କଣାସ ହଇଜାରେ ଲାଗିପାରୁନାହିଁ ରୋକ୍, ମୃତ୍ୟୁ ସଂଖ୍ୟା ୬କୁ ବୃଦ୍ଧି

କଣାସ : କଣାସ ହଇଜାରେ ଲାଗିପାରୁନାହିଁ ରୋକ୍ । ଅଣାୟତ୍ତ ହେବାକୁ ଯାଉଛି ହଇଜା ସ୍ଥିତି । ଗୁରୁବାର ଦିନ ଜାଗୁଳେଇପଦରରୁ ଆହୁରି ୫ ରୋଗୀ ଚିହ୍ନଟ । ବର୍ତ୍ତମାନ ହଇଜାରେ ମୃତ୍ୟୁ ସଂଖ୍ୟା ୬କୁ ବୃଦ୍ଧି ପାଇଛି। ପୂର୍ବରୁ ୪ ଜଣଙ୍କର ମୃତ୍ୟୁ ହୋଇଥିବା ବେଳେ ଜାଗୁଳେଇପଦର ଗାଁର ଆଉ ୨ ଜଣଙ୍କର ମୃତ୍ୟୁ ହୋଇଛି। ଗତ ମଙ୍ଗଳବାର ସପନୀ ବେହରା ଓ ଆଜି ଭୋରରୁ ଜହ୍ନି ବେହେରା, ଉଭୟଙ୍କର ଚିକିତ୍ସାଧୀନ ଅବସ୍ଥାରେ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ମୃତ୍ୟୁ ହୋଇଛି। ଦୟା ନଦୀର ବିଷାକ୍ତ ପାଣି ପିଇ ଜଣଙ୍କ ପରେ ଜଣଙ୍କର ମୃତ୍ୟୁ ହେଉଛି । ଜିଲ୍ଲା ସ୍ଵାସ୍ଥ୍ୟ ବିଭାଗ ଓ ଜିଲ୍ଲା ପ୍ରଶାସନ ସୂଚନା ଅନୁଯାୟୀ କଣାସର ନୂଆଗାଁ, ଗୋପିନାଥପୁର, ପାଇକମରା, କଳାପଦର, ନଇକୂଳପାଟଣା ଆଦି ଗାଁରେ ହଇଜା ଆକ୍ରାନ୍ତଙ୍କ ସଂଖ୍ୟା କମିଛି । କିନ୍ତୁ ଜାଗୁଲେଇପଦର ଗାଁରେ ଏବେ ସ୍ଥିତି ସଙ୍ଗୀନ ରହିଛି I ଆଜି ମୃତ୍ୟୁବରଣ କରିଥିବା ଜହ୍ନି ବେହେରାଙ୍କ ପରିବାର ପକ୍ଷରୁ ପ୍ରଶାସନିକ ଅବହେଳାକୁ ଦାୟୀ କରାଯାଇଛି । ବରମ୍ବାର ଅନୁରୋଧ ସତ୍ଵେ ଲୋକଙ୍କୁ ବିଶୁଦ୍ଧ ପାଣି ଯୋଗାଇପାରୁନି ପ୍ରଶାସନ ।

ଗତ ପ୍ରାୟ ତିନି ସପ୍ତାହ ଧରି କଣାସରେ ହଇଜାରେ ଲୋକେ ହନ୍ତସନ୍ତ ହେଉଛନ୍ତି । ସ୍ଥିତି ନିୟନ୍ତ୍ରଣକୁ ଆଣିବାକୁ ଜିଲ୍ଲା ପ୍ରଶାସନ ଓ ସ୍ବାସ୍ଥ୍ୟ ବିଭାଗର ସବୁ ଉଦ୍ୟମ ଫେଲ୍ ମାରୁଛି । ସେପଟେ ଏବେ ଯାଏଁ ହଇଜାରେ ମୃତ୍ୟୁବରଣ କରିଥିବା ପରିବାରକୁ ମିଳିପାରିନି ସରକାରୀ ସହୟତା । ଏନେଇ ଗତକାଲି କିଛି ମୃତ୍ୟକଙ୍କ ପରିବାର ରାଜ୍ୟ ମାନବାଧିକାର କମିଶନଙ୍କ ନିକଟରେ ଫେରାଦ୍ ହୋଇଥିଲା । ଗତକାଲି ଜନସ୍ବାସ୍ଥ୍ୟ ଅଧିକାରୀ ଜାଗୁଳେଇପଦର ଗସ୍ତ କରି ଗାଁ ଲୋକଙ୍କ ସହ ବୈଠକ କରି ନଦୀ ଜଳ ବ୍ୟବହାର ନକରିବାକୁ ସଚେତନ କରିଛନ୍ତି ।