୁ ପଡ଼ିଥାଏ । ତାକୁ ଭାରତ ସରକାର ଗେଜେଟ୍ ବିଜ୍ଞପ୍ତି ପ୍ରକାଶ କରନ୍ତି । ଯେଉଁ ବିଶ୍ବବିଦ୍ୟାଳୟ କିମ୍ବା କୃଷି ପରିଷଦ ବିହନ ବିକାଶ କରେ ସେଠାରେ ନ୍ୟୁକ୍ଲିୟସ ବିହନକୁ ନିଜ ଜମିରେ ବୁଣି ପ୍ରଯୋଜକ ବିହନ ବା ବ୍ରିଡର ସିଡ୍ ପ୍ରସ୍ତୁତ କରାଯାଏ । ପ୍ରଯୋଜକ ବିହନରୁ ଓ୍ବାନ୍ ଇଜ୍ ଟୁ ଅଶି ଅନୁପାତରେ ପ୍ରସ୍ତୁତ ହୁଏ ପିଣ୍ଡ ବିହନ ବା ଫାଉଣ୍ଡେସନ ସିଡ୍ । ଫାଉଣ୍ଡେସନ୍ ସିଡ୍ରୁ ଉତ୍ପାଦନ ହେଉଥିବା ବିହନକୁ ଯାଞ୍ଚ ପରେ ପ୍ରାମାଣିକ ବିହନର ମାନ୍ୟତା ମିଳିଥାଏ । ଏଥିପାଇଁ ବିହନର ଅମଳ କ୍ଷମତା, ଆର୍ଦ୍ରତା ଧାରଣ କ୍ଷମତା, ଦୁର୍ବିପାକ ସହନଶୀଳ, ରୋଗପୋକ ନିରୋଧୀ କ୍ଷମତା ଯାଞ୍ଚ କରାଯାଏ । ଓଡ଼ିଶାରେ ପ୍ରାମାଣିକ ବିହନ ମାନ୍ୟତା ଦେବା ପାଇଁ ସରକାରୀ ସ୍ତରରେ ଓଡ଼ିଶା ରାଜ୍ୟ ବିହନ ଓ ଜୈବିକ ଉତ୍ପାଦ ପ୍ରମାଣ ଏଜେନ୍ସି ରହିଛି ।

ଚାଷୀ ସବୁବେଳେ ପ୍ରାମାଣିକ ବିହନକୁ ବିଶ୍ବାସ କରିଥାନ୍ତି । ସରକାରୀ ସ୍ତରରେ ପ୍ରାମାଣିକ ବିହନ ପାଇଁ ଏତେଗୁଡ଼ିଏ ନିୟମ ରହିଛି । କିନ୍ତୁ ଘରୋଇ ସଂସ୍ଥା ବିହନ ବିକାଶ କଲେ ତାହା କେବଳ ଟ୍ରୁଥ୍ଫୁଲି ଲେବଲ୍ଡ୍ ସିଡ୍ ଆକାରରେ ପ୍ରସ୍ତୁତ କରାଯାଇଥାଏ । ଏତେସବୁ କଡ଼ା ନିୟମ ପାଳନ କରିବାକୁ ପଡ଼ିନଥାଏ । ଏବେ ପ୍ରଶ୍ନ ଉଠୁଛି ରାଜ୍ୟ ବିହନ ନିଗମ ଯେଉଁ ଘରୋଇ ସଂସ୍ଥାରୁ ବିହନ ଆଣିଥିଲା ତାହା କେତେଦୂର ପ୍ରାମାଣିକ । ତାର ତଦନ୍ତ କରାଗଲେ ପ୍ରକୃତ ସତ୍ୟ ସାମାନାକୁ ଆସିବ । ରାଜ୍ୟ ସରକାର ଏ ଦିଗରେ କେବେ ତଦନ୍ତ କରୁଛନ୍ତି କଣ ପଦକ୍ଷେପ ନେଉଛନ୍ତି ତାକୁ ଅପେକ୍ଷା କରିଛନ୍ତି ଚାଷୀ ।